د «البرایت» په نوم آلماني- سویډني غیر انتفاعي بنسټ په آلمان، امریکا متحده ایالاتو، بریتانیې، سویډن، فرانسې او پولنډ هیوادونو کې په لوړو پوستونو کې د ښځو د حضور په اړه د یوې ترسره شوې پایلې څیړنې خپرې کړي دي.

په امریکا متحده ایالاتو او سویډن کې شاخوا ۲۴ سلنه لوړ یا مدیریتي پوستونه د ښځو په اختیار کې دي. بریتانیا په لوړو مشاغلو کې د ښځو له ۲۰ سلنه حضور سره د «البرایت» بنسټ په نوملړ کې دریم ځای خپل کړی دی. پولنډ له ۱۵،۵ سلنه او فرانسه له ۱۴،۵ سلنې سره د دې درجه بندۍ د جدول په څلورم او پنځمو ځایونو کې ځای نیولی دی.

آلمان په دې برخه کې په وروستې مقام کې قرار نیولی دی. په دې هیواد کې یوازې ۱۲ سلنه ښځې د مشرتابه یا مدیریتي پوستونه په اختیار کې لري چې له ترکیې او هندوستان سره پرتله شوی دی. په دغو هیوادونو کې په لوړو پوستونو کې د ښځو ونډه لس سلنه ده.

په متحده ایالاتو کې د (Apple)او IBM، شرکتونه او په سویډن کې د هنس او موریتس شرکوتونه په لوړو پوستونو کې له ۳۰ سلنه ښځینه مسئولينو یا مدیرانو په لرلو سره د ښځو د مشارکت له پلوه په ریکارډ کچې کې ځای نیولی دی.

د مشرتابه په سطحه کې د ښځو ونډه د فرانسي په لورآل او دانون، همدارنګه د بریتانیې یوني ‌لور شرکت او په پولنډ کې د انرجا شرکتونه هم له دغو شرکتونو سره د پرتلنې وړ دي.

۳۰ لوی شرکتونه چې ښځينه مشرانې نه لري

په آلمان کې ۳۰ لوی شرکتونه چې د احسامو پر بازار ډیر اغیز لري د څیړنې لاندې نیول شوي دي. هیڅ یو له دغو شرکتونو ښځينه مشره نه لري.

دا په داسې حال کې ده چې له امکاناتو څخه په استفادې په آلمان کې ښځو او نارينه و ته د جنسي عدالت د تأمين او برابرۍ امکانات موجود دي. سربیره پر دې ښځې کولی شي د اړتیا په صورت کې د خپل کم عمره ماشومانو د ساتنې او پالنې له پاره د شرکتو او ادارو له امکاناتو څخه ګټه پورته کړي.

کارپوهان ټنګار کوي چې په آلمان او ډیري نورو هیوادونو کې دا خفه کونکی بهیر، د هغه غلط باور نتیجه ده چې مشري په کې سړو ته نسبت ورکول کیږي.

د آلمان د ښځو د چارو وزیره فرانسیسکا ګیفي، د آلمان پر لویو شرکتونو نیوکه وکړه: «د دغو شرکتونو اداري سیاست نه یوازې ارتجاعي شمیرل کیږي، بلکې غیر معقول دی».

میرمن ګیفي خپلو علمي څیړنو ته اشاره کوي چې ثابته کړې یې ده: هغه شرکتونه چې په مدیریتي برخو کې د ښځو او سړو برابرۍ ته ارزښت ورکوي، بریالي دي.

د آلمان د ښځو چارو وزیرې ټینګار وکړ چې د اقتصادي پرمختګ او صنعتي تخنیک په برخه کې د نوښت له پاره د ښځو او سړو له یو ډول بالقوه مهارتونو څخه ښې او برابرې استفادې ته اړتیا لري.