د ناټو او اروپايي ټولنې ترمنځ د دې په نظر کې نيول شوي لا زيات ژور ستراتيژيک مشارکت هدف دا دی چې د ګډو امنيتي تهديدونو پر وړاندې په لا همغږي شوې بڼه چلن وشي.
د اروپايي اتحادیې کمېسيون مشرې اورزولا فون ډېرلاین، د اروپايي اتحادیې د شورا مشر چارلس ميشل، او د ناټو عمومي منشي ينس ستولتنبيرګ، په بروکسل کې د ناټو په مقر کې يوه اړونده اعلاميه لاسليک کړه. دواړه اړخونه غواړي په دې سره خپل مشارکت يوې «نوې کچې ته» لوړ کړي.
د همکارۍ لا ژورول
د اعلاميې په څلور مخیز متن کې راغلي دي چې په ځانګړي توګه د چين او روسیې په څېر قدرتونو سره «د مخ پر پراخیدونکې جيوستراتیژيکي سيالۍ» او د «حساسو زېربناو د محافظت»، لکه د اوبو او انرژۍ د تامين په ترڅ کې دواړه اړخونه غواړي چې نظرونه یې سره نزدې وي.
د ناټو عمومي منشي له روسیې څخه د اوکراين جګړې ته د پای ټکي ايښوولو غوښتنه وکړهانځور: Olivier Matthys/AP/picture alliance همدا راز زیاته شوې ده چې د فضا، په «معلوماتو کې د لاس وهنې او د خارج څخه د مداخلې» او همدا راز د اقليم د بدلون په برخه کې ژورې همکارۍ ته اړتيا ده. په متن کې زياته شوې ده چې د ځمکې د تودوخې لوړېدل سولې او امنيت ته خطر ګڼل کيږي ځکه چې د میليونو انسانانو د ژوند مادي اساسات ګواښي. زياته شوې چې وچکالي او سېلابونه، تېښه او مهاجرت او همدا راز د اوبو او ځمکې پر سر پراخيدونکې شخړې یې ښايي پايلې وي.
ستر امنیتي ګواښ
د اوکراين پر ضد د روسیې جګړې ته بيا د تر ټولو ستر امنيتي خطر په توګه کتل کیږي. د ګډې اعلامیې په متن کې راغلي چې د اوکراين جګړې په ټوله نړۍ کې ثبات اغیزمن کړی او د انرژۍ او خوراکي توکو بحران یې رامنځته کړی چې په ميلياردو انسانان یې اغیزمن کړي دي.
سيرګي لاورف پر ناټو نېوکې وکړې
د ناټو عمومي منشي ينس ستولتنبيرګ د پای په مطبوعاتي غونډه کې غوښتنه وکړه چې روسيه بايد ژر تر ژره دا جګړه پای ته ورسوي او له اوکراين څخه خپل عسکر وباسي. هغه وويل چې د روسیې د ولسمشر ولاديمير پوتين دا هڅه چې د اوکراين په کړکېچ کې د لویديځ متحدين سره وويشي، نه ده بريالۍ شوې خو ستولتنبيرګ زياته کړه چې د چين پر ځان مخ پر زياتیدونکی اعتماد د نويو ننګونو زمينه برابروي
ستولتنبرګ: «موږ به پرې نه ږدو چي روسیه مو وګواښي» .
د ناټو او اروپايي اتحادیې د همکارۍ دا نوې اعلاميه د ۲۰۱۶ او ۲۰۱۸م کلونو د اعلاميو پر بنسټ ولاړه ده.
ب. ص/ ن. ز (dpa, afp, ntv)
زموږ له آرشیف څخه:
د ناټو ائتلاف او روسیې مقايسه: څوک ډېر پیاوړی دی؟
د ناټو ائتلاف او روسیې ترمنځ د ځواک توازن څرنگه دی؟ کوم يو ډېري وسلې او عسکر لري؟ په دې اړه دويچه ويله د ستراتيژيکو مطالعاتو له نړيوال انستيتوت او نورو سرچينو څخه ارقام راټول کړي چې په دې انځوريز راپور کې وړاندي کيږي. انځور: REUTERS روسيه ۱۸۰۰ داسي توغندي يا راکټونه لري چې د اتومي سرگولولو د ليږد توان لري. ناټو ائتلاف بيا په ټولیزه توگه ۲۳۳۰ دغه ډول راکټونه لري چې له دې څخه يې دوه زره له امريکا متحدو ايالاتو سره دي.
انځور: picture-alliance/dpa/J. Lo Scalzo ناټو ائتلاف په ټوليزه توگه شا او خوا درې نيم ميليونه عسکر لري چې تر ۱،۶ ميليونه زيات يې د اروپايي هيوادونو په پوځونو کې، ۳۸۲ زره د ترکیې په پوځ او تقريباً څه کم ۱،۴ ميليونه يې د امريکا د پوځ عسکر دي. د دې په پرتله د روسیې د عسکرو شمير۸۰۰ زرو ته رسیږي.
انځور: picture-alliance/dpa/PAP/T. Waszczuk د روسیې د ټانکونو شمير کابو ۱۵ نيم زره دی. دا په داسې حال کې ده چې د ناټو هيوادونه په ټولیزه توگه شا او خوا ۲۰ زره ټانکونه لري. په دې کې ۲۵۰۰ ترکي او ۴۰۰۰ امريکايي ټانکونه هم شامل دي.
انځور: picture alliance/dpa/F. Kästle روسيه په يو وار د څو راکټونو د فایرولو توان او کابو ۳ زره ۸۰۰ راکټ لانچر لري. ناټو بيا ۳۱۵۰ دغه ډول راکټ لانچر لري چې له دې څخه ۸۱۱ د ترکیې له پوځ سره دي.
انځور: Reuters/Alexei Chernyshev روسيه ۴۸۰ جنگي څرخي الوتکې لري. د ناټو متحدين بيا تر ۱۳۰۰ زياتې څرخي الوتکې لري چې له دې څخه کابو ۱۰۰۰ د امريکا له پوځ سره دي.
انځور: REUTERS د ناټو ائتلاف په تولیزه توگه ۴۷۰۰ بم غورځونکې الوتکې لري. له دې څخه کابو ۲۸۰۰ د امريکا متحدو ايالاتو، ۱۶۰۰ د ناټو د اروپایي غړو او ۲۰۰ له ترکیې سره دي. روسيه بيا ټول ټال ۱۴۰۰ دغه ډول طيارې لري.
انځور: picture alliance/CPA Media د روسيې د جنگي الوتکو شمیر کابو ۷۵۰ ته رسيږي. ناټو بيا په ټولیزه توگه کابو ۴۰۰۰ جنگي الوتکې لري. په دې کې د امريکا ۲۳۰۰ او د ترکيې ۲۰۰ جنگي الوتکې هم شاملې دي.
انځور: picture-alliance/Photoshot روسيه يوازي يوه الوتکې ليږدونکې بيړۍ لري، خو ناټو ائتلاف دا ډول ۲۷ بيړۍ لري.
انځور: picture-alliance/newscom/MC3 K.D. Gahlau د ناټو د غړو د جنگي کښتيو شمېر په ټولیزه توگه ۳۷۲ ته رسيږي چې له دې څخه ۲۵ د ترکیې، ۷۱ د امريکا، ۴ د کاناډا او ۱۶۴ د ناټو د اروپايي هيوادونو له سمندري ځواکونو سره دي. روسيه بيا د سلو په شا او خوا کې جنگي کښتۍ لري.
انځور: picture-alliance/NurPhoto/Impact Press Group/P. Petrov د ناټو غړي هيوادونه کابو ۱۶۰ اوبتلونه لري. د روسیې د اوبتلونو شمېر بيا ۶۰ ته رسیږي. د ناټو د ټولو اوبتلونو څخه یې ۷۰ د امريکا، ۱۲ د ترکیې او ۷۲ د نورو اروپايي غړو هيوادونو سره دي.
انځور: Getty Images/AFP/M. Bager د روسیې او ناټو دفاعي بودجه هم د مقايسې وړ نه ده. د روسیې دفاعي بودجه يوازې ۶۶ ميليارده ډالره ده. دا په داسې حال کې ده چې د امريکا دفاعي بودجه ۵۸۸ ميليارده ډالرو ته رسيږي. د ناټو ائتلاف ټولیزه بودجه کابو ۸۷۶ ميليارده ډالر ده.
انځور: picture alliance/chromorange
