د پاکستان د دیني عالمانو یو پلاوي کابل ته تللی
۱۴۰۱ مرداد ۴, سهشنبه![Symbolbild Afghanistan Ausreisewilligen in Kabul](https://static.dw.com/image/62348213_800.webp)
پاکستاني رسنیو خبر ورکړی دی، چې د دغه پلاوي مشري د پاکستان مشهور دیني عالم محمد تقي عثماني کوي، چې د اکوړه خټک حقانیه مدرسې مشر انورالحق، مفتي غلام رحمان، مولانا محمد طيب، مولانا حنيف جالندري، مولانا حسین احمد، د خېبر پښتونخوا د اسمبلۍ پخوانی غړی شیخ الحدیث مولانا محمد ادریس او مختارالدین شاه کار بوګا په دې پلاوي کې شامل دي.
پاکستاني رسنیو ویلي چې دغه پلاوی د پاکستاني طالبانو یا ټي ټي پي او پاکستان حکومت ترمنځ په هغو مذکراتو کې برخه اخلي، چې د تېرو څو میاشتو راهیسې د افغان طالبانو په منځګړیتوب پیل شوي دي. تر دې وړاندې د افغان طالبانو په منځګړتوب د پاکستان د حکومت او پاکستاني طالبانو ترمنځ مذاکرات شوي وو چې په پایله کې یې یو لنډ مهاله اوربند هم رامنځته شوی وو.
د پاکستاني پلاوي مشر محمد تقي عثماني بیا په یوه ټویټ کې ویلې دي، چې د افغان طالبانو په غوښتنه یې کابل ته سفر کړی دی او له افغان طالب حکومتي چارواکو سره هم په یو لړ مسایلو خبرې کوي.
عثماني که څه هم د ټي ټي پي سره د مذکراتو په اړه څه نه دي ویلي خو زیاته کړې یې ده، چې د افغان طالبانو مشرانو سره به د افغانستان د پوهنې او اسلامي اقتصاد په اړه خبرې اترې وکړي: «موږ د افغان حکومت په بلنه نن له یوه ښه نیت سره کابل ته راغلو، چې له لومړي وزیر، د کورنیو چارو وزیر، د پوهنې وزیر او نورو لوړپوړو چارواکو سره به د مرستو پر کار، د پوهنې او اسلامي اقتصاد بحثونه پیل کړو.»
کابل ته د پاکستان د دیني عالمانو د پلاوي د سفر په اړه تر اوسه د پاکستان حکومت او افغان طالبانو حکومت کوم رسمي اعلان نه دی کړی.
فریدالله ظاهر