په پام کې ده چې د ایټالیا لومړی وزیر پاولو گینتولوني، د اروپايي اتحادیې او همداشان د شمالي افریقا هیوادونو د کورنیو چارو له وزیرانو سره په روم کې وویني. د خبرو اترو موضوع د مهاجرو کړکیچ دی.
د آلمان د کورنیو چارو د وزیر توماس دیمیزیر ترڅنگ په دغه کوچنۍ سرمشریزه کې د ایټاليا، فرانسې، اتریش، مالتا، سلوانيا او سویس د کورنیو چارو وزیران برخه اخلي. پر دې سربیره له الجزایر، تونس او لیبیا څخه د استازو د گډون تمه هم کیږي.
په اصل کې پر دې موضوع باندې خبري اتري کیږي چې څرنگه اروپا ته د مهاجرو د هجوم مخه نیول کیدای شي. ایټالیا په ځانگړې توگه د مهاجرو کړکیچ له کبله اغیزمنه ده، ځکه چې دا مهال دغه هیواد ته له افریقا څخه تر ټولو زیات خلک د مدیتراني سمندرگي له لاري ورغلي دي.
د مهاجرت نړیوال سازمان (آی او ام) د رپوټ له مخې په ۲۰۱۶م کال کې ډېر مهاجر په سمندر کې وژل شوي او په زرونو نور کسان له ناوړه چلن سره مخامخ شوي دي. د روان میلادي کال له پېل راهیسې شا او خوا ۱۶۰۰۰ مهاجر ایټالیا ته رسیدلي دي چې د تیر میلادي کال د همدې مودې په پرتله ۵۰۰۰ تنه زیات دي. همداشان روان میلادي کال په اوبو کي د ۵۲۰ تنو د وژل کیدو رپوټ ورکول کیږي.
د ایټالیا د کورنیو چارو وزیر مارکو منتي، غواړي چې د اروپایي او افریقایي هیوادونو تر منځ یو ډول دایمي د «تماس ډله» رامنځ ته کړي، څو پر دغه ستونزو برلاستوب وموندل شي. په پلازمېنه روم کې په دغو خبرو اترو کې د اروپايي اتحادیې د کورنیو چارو کمېسار دیمترس اوراموپولس، هم گډون کوي.
د یکشنبې په ماښام د لېیبا په سواحلو کې شا او خوا ۳۰۰۰ مهاجر چې په کښتیو کې سپاره ول، ژغورل شوي دي. د ایټاليا ساحلي څارونکو د وینا له مخې په ټوله کې دغه کسان د ۲۲ ماموریتونو په ترڅ کې وژغورل شول. تر څو ورځو کرارۍ وروسته د موسم په ښه کیدو سره یوځل بیا خلک د مدیترانې سمندرگي له لاري خطرناک سفر کولو ته زړه ښه کوي، څو اروپا ته ځان ورسوي.
د آلمان او فرانسې د مرستې یوه گډ نوښت پر خپله انټرنېټ پاڼه رپوټ ورکړی دی چې دوی په نهو کښتیو کې په زرونو مهاجر ژغورلي دي چې تر ۲۰۰ زیات پکښې ماشومان دي.
لېبیا چې د مدیترانې په څنډه کې پروت دی د افریقايي هیوادونو د مهاجرو له پاره په مهم ترانزیتي هیواد اوښتی دی او اروپا ته د غیر قانوني سفر له پاره د انساني قاچاق وړونکو د فعالیت له پاره هم مشهور دی.
د ورکړل شوو رپوټونو له مخې په تیر میلادي کال کې له افریقا څخه اروپا ته د تیښتې پر مهال تر ۵۰۰۰ زیاتو کسانو په مدیترانه سمندرگي کې خپل ژوند له لاسه ورکړی دی. دا تیرو کلونو په پرتله تر ټولو زیات شمیر وو چې ثبت شوی دی.
زموږ له ارشيف څخه نور مطالب:
انساني قاچاق وړونکي، افريقايي انجوني او بدلمني
د دویچه ویله دوو خبریالانو جان فلپ شولز او آدریان کریش، په نایجیریا کې د انساني قاچاقبرانو په هکله پلټنې کړي. د قاچاقبرانو د تعقیبولو ترڅ کې د دوی سر تر ایټالیا پورې ورسید، خو د خاموشۍ له یو دیوال سره مخامخ شول. انځور: DW/A. Kriesch/J.-P. Scholz د دویچه ویله دوو تنو خبریالانو د انساني قاچابرانو پسې د لټون لړۍ له نایجیریا د ایدو ایالت څخه پیل کړ. دوی چې له هر چا سره لیدل د هغه یو نه یو خپلوان به ضرور په اروپا کې وو. په ایټالیا کې د بدلمنه ښځو دری پر څلورمه برخه د دغې سیمې نجوني دي. بې روزگارې له دغې سیمې څخه د مهاجرت اصلي لامل گڼل کیږي.
انځور: DW/A. Kriesch/J.-P. Scholz نن بیبینا ایمناها، د څو کلونو راهیسې په ځانگړي توگه ځوانو نجونو ته خبردارې ورکوي چې اروپا ته له سفر کولو څخه ډډه وکړي. ایمناها وایې: «ډیرې نجونې د درواغو ژمنو په جال کې بند پاتې کیږي. دوی ته ویل کیږي چې په کورونو کې به د خدمې یا ورته کارونه کوې، خو کله چې اروپا ته ورسیږي بیا نو دوی درواغ معلوم شي. له همدې امله ډیرې نجوني د مجرمو ډلو لاسو ته ولیږي.»
انځور: DW/A. Kriesch/J.-P. Scholz تر ډیرو هڅو وروسته یو قاچاقبر له دویچه ویله سره خبرو ته راضي شو. هغه وویل چې تر سلو ډیر خلک یې له نایجیریا څخه لیبیا ته رسولي دي. د هغه په خبره د «د ایدو خلک ډیر حریص دي او د ښې راتلونکي له پاره هر څه کولو ته تیار دي.»
انځور: DW/A. Kriesch/J.-P. Scholz دغه قاچاقبر چې ځان اسټیو معرفي کوي وایې چې له نایجیریا څخه تر لیبیا پورې له هر کس څخه ۶۰۰ ایرو اخلي. ډیرې پوهیږي چې له دښتې او صحرا له لارې لیبیا ته رسیدل څومره خطرناک دی. په دې ترڅ کې ډیر شمیر خلک خپل ژوند له لاسه ورکوي.
انځور: DW/A. Kriesch/J.-P. Scholz د «اگادیز» دښته د دویچه ویله د خبریالانو راتلونکې منزل وو. د دوی په خبره دا ډیره خطرناکه سیمه ده. په دې دښته کې دغه خبریالان یوازې د وسله والو محافظینو سره سفر وکولې شو.
انځور: DW/A. Kriesch/J.-P. Scholz هره دوشنبه تر لمر ولیدو وروسته د څو لاریو یوه قافله د اگادیز دښتې څخه د شمال پر لور روانیږي. په لیبیا کې د نا کراریو له امله انساني قاچاقبران بې له کوم ممانعت څخه دغه هیواد ته داخلیږي او د مدیترانې ساحل ته ځان رسوي.
انځور: DW/A. Kriesch/J.-P. Scholz د مهاجرو شمیر مخ پر ډیریدو دی او نجونې باید کم عمره وي د نایجیریا ډیرې نجونې د فحشا بانډونو په لاسو کې ولیږي. مدني فعاله لیزا بیرتینې وایې: «د شمیرو له مخې په ۲۰۱۴ کال کې تر ۱۰۰۰ ډیرې نایجیریایې نجوني او میرمنې د مدیترانې له لارې ایټالیا ته رسیدلي دي. په ۲۰۱۵ کال کې دا شمیر ۴۰۰۰ ته لوړ شو.» نوموړۍ زیاتوي چې کوښښ کیږي د نجونو عمر کم تر کم وښودل شي.
انځور: DW د نایجیریا د یوه دوست په مرسته دغه دواړه ژورنالستان د ایټالیا په شمال کې یو «مادام» ته ورسیدل. نایجیریا کې دلالې ته مادام ویل کیږي. په ایتالیا کې یوې نایجیریایۍ نجلې وویل: «مادام پر موږ تشدد وکړ او بدلمنې ته یې مجبوره کړو.»
انځور: DW/A. Kriesch/J.-P. Scholz کله چې د دویچه ویله خبریالانو پر مادام د لگول شوو مختلفو تورونو په هکله پوښتنې وکړې، نو هغې ومنله چې په کور کې یې ۶ نجونې موجودې دي. خو دا رد کړه چې دغه نجونې یې بدلمنې ته اړ ایستلي دي.
انځور: DW/A. Kriesch/J.-P. Scholz د مونیکا اوشکوی په نوم یوې راحبې په دې برخه کې ایټالوي ادارې په نه پاملرنې تورنوي او انتقاد پرې کوي. نوموړۍ د تیرو ۸ کلونو راهیسې بدلمنۍ ته اړ ایستل شوو نجونو په برخه کې کار کوي. نوموړی زیاتوي چې سړي غواړي په ډیرو کمو پیسو خپل جنسي خواهش پوره کړي، چې دا کار په ایټالیا کې له نایجیریایې ښځو سره د ۱۰ ایرو په بدل کې کولې شي.
انځور: DW/A. Kriesch/J.-P. Scholz
