په ننګرهار ولایت کې ځايي چارواکي وايي چې د جاپانۍ موسسې (PMS) د مشر ډاکټر تیڅوناکامورا د پروژو د بشپړوونې له پاره د دغې موسسې مشرۍ ته موراکامي ټاکل شوی دی. ناکامورا څو ورځې وړاندې په جلال آباد ښار کې وژل شوی وو. د ننګرهار د والي ویاند عطاالله خوږیاڼي دویچه وله ته وویل چې موراکامي اوس جاپان کې دی او په راتلونکې لنډ وخت کې به افغانستان ته د ډاکټر ناکامورا د پروژو د بشپړونې په موخه راورسيږي.

خوګیاڼي همدا راز وویل چې د ډاکټر ناکامورا تازه او وروستۍ پروژه د مروارید د کانال بیارغاونه وه. د دغې پروژې د تطبیق له پاره ډاکټر ناکامورا ۷۰۰ زره امریکايي ډالرو تړون لاسلیک کړی و. مروارید کانال د کونړ له سینده پورته شوی او د ۲۷ کیلومتره په اوږدوالي د ننګرهار کوز کونړ ولسوالۍ ګمبیري دښتې ته رسېدلی. په بشپړیدو سره دغه کانال ۳ زره هکټاره ځمکه خړوبوي.

د ننګرهار د والي ویاند عطاالله خوږیاڼی وايي چې دمګړۍ د ناکامورا تازه کار همدا دی او دا چې دغه موسسه او تازه ګمارل شوی رییس به یې نور کوم کارونه کوي، لا مالومه نه ده. د ننګرهار د ښېوې یا کوز کونړ ولسوالۍ یوه اوسېدونکی جان محمد دویچه وله ته په دې هکله وویل چې هغه خوښ دی چې د ډاکتر ناکامورا پر ځای د هغه د ارمانونو د پوره کولو له پاره جاپان یو بل کس ټاکلی.

جان محمد وویل : «ډاکټرناکامورا دوی ته یو اتل و او هیله لري چې نوی ګمارل شوی کس به د دوی په سیمه کې هغه کارونه بشپړ کړي، چې ډاکترناکامورا یې پلي کېده غوښتل.» ډاکټر تیڅو ناکامورا د روانې  ډسمبر میاشتې په څلورمه نیټه د ننګرهار په مرکز جلال اباد ښار کې هغه مهال تر وسله وال برید لاندې راغی، چې کله له دفتره د خپلې یوې پروژې په څار پسې روان و. د هغه وژلو ته په هېواد دننه په حکومتي او ولسي کچ او همدا راز په نړیواله کچه تند غبرګونونه را پاریدلي وو.

ډاکترناکامورا ته د خپلو فعالیتونو له کبله ولسمشر محمد اشرف غني افتخاري تابعیت هم ورکړی و. هغه افغانستان کې د بیارغاونې او اوبو مدیریت په برخه کې کار کاوه او اوس یې خلک د یوه اتل په توګه پېژني.

امید دیدار، جلال آباد