د امریکا متحده ایالاتو ولسمشر دونالد ترمپ، د خپل ټویټر په یوه پیغام کې د هغه بیلجیمي مالینوز سپي انځور خپور کړ چې په سوریه کې د داعش ترهګرې ډلې د مشر ابوبکر البغدادي، پر ضد چاپه کې ټپي شوی وو. د دغه سپي نوم محرم ساتل شوی ځکه چې دا کار د هغه روزنکی او هغه قطعه افشا کولی شي چې په چاپه کې یې ونډه لرله.

له سپو څخه له کلونو راهیسې د کړکیچ په سیمو کې کار اخیستل کیږي. رېن تېن تېن آلمانی شېفرد سپی وو چې په لومړنۍ نړیواله جګړه کې د آلمان په اردو کې وو چې د یوه امریکايي عسکر له لوري ونیول شو. تر هغې وروسته دغه سپی امریکایي پوځ ته «واوښت». دغه سپي خپل پاتې نوی ژوند په متحده ایالاتو کې تیر کړ او په ۱۹۲۰م کلونو کې یې د هالیووډ په فلمونو کې بریالی وخت تیر کړ.

جېګز یو بریتانوی بولداګ، وو چې په ۱۹۲۲م کال کې د متحده ایالاتو په سمندري ځواکونو کې شامل شو. جیګز ډیر ژر پوځي رتبې تر لاسه کړي او په څو کلونو کې د ډلګي مشر رتبې ته ورسید چې په لږو کلونو کې یو بریالیتوب وو. جیګز په ۱۹۲۷م کال کې تر مړیني وروسته په پوره پوځي درناوۍ خښ شو.

زیاتره پوځي سپي تر زیږیدو وروسته روزل کیږي. د آلمان په اردو کې دغه ډول سپي له روزونکو سره تر هغه وخت پوري پاتې کیږي څو د دندې له پاره پوره جوګه شي. په انځور کې د اتریش ولسمشر الکسندر فان دیر بېلین، له هغو سپو سره لیدل کیږي چې د اتریش په پوځ کې د خدماتو د ترسره کولو له پاره روزل کیږي.

په ۲۰۰۰م کال کې د متحده ایالاتو د هغه وخت ولسمشر بل کلنټن د «رابیز قانون» لاسلیک کړ چې موخه یې د دې ډاډمنتیا رامنځ ته کول وو چې د متحده ایالاتو د پوځ سپي نور د جګړو په سیمو کې پرې نه ښودل شي او یا د خدماتو د ترسره کولو وروسته و نه وژل شي. په ویتنام کې د امریکا د پوځ ۲۷۰۰ سپي د سویلي ویتنام پوځ ته سپارل شوي وو او ۱۶۰۰ نور د بیهوشه کولو له لارې وژل شوي وو.

پر خپل ښایست سربیره، ټول پوځي سپي د آلمان د شیفرد له نسل څخه نه دي. خو د بارک پوسټ، د معلوماتو له مخې د متحده ایالاتو د اردو ۸۵ سلنه سپي له آلمان او هالنډ څخه اخیستل کیږي او بیا هلته روزل کیږي. د آلمان د سپو شیفرد نسل تر ټولو مشهور دی. د بیلجیم مالنیوز، د کوم انځور چې ترمپ خپور کړی وو ډیر زیات شهرت لري.