د هیئت تحریر شام ډلې، ځايي ټولنو او هيوادونو ته د ډاډ ورکونې له پاره ويلي دي چې په سوریه کې ياغي ځواکونه منحل کيږي.

ابو محمد الجولاني، چې اصلي نوم ېې احمد الشرع دی، له دروزي ټولنې سره په کتنه کې وويل چې مختلفې ډلې چې یو بل ته ېې لاسونه ورکړل تر څو د بشارلاسد په مشرۍ ۲۴ کلن حکومت ته د پای ټکی کيږدي «منحلې به شي او جنګیاليو ته به ېې په دفاع وزارت کې د یوځای کېدو له پاره روزنې ورکړل شي.»

د دغې ډلې پر تلیګرام حساب د دوشنبې په ورځ خپرو شوو پوستونو مطابق، جولاني ویلي دي: «ټول به د قانون تابع وي.»

 الجولاني، چې په حاضر وخت کې له خپل اصلي نوم احمد الشرع، استفاده کوي، هڅه کوي چې داخلي اقلیتونو او بهرنیو حکومتونو ته ډاډ ورکړي چې په سوریه کې موقت حکومت هم د دغه هېواد له خلکو او هم ېې له دولتي بنسټونو ساتنه کوي.

د کوردي جنګیاليو او ترکيې تر منځ د اوربند مذاکرات ناکام شوي

د کردانو په رهبرۍ د سوريې ديموکراتیک ځواکونه (SDF) چې د امریکا متحده ایالاتو ملاتړي دي، اعلان وکړ چې دغه مذاکرات د ترکيې له خوا د کلیدي مواردو د نه منلو له کبله له ماتې سره مخ شول.

یوه ملېشه وویل د سوريې په شمال کردمیشته سیمه کې د امریکا متحده ایالاتو په مشرۍ د اوربند رامنځ ته کولو له پاره هڅې ناکامې شوي دي.

دغې ډلې ويلي دي: «د جګړې د توقف له پاره د امریکا متحده ایالاتو د هڅو با وجود، ترکيې او نیابتي جنګیاليو ېې په کردمیشته سیمو کې د جګړو شدت ته ادامه ورکړې ده.» د سوريې ديموکراټ ځواکونو هم پر ترکيې تور ولګاوه چې مذاکرات ېې جدي نه دي نيولي. 

که څه هم امریکا او ترکيه دواړه د ناټو غړي دي، خو دغه دوه هيوادونه د خپلو نیابتیانو په حصه کې له یو بل سره په تقابل کې واقع شوي دي.

په داسې حال کې چې د سوريې ديموکراتيک ځواکونه په سوریه کې د «اسلامي دولت» یا داعش ډلې پر ضد مبارزه کې د امریکا متحده ایالاتو مهم متحدين دي، خو ترکیه بیا دغه ډله د کردستان د ممنوعه ګوند (پ کې کې) یوه شاخه بولي او هغه ېې د یو تروریستي سازمان په توګه درجه بندي کوي.