د پیستوریوس یوه ویاند د epd خبري آژانس ته ویلي دي چې د یوه ایالت له لوري د مهاجرو د منلو پروګرام د قانوني او واقعي نظره د تطبیق وړ نه دی.
د دغه ویاند په خبره په دې تړاو ټول اړین اقدامات لکه امنیتي ارزونه او د ویزوصدور د آلمان د کورنیو چارو مرکزي وزارت تائید ته اړتیا لري. زیاته شوې ده چې د بشري دلایلو له مخې له یوې وچې څخه د مهاجرو ماشومانو لاره هم امکان نه لري. ځکه چې دغه څه له یو دریم هیواد څخه امکان لري، نه د اروپایي اتحادیې له هیوادونو څخه.
پیستوریوس د تیر میلادي کال په اکتوبر میاشت کې د یونان له لسبوس ټاپو څخه د لیدنې پر مهال وړاندیز کړی وو چې ۱۰۰۰ بې سرپرسته ماشومان چې عمرونه یې تر ۱۴ کلونو کښته وي آلمان او د اروپایي اتحادیې نورو هیوادونو ته ولیږدول شي.
د Seebrücke په نوم مدني سازمان څخه د مهاجرو مرستندویانو د آلمان پر حکومت فشار زیات کړی دی. په اوسنابروک کې له دغه سازمان څخه ریناته هایزه، ویلي دي چې په راتلونکي اوونۍ کې دغه ګروپ د ټول آلمان په کچه بیلا بیل اقدامات او له سیاستوالو سره خبرې اترې پلان کړي دي.
د یاد سازمان یوې فعالې یوهانا شیرف ویلي دي چې په اکتوبر میاشت کې د مهاجرو له پاره وضعیت لا پسې خراب شوی دی. د هغې په خبره نور مهاجر هم راروان دي، خو د اروپایي اتحادیې پر هیوادونو کوم مهاجر نه ویشل کیږي. د هغې په خبره همداشان د بې سرپرسته ماشومانو له پاره هم وضعیت ښه نه دی. دغې فعالې په لسبوس ټاپو کې د بیلابیلو سازمانو له پاره د داوطلبې په توګه کار کړی دی.
دغه فعاله زیاتوي چې مجموعا د ۵۶۰۰ ماشومانو څخه چې عمرونه یې د ۱۲ او ۱۷ کلونو ترمنځ دي، ډیرې یې له کمپونو د باندې ژوند کوي.
د ژمي په یخ موسم کې هغوی په نازکو خیمو کې ورځې شپې سبا کوي او اړونده ادارې تر سخت فشار لاندې دي. همداشان هغه کانتیزونه نه دي درول شوي چې عاجله اړتیا ورته وه.
یوهانا شیرف زیاتوي چې په کمپونه کې د حفظ الصحې وضعیت هم ډیر خراب او روغتیايي پالنه هم سمه نه کیږي: «د خوړو له پاره کافي څه نه شته. د یوه وخت ډوډۍ له پاره تنکي ځوانان او نجونو باید درې ساعته په کتار کې ودریږي.»
تیره اوونۍ په آلمان کې زیات شمیر ناحیو او ښاروالیو ویلي ول چې چمتو دي ماشومان او تنکي ځوانان ومني.
زموږ له آرشیف څخه:
د «موریا کمپ» په اطرافو کې د ژوندانه شرایط څه ډول دي؟
د یونان حکومت د مهاجرو له حده زیات ډک کمپونو د تړلو او توقیف ځایونو ته د مهاجرو د انتقالولو هوډ څرګند کړی دی. د موریا کمپ چې مهاجر پکې په ناوړه شرایطو کې ژوند کوي، هم ښایي په نزدې وخت کې وتړل شي. انځور: InfoMigrants/Aasim Saleem افغانه کورنۍ چې هر څه یې وسوځیدل د سپتمبر میاشتې په ۲۹مه نېټه په موریا کمپ کې د لګیدلي اور له کبله د دغه کورنۍ هر څه وسوځیدل. دغه څلور کسیزه کورنۍ اوس د موریا کمپ د باندې په یوه خیمه کې ژوند کوي. دا کورنۍ چې دوه کوچني ماشومان هم لري ادعا کوي چې چارواکو ورسره هیڅ مرسته نه ده کړې او دغه خیمه هم ورته یوه مرستندویه سازمان ورکړې.
انځور: InfoMigrants/Aasim Saleem مضره ناروغي، خو بله لاره هم نه شته نصیر احمد چې د پاکستان تر ادارې لاندې کشمیر سره تړاو لري پر تور زیړي اخته دی. هغه د ۲۰۱۶م کال د اکتوبر میاشتې راهیسې د لیسبوس په ټاپو کې بند پاتې دی. د نصیر د پناه غوښتنه دوه وارې رد شوې ده او اوس ورسره هیڅ ډول مرسته نه کیږي. دی د موریا کمپ د باندې په یوه موټر کې له نورو څلورو کسانو سره په ګډه ژوند تیروي.
انځور: InfoMigrants/Aasim Saleem ځیرک تلیفون، د ورځني ژوند مهم جز د موریا کمپ زیاتر اوسیدونکي ځوانان دي. ځیرک تلیفون دغلته د ورځني ژوند مهمه برخه جوړوي. که په نورو اروپایي هیوادونو یا پلرني ټاټوبو کې د خپلو خپلوانو او دوستان احوال اخیستل وي او که تفریح کول وي، دغه ضرورت ځیرک تلیفون سر ته رسوي.
انځور: InfoMigrants/Aasim Saleem د ماشومانو له پاره د آسانتياو نشتوالی په موریا مهاجر کمپ او د هغې په اطرافو کې په نورو کمپونو کې د ماشومانو له پاره سهولتونه له نشت سره برابر دي. دغه دوه افغان کوچنیان یوې او بلې خوا ته په ګرځیدو سره خپل وخت تیروي. په دغه سیمه کې د کمپونو په منځ کې په تنګو لارو او سړکونو کې زیاتره وخت ماشومان لیدل کیږي. د ژوندانه له ستونزو څخه د بې خبرو ماشومانو پر خوله مسکا د کمپ د مهاجرو له پاره د خوښۍ یو سبب دی.
انځور: InfoMigrants/Aasim Saleem د موریا کمپ په سیکشن بي، کې د ۱۵۰ ماشومانو د ځایدو ظرفیت شته، خو شا او خوا ۵۵۰ ماشومان پکې اوسیږي.
انځور: InfoMigrants/Aasim Saleem نامعلومه برخلیک او اندیښنې د موریا کمپ زیاتره اوسیدونکي افغانان دي. په دغه انځور کې یوه پلار او زوی یې د کمپ باندني دیوال ته ډډه لګولې او ناست دي. د نارینه وو له پاره ټوله ورځ بې مقصده ګرځیدل هغوی پریشانه کوي. دغه مهاجر نه د کار اجازه لري او نه هم د دغه ځای په ژبه پوهیږي. زیاتره ورځې همدغسې یو ځای او بل ځای په ناسته تیریږي.
انځور: InfoMigrants/Aasim Saleem له خپل حده څو وارې ډک کمپونه په دغه انځور کې دوه افغانان لیدل کیږي چې د موریا کمپ د باندې د یوه دوکان مخې ته ډوډۍ خوري. موریا کمپ د ۳۵۰۰ کسانو د ځایدو ظرفیت لري خو هلته شا او خوا ۱۳۰۰۰ کسان پکې اوسيږي. همدا علت دی چې په شا او خوا سیمو کې دغه ډول صحنې تر سترګو کیږي.
انځور: InfoMigrants/Aasim Saleem دا د موریا کمپ د باندې یو مؤقتي دوکان دی. په دغه ځای کې سبزي او ترکاري رانیول کیدی شي. هغه کسان چې د کمپ ډوډۍ یې نه خوښیږي له دې دوکانه سبزي رانیسي او په خپله د خوړو تیارولو ته ترجیح ورکوي.
انځور: InfoMigrants/Aasim Saleem د موریا کمپ په اطرافو کې د مهاجرو خیمې دغه انځور د موریا کمپ د باندې د مهاجرو د یوه مؤقتي کمپ دی. سږکال د سلونو مهاجرو په راتګ سره دغه ډول غیر رسمي کمپونه مخ پر ډیریدو دي چې د پاکوالۍ سهولتونه یې ډیر خراب دي.
انځور: InfoMigrants/Aasim Saleem
