د افغانستان استازی به د م.م.عمومي اسامبلۍ ته وينا وکړي
۱۳۹۸ مهر ۸, دوشنبه![USA UN-Generalversammlung Heiko Maas](https://static.dw.com/image/50600441_800.webp)
د ملگرو ملتونو د عمومي اسامبلۍ ۷۴ مه غونډه څو ورځې تر مخه په داسې حال کې پېل شوه چې د نړيوال تجارت او اقليم بدلون په اړه بې اطمناني او د سعودي عربستان او ايران ترمنځ اړيکو کې ترينگلتيا ليدل کيږي.
نن د دوشنبې په ورځ (۲۰۱۹م کال د سپتمبر ۳۰ نيټه) به د افغانستان او شمالي کوريا ترڅنگ کاناډا، تايلند، سريلنکا او د نورو هيوادونو مشران يا استازي به عمومي اسامبلۍ ته وينا وکړي.
د افغانستان استازيتوب به د ملی امنيت مشاور حمد الله محب وکړي. د ملي امنيت شورا دفتر په تويتر پاڼه کې ويل شوي چې نوموړی په دغه غونډه کې د گډون په موخه د يکشنبې په ورځ نيويارک ته رسېدلی دی.
زياته شوې ده چې محب به هلته د افغانستان د روان وضعيت، ولسمشریزو ټاکنو او د سولې پروسې په اړه نړيوالو ته وينا وکړي.
د ملگرو ملتونو د عمومي اسامبلۍ د سږنۍ غونډې د پام وړ پرمختگونه د سوریې له پاره د يوه نوي اساسي قانون پر مسودې د کار له پاره د يوې کميټې جوړيدل او د امريکا متحده ايالاتو او جاپان ترمنځ د لومړي تجارتي تړون لاسليکیدل ول. همدا راز د ولسمشر دونالد ترمپ او د چاپیريال د سويډنۍ فعالې گريتا تونبيرگ ترمنځ تويتري شخړې هم د خلکو د پام وړ وگرځيدلې.
د تېرو کلونو په څیر دا ځل هم ټول تمرکز پر ولسمشر دونالد ترمپ وو چې نوموړي په خپله وينا کې د «نړيوال کيدو پلويان» ملامت کړل او ايران یې پر سعودي عربستان د تازه بريد له پاره گرم وباله.
د ولسمشر تازه جنجال چې تور پرې لگول کيږي چې د اوکراين پر ولسمشر یې د خپلې سياسي گټې له پاره فشار اچولې دی، د ملگرو ملتونو د دې غونډې په ترڅ کې راڅرگند شو. همدا وو چې ټوله نړۍ په رسنيو کې د ترمپ په اړه موضوعاتو ته متوجې وه.