لکه څنګه چي دواړو خواوو تایید کړې ده، دغه لیدنه کتنه د شانګهای د ګډي همکارۍ سازمان د سرمشریزي په څنډه کي د تیري جمعې په ورځ په مسکو کي تر سره سوې ده. خو معلومیږي، چي په خبرو کي پرمختګ نه دی راغلی.

د خبري آژانس شینهوا په حواله د چین د دفاع وزیر، وای فینګ ویلي دي چي« د نښتو او یوه خراب وضعیت د رامنځته کیدو مسئولیت یوازي د هندوستان پرغاړه دی.» په خبره یې د «چین پوځ به د خپلي هري لویشتي خاوري څخه دفاع وکړي.»

خو بیا د هندوستان د دفاع وزیر، راج نات سنګ د هغه د وزارت د یوې اطلاعیې پر اساس پر چین باندي په سرحد کي د چیني قواوو د تمرکز، تعرضي رفتار او داسي یوه کوښښ تور لګولی دی، چي غواړي وضع د ځان په ګټه یو طرفه تغیر کړي.

د جون د اخري په سرحدي نښتو کي حداقل ۲۰ هندي عسکر وژل سوي وه. دا د دغو دواړو اټومي قدرتونو تر منځ تر لسیزو وروسته یوه تر ټولو خرابه سرحدي واقعه وه. د دواړو هیوادو ترمنځ سرحدي شخړه د ډیره وخته څخه موجوده ده. د تیر قرن په شپیتمو کلونو کي یې تر منځ یو لنډ جنګ رامنځته سو، کوم چي چین ګټلی ؤ.