د جرمني نفوس هیڅکله دومره ډیر نه وو. ددغه هیواد نفوس په ۲۰۲۲ م کال کې یو اشاریه ۳ سلنه او یا هم یو اشاریه یو میلیون اضافه شوی. دغه خبر په ویسبادن کې د آلمان د احصاییې دفتر ورکړی دی. د دغه دفتر په حواله د ۲۰۲۲ کال تر پایه په آلمان کې پوره ۸۴ اشاریه ۴ میلیونو انسانانو ژوند کاوه.

ملگري ملتونه: په نړۍ کي د مهاجرو شمېر خپل اوج ته رسیدلی

د احصایو له مخې په ښکاره ډول دغه ډول لوړوالی له ډیرو مهاجرتونو سره تړاو لري. د نوموړي ادارې په حواله په ۲۰۲۲ م کال کې له بیلابیلو هیوادونو څخه له یو اشاریه ۵ میلیونو څخه ډیر انسانان آلمان ته راغلي دي. دغه رقم د ۲۰۲۱ کال په پرتله څه د پاسه څلور چنده زیاتوالی ښيي. زیاتره دغه کسان له اوکراین څخه دي.

په جرمني کې له ۱۲ میلیونو څخه اضافه بهرني اتباع اوسیږي

په جرمني کې د ۲۰۲۲ م کال په پای کې شاوخوا ۷۲ میلیونه آلمانانو او ۱۲ اشاریه ۳ میلیونه خارجي اتباعو ژوند کړی دی. د یو اشاریه ۳۴ میلیونو کسانو په لرلو سره تُرکي اتباع تر ټولو ډیر وو. تر هغه وروسته اوکرایني اتباع دي چې شمیر یې یو اشاریه ۵ میلیونو ته رسیده او سوریایان چې شمیر یې ۸۸۳ زرو ته رسیږي. د نوموړي کال د پیل او پای ترمنځ له جګړو څخه راتښتیدلو اوکرایینانو شمیر شپږ برابره سوی وو.

د جرمني د ټول نفوس د خارجیانو برخه له ۱۳ اشاریه یو سلنې څخه ۱۴ اشاریه ۶ ته پورته سوې ده. په داسي حال کې چې د آلماني اتباعو شمیر صفر اشاریه ۴ سلنی ته راکم سوی، د بهرنیو اتباعو شمیر بیا په ښکاره ډول زیات سوی دی. یو بل بدلون بیا دادی چې په ۲۰۲۲ م کال کې په آلمان کې یو وار بیا د نوو زیږیدونکو ماشومانو په پرتله ډیری انسانان مړه سوي دي. په مجموعي ډول د نوي زیږون په پرتله د مړیني  ۳۲۷ زره پیښي رامنځته سوي دي. په ۲۰۲۱ کال کی لا د مړینو شمیر۲۲۸ زره وو.

GP/BS/DW.Online