د دغه فلم پروډیوسر آنند کمار دی چې د فلم کیسه یې د ملالي یوسفزۍ پر ژوند باندي راڅرخي. په دغه فلم کې ماشومه ستورې ریم شیخ، د ملالي نقش لوبوي. پر دې سربیره د هند سینما مشهور لوبغاړي دیویا دت او اوم پوري د فلم په مهمو ستورو کې شامل دي. اوم پوري څه موده وړاندې مړ شوی دی. د هندي رسنیو د معلوماتو له مخې د اوم پوري په غږ کې ثبت شوې سندره هم په فلم کې شته، چې د هغه یاد به تازه کړي.
ریم شیخ، چې له شپږ کلنۍ راهیسې یې هنري چارې پیل کړي دي د وزیر، په نوم هندي فلم کې یې هم کار کړی دی.
ریم شیخ درې ورځې تر مخه د «ګل مکۍ» فلم لومړنی پوستر په انسټا ګرام کې خپور کړی دی. په پاکستاني او هندي رسنیو کې لا تر مخه د دغه فلم په هکله خبرونه کښته پورته کیدل، خو په ټولنیزو شبکو کې د دغه فلم د لومړي پوستر تر راڅرګندیدو وروسته په رسینو کې اوس په دې هکله بحثونه پېل شوي دي.
د دغه فلم په هکله یوه ویډیو هم په ټولنیزو شبکو کې خپره شوې ده. په دغه ویډیو کې ریم شیخ وایي چې د ملالي د نقش د لوبولو له کبله ډیره تر اغیز لاندې وه، ځکه چې په خبره یې ملاله یوسفزۍ یوه نړیواله شخصیت ده.
د پاکستان د ډان او ایکسپرس ټریبیون، په نوم ورځپاڼو هم د دغه فلم په هکله چې د ملالي د ژوندانه پیښې پکښې رانغښتل شوي، رپوټونه خپاره کړي دي.
په ټولنیزو رسنیو کې ځينو کسانو ویلي دي چې په بې صبرۍ سره د دغه فلم خپریدو ته شیبې شماري او خپله خوښي يې څرګنده کړې ده. د هغوی په خبره له ډیرې مودې راهیسې دغه فلم ته انتظار کیږي.
صائمه حیدر/ سید ریاض
زموږ له ارشیف څخه:
انځورونه - «زه، ملاله یم»
د پاکستان د سوات اوسیدونکي ۱۵ کلنې ملاله یوسفزۍ، له یوه نشراتي ادارې سره تړون کړی چې خپل یادښتونو ته د یوه کتاب شکل ورکړي. د دغه کار له پاره ملالۍ یوسفزۍ ته درې میلیونه ډالر ورکول کیږي.
انځور: picture alliance / dpa۱۵ کلنه ملاله یوسفزۍ چې د پاکستاني طالبانو له یوه برید څخه ژوندې پاتې شوې، غواړي خپل یاداښتونه د کاغذ پر مخ ولیکي. د رپوټونو له مخې د دغه کتاب لیکلو له پاره به هغه درې میلیونه امریکایي ډالر تر لاسه کړي.
کتاب به د سږني کال په مني کې چاپ شي
د فرانسې خبري آژانس د نوموړي کتاب د ناشرینو په حواله لیکلي دي چې دغه کتاب به په روان کال کې نشر ته ته ورسپارل شي. دغه کتاب «I am Malala» نومیږي.
«په تاسو کې ملاله څوک ده؟»
د ۲۰۱۲م کال د اکتوبر میاشتې نهمه نیټه ده. ملاله د ښوونځي د نورو نجونو سره په موټر کې ناسته ده. خو د هغوی موټر د طالبانو له لوري درول کیږي. یو تن طالب موټر ته ورپورته کیږي او وایي: «په تاسو کې ملاله څوک ده؟ که چیرې خوله نه پرانیزﺉ نو تاسو ټول وژنو!»
په لومړي سر کې د ملالې تداوي په پاکستان کې وشوه
ملاله پیژندل کیږي او د یوه وسله وال له لوري په سر ویشتل کیږي. هغه ډیره سخته ټپي کیږي، خو ژوندۍ پاتې کیږي. د ملالۍ لومړنۍ درملنه په پاکستان کې وشوه، خو بیا د نورو عملیاتونو له پاره د بریتانیې د برمنګهم ښار ته یوړل شوه. اوس د هغې روغتیایي وضعه ښه ده او ښوونځي ته یې تګ پیل کړی دی.
تر ټپي کیدو څو ورځې وروسته ملاله یوسفزۍ، د یوې ځانګړې الوتکې پواسطه د بریتانیې برمنګهم ښار ته د درملنې له پاره راوستل شوه. په دغه روغتون کې د هغې څو جراحي عملیاته تر سره شول او اوس له روغتون څخه کور ته تللې ده.
د ملالۍ د ټپې کیدو وروسته د پاکستان په بیلا بیلو ښارونو کې د هغې سره د خواخوږۍ د څرګندولو له پاره بیلا بیلې غونډې تر سره شوې او پر هغې شوی برید په سختو ټکو کې وغندل شو.
ملاله وایي، هیله منده ده، چې کتاب یې په ټوله نړۍ کې ولوستل شي او لوستونکي پر دې پوه شي چې د ځینو ماشومانو له پاره د تعلیم حاصلول څومره ستونزمن کار دی. په افغانستان کې هم د ملاله یوسفزۍ د روغتیا له پاره په ښوونځیو کې دعاګانې شوې وې.
ملاله یوسفزې ته د با جرات نجلۍ خطاب کيږي. د «ټایمز» مجلې هغې ته په ۲۱۰۲م کال کې تر اوباما وروسته په نړۍ کې د دویم شخصیت لقب ورکړی دی. ملاله د نوبل سولې جایزې ته هم نومول شوې ده. پر دې سربیره د ملګرو ملتونو له لوري د نوامبر د میاشتې لسمه نیټه «د ملالۍ د ورځ» په نوم نومول شوې ده.
