د هندي پوځ ویاند ډګروال ایس ډي ګواسوامي ويلي دي چې یاغیانو له سرحدي پولي څخه تر تیریدو وروسته د هند پر سرحدي سرتیرو ډزې وکړې. د ګواسوامي، په خبره د دغه برید پر مهال اکثره هندي سرتيري ویده ول.
د برید له پيل څخه تر ډیر وخت وروسته پورې د دواړو خواو تر منځ د ډزو تبادله روانه وه. ویل کیږي چې د شکمنو بیلتون غوښتونکو یاغیانو له خوا د دغه ترسره شوي برید په پایله کې لږ تر لږه ۱۷ هندي سرتیري وژل شوي دي.
دغه برید د «اړی سیکټر» په سیمه کې د پلي پوځ پر یوه سرحدي پوستې ترسره شوی دی. د اړی، سیمه د لاین اف کنټرول یا سرحدي کنترول سیمې ته نږدې پرده ده چې د «باره مولا» ولسوالۍ یوه برخه ده. دلته د هند د پوځ د دولسم پياده لوا مرکز دی چې په سلګونه پوځیان په کې د سرحدي پولي د سانتې په موخه مستقر شوي دي.
په دغه بیس یا مرکز کې ټپي شوي پوځیان په عاجل ډول د سري نګر ایالتي مرکز ته د چورلکو په وسیله لیږدول شوي دي. په نوي ډهلي کې د هند دفاع وزارت د ټپي شوو پوځیانو شمیر ۳۵ تنه ښودلی دی.
د هند د کورنيو چارو وزارت یوه لوړپوړي چارواکي ویلي دي داسې نه ښکاري چې دغه برید دی ګوندې د تندلارو یاغیانو له خوا ترسره شوی وي، بلکې د سرحد له پورې غاړې څخه تر سره شوي پوځي عملیات دي.
د هند د کورنیو چارو وزیر راج ناته سنګه، د تلیفون له لارې له ایالتي مسئولینو څخه د دغه برید او روان وضعیت په هکله معلومات ترلاسه کړل.
سربیره پر دې ناته سنګه، روسیې او امريکا متحده ایالاتو ته خپل سفرونه هم ځنډولي دي. په عین وخت کې د هند د کورنیو چارو وزیر په دې سیمه کې پوځيانو ته د تیارسئ په حال کې د پاتې کیدو امر کړی دی.
په لومړي سر کې د پوليسو له خوا د دوو تنو پوځيانو د وژل کیدو خبر ورکړل شوی وو. د پولیسو په حواله بریدګر د پاکستان له خوا داخل شوي ول. د ډزو په تبادله کې د څلورو تنو بریدګرو د وژل کیدو خبر هم ورکړل شوی دی.
د هندي پوځ د ویاند په حواله برید کونکو یاغیانو تر پایه یعني د دوی تر وژل کیدو پورې د ډزو لړۍ جاري ساتلی وه. د عیني شاهدانو په حواله له ډیر لیري ځای څخه معلومیدل چې له دغه پوځي مرکز څخه تور لوګي پورته کیږي.
نور مطالب:
مريخ ته د هندۍ سپوږمکۍ سفر
دا د هند لپاره يوه تاريخي ورځ وه. د «منګاليان» په نوم هندۍ مصنوعي سپوږمکۍ د سرې کورې مريخ مدار ته په لومړۍ هڅه داخله سوه.
انځور: picture-alliance/dpa/Indian Space Research Organisationهر څه د پلان سره سم تر سره سول. کله چي مصنوعي سپوږمکۍ «منګاليان» د ۲۰۱۴م کال د سپتمبر په ۲۴مه نېټه د مريخ مدار ته ننوته، نو د هند په بنګلور کي چيري چي د هند د فضانوردۍ مرکز دی، د خوشاليو چکچکي پېل سوې. د هند لومړي وزير نريندرا مودي وويل چي په دغه ورځ « هند يو نوی تاريخ وليکی».
د مودي خپره رشتيا ده، ولي چي هند د مريخ مدار ته د مصنوعي سپوږمکۍ په لېږلو سره ځان د هغوی هيوادونو په قطار کي ودراوه چي مريخ ته يې سپوږمکۍ لېږلي دي. دغه د امريکا متحده ايالات، روسيه او اروپايي اتحاديه ده چي مريخ ته يې په برياليتوب سره پرواز کړی دی. دغه يو آسان هدف نه دی ولي چي د ۵۱ هڅو څخه يې ۳۰ ناکامه سوي دي. خو هند په لومړي ځل لا بريالی سو.
هند په زياته بيا په دې وياړي چي لومړنی آسيايي هيواد دی چي مريخ ته يې سپوږمکۍ ولېږدوله. چين او جاپان په څو ځله په دغه هڅه کي ناکامه سوي دي.
دا نه ده پلان سوې چي د هند سپوږمکۍ د مريخ خاورې ته کښته سي. دغه ۱۳۵۰ کلوګرامه وزن لرونکې سپوږمکۍ به د مريخ په مدار کي د دغه کورې د فضا او سطحي په هکله معلومات او انځورونه مځکي ته راولېږي. په زياته بيا د مريخ پر سطحه د ميتان تلاښ کيږي چي پر دغه کوره د ژوند تثبيت کولای سي.
هند په خپله دغه پروژه د لګښتونه په تړاو هم نوښت کړی دی. پر دغه پروژه صرف د ۵۷ مليونو لګښت راغلی او په دې توګه و مريخ ته د تاريخ تر ټولو ارزانه سفر دی. ښايي هند په دې ډګر کي د ناسا او نورو فضانوردۍ د ادارو څخه مخکي سي.
د بعضي اليکترونيکي آلو علاوه د هندۍ سپوږمکۍ ټول سامان آلات په هند کي طرحه سوي او جوړ سوي دي. هند د فضانوردۍ په ډګر کي يوازي برياليتوبونه لرلي دي. دغه هيواد شپږ کاله تر مخه په لومړۍ هڅه لا سپوږمۍ ته مصنوعي سپوږمکۍ ولېږدوله.
د دې څخه تر مخه چي د هند مصنوعي سپوږمکۍ د مريخ مدار ته ورداخله سي، صرف څو ورځي مخکي د ناسا سپوږمکۍ «ماون» د دغه کورې مدار ته داخله سوه. خو د مارس دغه پروژه د هندۍ پروژې په پرتله تقريبا لس چنده زیاته قيمتي تمامه سوې ده. ناسا هند ته مبارکي ويلې.
