سیف د چلډرن: د مرستو کمیدل تر ټولو زیات نجونې اغیزمنوي
۱۴۰۴ مهر ۱۹, شنبه
په المان کې د ماشومانو د ژغورنې ادارې مشر فلوریان ویستفال وویل: «کله چې پروژې کمې یا بندې شي، نو محرومې نجونې یې بیه پرې کوي.»
هغه ۱۳ هیوادونه چې له ښځو او نجونو سره د تبعیض له کبله د مرستو له کمښت سره مخامخ شوي عبارت دي له اسواتیني، نامیبیا، لسوتو، زامبیا، زیمبابویې، افغانستان، یوګاندا او تانزانیا څخه.
د بودیجې یا مرستو دغه کمښت په ځانګړي توګه د ۱۶۷ میلیونه هغو نجونو له پاره ډیر سخت دی چې له ۱۰ تر ۱۹ کلونو پورې عمرونه لري، او د دغو هیوادونو اوسیدونکي دي. ویستفال ټینګار وکړ: «دوی نور ښوونځي ته نه شي تللی او لږه روغتیایي پاملرنه ترلاسه کوي. په ورته وخت کې د تاوتریخوالي او استثمار خطر زیاتیږي.»
خو «د سیف د چلډرن» یا ماشومانو د ژغورنې سازمان په حواله د کلونو راهیسې په نورو هیوادونو کې هم جنسیتي مساواتو ته شدیده اړتیا موجوده ده. ویستفال وویل: «د نړۍ په کچه حکومتونه، ټولنې او تصدۍ باید پر نجونو پانګونه وکړي، د دوی د حقونو ساتنه وکړي او د خپلو خوبونو په حقیقت بدلولو کې ورسره مرسته وکړي.»
د هغه په وینا د زده کړې، حفاظت او روغتیایي پروګرامونو له پاره د ۱۸،۹ میلیارده یورو معادل پیسو ته چې اړتیا ده هغه نشته دي. د دغه سازمان د معلومانو له مخې د کال له پیل راهیسې په نړیواله کچه بهرنۍ مرستې ۱۴ سلنه کمې شوې دي.
د مرستو دغه کمښت په دغو حساسو شرایطو کې ځوانې نجونې اغیزمنوي. ۱۲۲ میلیونه د دغو نجونو د جګړې په سیمو یا زیانمنونکو سیمو کې ژوند کوي. سربیره پر دې یوازې په روان کال کې تر ۳،۵ میلیونو ډیرې نجونې له طبیعي ناورینونو څخه اغیزمنې شوې دي.