په واشنگټن کې فېرونه او د امریکا د ملي گارډ د دوو سرتیرو ټپي کیدل له پراخو غبرگونونو سره مخامخ سوي دي. د امریکايی چارواکو د څرگندونو له مخې، د دغه برید عامل یو افغان تبعه دی چې په ۲۰۲۱ م کال کې واک ته د طالبانو له بیا رسیدو وروسته، امریکا ته انتقال سوی و.

ددغه برید په نتیجه کې د امریکا د ملي گارډ دوه سرتیري سخت ټپیان سول.

دغه پیښه د امریکا او نړۍ په رسنیو کې له پراخو غبرگونونو سره مخامخ سوه او ددغه هیواد ولسمشر، ډونالډ ترمپ د افغانستان دپخواني حکومت له سقوط وروسته، د افغانانو د انتقال له امله د امریکا پر پخواني ولسمشر، جو بایدن باندې سخت انتقاد وکړ.

د امریکا متحده ایالاتو پخواني ولسمشر، بارک اوباما ددغې پیښې په غبرگون کې د ټولنیزو رسنيو په ايکس شبکه کې ولیکل:«زورزیاتی په امریکا کې ځای نه لري. زه او میشل د هغو سرتیرو له پاره چې نن په واشنگټن ډي سي کې د مرمیو تر هدف لاندې راغلل، دوعا کوو او له خواشینۍ ډکو شیبو کې د هغوی له کورنیو سره خپله خواخوږي څرگندوو.»

د ۲۰۲۴ م کال په انتخاباتو کې د امریکا د ولسمشرۍ نوماندې، کامالا هېریس هم دغه اقدام غندلی او هغه یې د نه منلو وړ وباله.

اړوندم موضوع: د امریکا یوې محکمې د افغانانو له پاره د لنډمهاله حفاظت لغوه کول مؤقتاً وځنډول

هېریس پر خپله ایکس پاڼې ولیکل:«زه او داگ د ملي گارډ د هغو دوو سرتیرو له پاره چې د نن ورځې په پیل کې په واشنگټن کې د مرمیو هدف وگرځیدل، د هغوی د کورنیو او هغې ټولنې له پاره چې هغوی ورباندي گران دي، دوعا کوم. د زورزیاتيو هر ډول د منلو وړ نه دی او موږ ټول باید په گډه دغه پیښه وغندو.»

د ډونالډ ترمپ مرستیال، جي ډي وینس هم د نوموړې پیښې په وړاندې غبرگون وښود. هغه پر ایکس ولیکل چې په ۲۰۲۱ م کال کې، امریکا ته د افغانانو له انتقالولو سره مخالف و.

وینس ولیکل:«په یاد لرم چې په ۲۰۲۱ م کال کې مې له ارزونې پرته افغان پناه غوښتونکو د سیل په وړاندې د دروازې پر پرانیستلو انتقاد وکړ. دوستانو مې پیغام راولیږه او زه یې نژاد پالونکی وبللم. هغه وخت د توضیح ورکولو وخت و. هغوی باید زموږ په هیواد کې نه وای.»

«د افغانانو ډله ایزه سزا غیرعادلانه ده»

په عین حال کې، د افغانستان له پاره د ملگرو ملتو د بشري حقونو ځانگړي رپوټ ورکوونکي ، ریچارډ بنت په ایکس کې وویل چې  د یوه کس د ترسره سوي عمل له امله باید ټولو افغانانو ته سزا ورنکړل سي.

هغه وویل:« زه .... موافق یم چې مجرم باید جواب ورکوونکی وي، خو د افغانستان ټوله جامعه باید د یوه کس د عمل له امله مجازات نه سي. دغه کار ښايی په شدت سره غیرعادلانه او کاملاً بې معنی وي.»