پانډې په خپل تویت کې ادعا کړې چې د پاکستان له اسخباراتي ادارې ISI سره د داسې کسانو د اړیکو درلودلو تصدیق او پخلی شوی دی. که څه هم د بي جی پي دغه مشر په مستقیم ډول د باليووډ د کوم داسې شخص نوم نه دی اخیستی، خو په خبره یې له «محب وطن» یا وطن دوسته کسانو څخه غوښتي دي چې له داسې اشخاصو سره دې خپلې اړيکې پرې کړي.
بالاخره خبرهڅه ده؟
د هند د سیمه ایزو رسنیو په حواله په ټولنیزو رسنیو کې له یوه کشمیري توکمه امریکایي انجینر ټوني اشائې سره د باليووډ د مشهور ستوري شاهرخ خان او د هغه د میرمنې ګوري خان د انځور تر خپریدو وروسته دغه شخړه راپوروته شوې ده.
د بالیووډ سنیما مشهور ستوری شاه رخ خان او میرمنه یي ګوري خانانځور: picture alliance/dpa/Mum-Mitesh Bhuvad
دا خبره مهمه ده چې ټوني اشائې په ښکاره ډول د هند تر ولکې لاندې کشمیر او کشمیري ولس د حقونو او هغوی له پاره د عدالت غوښتنه کوي.
په همدې منځ کې په سري نګر کې د ال سکندر په نوم د تویتر یوه کارونکي پر ټوني آشائې تور لګوی دی چې نوموړی کشمیري ځوانان لمسوي چې تیږي او وسلې را پورته کړي. نوموړي د پاکستان له لومړي وزیر سره د آشائې انځورونو د حوالې په ورکولو سره تور لګولی دی چې هغه د ISI له پاره خدمات وړاندی کوي.
د دغو دواړو تویتونو تر خپریدو وروسته خبره د مرکزي حکومت رسنیو ته ورسیده. د هندي رسنیو څو کړیو تر اندازې زیات د توکمپالنې نظریې په ښکاره کولو سره د کشمیریانو وطن دوستي تر پوښتنې لاندې راوستل شروع کړل.
بل لور ته ټوني آشائې د دغو ټولو تورونو په ردولو سره هغه بې بنسټه بللي دي. هغه په یوه تویټ کې لیکلي دي: «په هندي رسنیو کې زما پر ضد توطیه یي نظریات خپریږي چې ګواکې زه د آي اس آی اجنټ یم، دا بې بنسټه دي. دا ژورنالیستان دې یا کوم ثبوت وړاندې کړي او یا دې هم غیر مشروطه بخښنه وغواړي.»
نوموړي واضحه کړې ده چې د کار په ارتباط یې له ډیر شمیر مشهورو شخصیونو سره ملاقاتونه کیږي، چې په هغو کې د پاکستان اوسنی لومړی وزیر عمران خان او د باليووډ د مشهور ستوري شاه رخ خان ترڅنګ نورې ډیرې مشهورې څیرې شاملې دي.
نوموړي زیاته کړه چې د ډیزاین پرته یې کله هم د کوم بل کاروبار په برخه کې کار نه دی کړی.
د یادونې وړ ده چې مخکې تر دې هم د هندو ملتپاله کړیو له خوا د باليووډ پر ستورو په امریکا، متحده عربي اماراتو او بریتانیا کې د میشتو پاکستاني سوداګرو او کاروباریانو سره د ارتباط درلودلو اړوند پوښتنې راپورته شوي دي.
دویچه ویله: ش.ن/ ن.ص
د اړوندې موضوع په ارتباط زمونږ له آرشیف څخه انځوریز رپوټ:
شاهرخ خان څنګه د باليووډ مشهور ستوری شو؟
شاهرخ خان؛ څنګه وکولای شول د باليووډ تر ټولو مشهور ستوری شي؟ ده به لومړی د بدماشانو رول هم لوباوه. خو اوس دی د مينې او رومانتيک اتل نقش ادا کوي. نور جزيات د انځورونو په دغه ګالرۍ کې ومومئ.
انځور: Rapid Eye Movies
د باليووډ پاچا
د شاهرخ خان د ژوند کيسه خپله د فلم يوه داستان ته ورته ده. مخکې له دې چې دی په ممبئي کې خپل کاري ژوند پيل کړي، دی د نوي ډهلي په يوه عادي کورنۍ کې لوی شوی وو. ۵۰ کلن شاهرخ د باليووډ په وتلو ستورو کې شمېرل کيږي او سربېره پر دې دی چمتوکوونکی، وړاندې کوونکی او هنرمند هم دی.
انځور: Rapid Eye Movies
د هند د سينما اصلي اتل
شاهرخ خان لومړی د خرابو او فاسدو انسانانو رول هم لوبولی دی. خو د رومانتيک اتل نقش وو چې په ۱۹۹۰ يمو کلونو کې يې د هند په تر ټولو بريالۍ څېره بدله کړه. د «دل والی دلهنیا لی جائین گی» په نوم فلم تر اوسه پورې په نړۍ کې رکارډ لرونکی فلم شمېرل کيږي.
انځور: picture alliance/Dinodia Photo
د باليووډ وتلې جوړه
۲۲ کاله کیږي چې کاجول ديوګن په فلمونو کې له شاهرخ سره لوبيږي. هغوی د سينما د پردې پر مخ د هند تر ټولو بريالۍ او محبوبه جوړه بلل کيږي. خو په واقعي ژوند کې دواړو له نورو خلکو سره ودونه کړي دي.
انځور: picture-alliance/AP Photo/R. Maqbool
په شخصي ژوند کې مهربانه مېړه
۲۵ کاله کیږي چې شاهرخ خان له ګوري خان سره واده کړی دی. ګوري هم فلمي لارښوده ده. دغه جوړه درې ماشومان او د فلم جوړونې يو شرکت هم لري. هغوی يو د بل سره پېژندل مخکې له دې چې شاهرخ مشهور فلمي ستوری جوړ شي.
انځور: picture-alliance/Dinodia Photo Library
«زما نوم خان دی»
د «زما نوم خان دی» فلم په ۲۰۱۰ کال کې جوړ شو. هغه په بهر کې يو تر ټولو مشهور باليووډ فلم دی. د دې فلم کيسه د امريکا په متحده آيالاتو کې د يولسم سپتمبر وروسته د اسلام ضد احساسات دي. په دې فلم کې شاهرخ خان د رضوان خان رول لوبوي چې د ترهګرۍ تور ورباندې لګول کيږي. د دې فلم پيغام دا دی چې «زما نوم خان دی، خو زه ترهګر نه يم.»
انځور: Twentieth Century Fox
بالیووډ د ګټې وټې ځای
د «نوی کال مو مبارک شه» فلم (۲۰۱۴) چې په لومړۍ ورځ يې د هند په تاريخ کې تر ټولو زياتې پيسې لاس ته راوړلې، لږ وروسته په آلمان کې هم نندارې ته وړاندې شو. دغه فلم وروسته د «ار تي ال ۲» خصوصي شبکې له لوري په آلمان کې خپور شو.
انځور: Rapid Eye Movies
د ميليونرانو په فهرست کې
شاهرخ خان له خپل همکار اکشي کمار سره وکولای شول خپل نوم د فوربس مجلې په ليست کې ثبت کاندي. شاهرخ خان له ۳۳ ميليونو ډالرو عايد سره له خپلو همکارانو څخه مخکې دی، خو د هاليووډ د ستورو د عايداتو په پرتله دی لا په وروستنيو ځايونو کې قرار لري. د هاليووډ د ۲۵ کلنې ستورې، جنيفر لاورنس، عايد پروسږ کال ۴۶ ميليونه امريکايي ډالر وو.
انځور: Getty Images/AFP
د ټولنيزو رسنيو خوښوونکی
د فيس بوک او تويتر په ټولنيزو پاڼو کې تقريبا ۲۰ ميليونه انسانان د ده پاڼه تعقيبوي. دلته شاهرخ خان د خپل ورځني ژوند په هکله هم ليکنې کوي. د ده مثلا د پوکمون ګو لوبه ډېره خوښيږي.
