مراکش د تیرې یوې پیړۍ تر ټولو شدیده زلزله تجربه کوي؛ هغه زلزله چې د وروستیو رپوټونو په حواله د مړو شمیر یي له ۲۰۰۰ تیری کړی دی.

د رسنیو د یو شمیر رپوټونو په حواله مرستندویان تر اوسه نه دي توانیدلي چې یو شمیر زلزله ځپلو ځایونو او سیمو ته لاس رسی پيدا کړي، له همدې امله اټکل کیږي چې د قربانیانو شمیر به نور هم لوړ شي.

د مراکش دولتي تلویزون د دغه هیواد د کورنیو چارو وزارت په نقل رپوټ ورکړی دی چې د دې شدیدې زلزلې په پایله کې تر ۲۰۰۰ ډیر انسانان ټپیان شوي هم دي او ډیر شمیر ویجاړۍ یې رامنځته کړي دي.

ویل کیږي چې د اطلس غرونو په لړۍ او همدا رنگه د مراکش تاریخي ښار سیمې ډیرې زیانمنې شوې او ځینې ساختمانونه په بشپړ ډول لمنځه تللي دي. همدارنگه یو شمیرتاریخي بناوو او کلتوري تاریخي آثارو ته ډیر زیان رسیدلی دی.

د مراکش شاهي ماڼۍ په دغه هیواد کې دری ورځې عمومي ماتم اعلان کړی دی او د یوې اعلامیې په خپرولو سره یې ویلي دي چې وسله وال ځواکونه او مرستندویان د پاکو اوبو، خوراکي توکو او موقتي سرپناو د برابرولو له پاره سیمې ته استول شوي دي.

د المان، فرانسې، اسرائیل، هسپانیې او ترکیې په گډون د نړۍ یو شمیر هیوادونو مراکش ته د مرستو استولو له پاره خپل تیاری ښودلی دی.

الجزایر چې له ۲۰۲۱م کال راهیسې له مراکش سره دیپلوماتیکې اړیکې نه لري اعلان کړی دی چې خپل هوایي قلمرو د بشردوستانه او طبي مرستو رسولو له پاره د مراکش پر مخ پرانیزي.

د مراکش شدیده زلزله چې د امریکا د زلزلې د څارنې ادارې (USGS) د اعلان مطابق یې شدت ۶،۸ درجې ته رسیده، د جمعې په شپه (د سپټمبر میاشتې په ۸ نیټه) د مراکش ښار په سویل لویدیځ ۷۰ کیلومترۍ کې رامنځته شوه.

د المان په پوتسدام کې د زلزلې د څار موسسې هلمهولتز حتی د زلزلې شدت د ریشتر په مقیاس ۶،۹ درجې ثبت کړی دی.

په مراکش کې د جیو فیزیک د ملي ادارې د یوې څانگې مشر ناصر جبور، په وینا د زلزلې ټکانونه تر ۴۰۰ کیلومترۍ پورې احساس شوي وو.

د زلزلې مرکز د ځمکې په ۱۸،۵ کیلومتره ژوروالي کې اټکل شوی، هغه عمق چې د ډیر شمیر کارپوهانو د ارزونې په اساس ډیر خطرناک دی. تر هغې وروسته د ۴،۹ درجې په شدت یوه بله زلزله هم ثبت شوې ده.

دا په تیرو سلو کلونو کې تر ټولو خطرناکه زلزله وه چې په مراکش کې رامنځته شوې ده. د العربیه تلویزوني شبکې د رپوټ پر بنسټ په ۱۹۶۰م کال کې آگادیر ته نږدې د ریشتر په مقیاس د ۵،۸ درجې زلزله رامنځته شوې وه چې په پایله کې یې تر ۱۲۰۰۰ ډیرو انسانانو خپل ژوند له لاسه ورکړی وو.

آژانسونه: ش.ن/ ن.ص