د مارانو یو ځانګړتیا دا ده چې هغوی ډیر ورو ورو ترهغه وخت پورې چې د خپل ښکار نفس وباسي، ښکار په خپل چنګ کې راګیروي. دا چې ماران د یو شي څخه د راتاویدو وړتیا لري، اوس له مارانو څخه په ځینو هیوادونو کې د مساژ له پاره کار اخیستل کیږي.

هغه کسان چې غواړي د مار په واسطه مساژ ورکړل شي، باید د ویرې احساس و نه کړي. له هر مساژ څخه ۳۰ دقیقې مخکې مارانو ته ښه خوراک ورکول کیږي او بیا وروسته د هغوی خولې تړل کیږي. درې متره اوږد او تقریباُ د ۸ کیلوګرامه وزن لرونکي ماران، زیاتره ملا او پښو ته د مساژ ورکولو له پاه استعمالیږي.

مساژ کیدونکي کسان که هر څومره هم زړور وي، خو بیا هم په خپل ذهن کې د ویرې یو احساس لري. د دې کسانو په حواله، کله چې د دوی پر بدن مار ګرځي او مساژ ورکول کیږي نو په بدن کې یو ډیر عجیب احساس را پیدا کیږي.

د انسان د لاسونو د مساژ او د مار په واسطه مساژ یو له بل سره ډیر توپیر لري. کله چې د مار په واسطه یو څوک چاپي کیږي، نو د مساژ پر وخت د مار نیول کله ډیر سخت شي او کله بیا ډیر نرم شي.

د مارانو د مساز وروسته خلک د ډیر آرامۍ احساس کوي. ډیری کسانو دا منلې ده چې د مساژ پر مهال هغوی د دې وړتیا پیدا کړه چې خپله ویره او ډار اداره کړي.

سربیره پر دې چې د مارانو خولې تړل شوي وي، خو بیا هم د مساژ په خونه کې څارونکي هم موجود وي ترڅو د مار حرکتونه او د هغه رویه وڅاري.

د اندونیزیا سربیره په ځینو نورو هیوادونو کې هم د مارانو مساژ مخ پر ډیریدو دی. اوس په فلیپین او انګلستان کې هم د مارانو د مساژ ځیني مرکزونه جوړ شوي دي او خلکو ته خدمتونه وړاندې کوي.