د آلمان په پارلمان کې د مسیحي سوسیال او مسیحی دموکرات متحدو ګوندونو د اړخ رئیس، فولکرکاودر، د مهاجرت سیاست په باب د ګوندونو خپلمنځي اختلافاتو ته په کتو وویل چې دی په دغه سیاست کې د بدلون د رامنځ ته کولو اړتیا نه ویني.
کاودر د شنبې په ورځ، آلماني رسنیو ته وویل:« مونږ په لمړي قدم کې د اروپايي اتحاديې او ترکیې تر منځ د شوي تړون د تصویبیدو په برخه کې ډیر موثر کارونه ترسره کړل تر څو ډیر کم مهاجر آلمان ته راشي».
پر ورته موضوع یو انځوريز البوم زموږ له آرشيف څخه (01.04.2016):
په اروپا کې د ښې راتلونکی خوب نیمگړی پاته شو
د اروپايي اتحادیې او ترکیې تر منځ د شوي تړون له مخې یونان ته په غیر قانوني توگه د ورغلو مهاجرو د بیرته استولو لړۍ به د اپریل مياشتي له څلورمي نیټې څخه پیل شي.
انځور: DW/G. Harvey
ترکیې ته د تگ چمتووالی
د اروپایي اتحادیې او ترکیې تر منځ د شوي تړون له مخې یونان ته په غیر قانوني توگه د ورغلو مهاجرو د بیرته ستنولو لړۍ به د اپریل میاشتې له څلورمې نېټې څخه پیل شي. دا لا روښانه نه ده چې د دوشنبې په ورځ به څومره کسان بیرته ترکیې ته واستول شي.
انځور: Getty Images/AFP/A. Isakovic
د سړک پر سر تیریدونکي ورځې او شپې
په زرونو مهاجر د خپل سر په بیه یونان ته ورسیدل، خو دغه هیواد چې پخپله هم له اقتصادي لحاظه کمزوری دی، پکښې مهاجرو ته د سرپناه برابرولو له پاره ښه بندوبست نه شته. تیره ورځ د آتن چارواکو په دې پیل وکړ چې د پيريوس په ساحلي سیمه کې موجود مهاجر نورو برخو ته انتقال کړي.
انځور: Reuters/A.Konstantinidis
له لسیبوس څخه وتل
له ترکیې څخه په غیر قانوني توگه يونان ته د رسېدلو مهاجرو زیاتره برخه لیسبوس ټاپو ته رسیږي. تر تړون وروسته مهاجر د لیسبوس له ټاپو څخه نورو ځایونو ته انتقاليږي. تر هغه وروسته به بیرته ترکیې د دغو مهاجرو د بیرته ستنیدو له پاره گامونه اخیستل کیږي.
انځور: Reuters/M. Karagiannis
امید او نهیلي
په زرونو مهاجر اوس هم د یونان او مقدونيا سرحد ته څیرمه د ایدومیني په کمپ کې په دې هیله شپي سبا کوي، چې یو وخت به سرحد پرانیستل شي او دوی به د آلمان او نورو اروپایي هیوادونو پر لور خپل سفر ته ادامه ورکړی. له دغو زرونو مهاجرو سره ښځې او ماشومان هم شته.
انځور: DW/D. Tosidis
د اغزنو دېوالو تر شا
د مقدونیا او یونان تر منځ سرحد په بشپړه توگه بنده دی. مهاجرو له بدیلو لارو مقدونیا ته د رسیدو هڅي کړي دي خو هر ځل نیول کیږي او بیرته یونان ته استول کیږي. مهاجرو د مقدونیا د امنیتي ځواکونو له لوري د تشدد او ناروا چلن په هکله هم شکایت کړی دی.
انځور: picture-alliance/dpa
په اروپا کې هم له پولیسو سره آخ او ډب
د یونان پولیسو په کراتو له مهاجرو څخه غوښتي دي چې له ایدومیني څخه نورو کمپونو ته ولاړ شي. د کمپ د خالي کولو د هڅو پر مهال مهاجرو احتجاج کړی. په دغه ترڅ کې د پولیسو او مهاجرو تر منځ آخ او ډب هم رامنځ ته شوی دی.
انځور: Getty Images/AFP/A. Isakovic
پر تړون سربیره هم له ترکیې یونان ته مهاجر روان دي
که څه هم دا خبره څرگنده ده چې د تړون له مخې له ترکیې څخه یونان ته په غیر قانوني توگه تللي مهاجر به بیرته ترکیې ته استول کیږي، خو پر دې سربیره هم د آژه سمندرگي له لاري مهاجر له ترکیې څخه یونان ته ځي. په تیرو ورځو کې د مهاجرو په شمیر کې بیا ډیروالی راغلی دی.
انځور: Getty Images/A. Koerner
د ژغورنې واسکټونو امبار
په سمندر کې د سفر پر مهال د مهاجرو له لوري استعمالیدونکي ژغورونکي واسکټونه د یونان په ټاپوگان کې اوس هم پراته دي. د بشري حقونو ادارې کارکوونکي وايي چې ترکیه د مهاجرو له پاره خوندی ځای نه دي. خو اروپایي اتحادیه وایي چې د دغو اقداماتو له لارې به پر خطرناکو لارو د غیر قانوني مهاجرو د تگ په مخنیوي کې مرسته وشي.
انځور: DW/G. Harvey
انځورونه1 | 8
د ولس ناراضي
هغه زیاته کړه چې په اوږدمهاله کې د مهاجرو د راتلو د کمیدو په برخه کې باید د مهاجرت د عواملو پر وړاندې مبارزې ګړندۍ شي. کاودر پر دې ټینګار وکړ چې اوس باید تر ټولو زیاته پاملرنه د هغو مهاجرو ادغام ته وشي کوم چې آلمان کې د پاتې کیدو فکر لري.
د تیرې اوونۍ په پای کې د مهاجرو د ادغام په برخه کې د آلمان نوی قانون هم په اجرا کې راغی، چې مهاجرو ته په کې ډیر امکانات په نظر کې نیول شوي دي. خو هغو مهاجرو د پاره چې د ادغام بهیر ته غاړه نه ږدي بیا تدابیر نور هم سخت کړل شوي دي.
ترسره شوې نظرسنجۍ ښیي چې د آلمان زیات شمیر خلک د مهاجرت موضوع په تړاو، د صدراعظمې انګلا مرکل له سیاست څخه ناراضه دي. په دې باب یوه نوي تازه نظرسنجي ښيي چې د آلمان د نفوس یو دریمه برخه،(۳۴ سلنه) له مرکل څخه ډیر او یا لږ ناخوښه دي.
