د پاکستان پولیسو د عمران خان پر ضد تروریستي تورونه درج کړي
۱۴۰۱ اسفند ۲۸, یکشنبه
د اسلام آباد پولیسو د يکشنبې په ورځ، د پاکستان پر پخواني صدراعظم عمران خان او هغه ته پر نژدې ۱۷ مرستندویانو او پلویانو د تروریستي او نور تورونو دوسیه درج کړه. په دغو افرادو کې پخواني وزیران او وکیلان هم شامل دي.
انځور: Akhtar Soomro/REUTERS
اعلان
د اسوشيېتید پریس په حواله، د اسلام آباد پولیسو د عمران خان او هغه ته د نژدې ۱۷ کسانو پر ضد تورونه وروسته له هغې لګولي چې تېره ورځ (د ۲۰۲۳م کال د مارچ ۱۷مه) د خان پلویان په پلازمینه کې له امنيتي ځواکونو سره ونښتل.
د پاکستان پخواني صدراعظم تېره ورځ د اختلاس ېوې دوسېې په تړاو د اسلام آباد په یوه محکمه کې راڅرګندېدی او د هغه پلویان بیا له دغې محکمې بهر له ولاړو پولیسو سره د څلورو ساعتونو له پاره ونښتل.
پولیسو په دغه اخ و ډب کې له باتومونو یا لاسي ډنډو او اوښکې بهونکو ګازو استفاده وکړه په داسې حال کې چې د خان پلویانو بیا د افسرانو پر لور د اور بمونه او ډبرې وارې کړې.
د شنبې ورځې پيښه د تېرکال په اپریل کې د پاکستان پارلمان له خوا د ۷۰ کلن خان تر سلب صلاحیت کېدو وروسته د هغه او د حکومت تر منځ د راولاړ شوو سیاسي اختلافاتو په لړ کې د تاوتريخوالو وروستۍ پېښه ده.
عمران خان چې په ابتدا کې د پاکستان د کريکټ ستوری وو، وروسته یې سیاست ته مخه کړه. هغه ادعا کوي چې د هغه د ځای ناستي شهباز شریف او د واشنګټن د یوې توطیعې په نتیجه کې سلب صلاحیت شوی، هغه څه چې شریف او واشنګټن دواړه ېې ردوي. خان دغه ادعاوې له کومو شواهدو پرته کوي.
زیاته شوې چې تېره ورځ د اسلام آباد تر څنګ، په لاهور ښار کې هم د عمران خان پلویانو د خان کور ترڅنګ له پولیسو سره ښکیل شوي ول. تېره اوونۍ پولیس د عمران خان د نيولو په موخه د هغه کورته ورغلل چې د دوو پر له پسې ورځو له پاره د خان د پلویانو له مخالفت سره مخ شول.
عمران خان په ۱۹۸۲ کال د پاکستان د کریکټ د ملي لوبډلې کپتان سو. دغې لوبډلې د عمران خان په مشرۍ کي ۴۸ تېست لوبي وکړې چي پکښي ۱۴ يې وګټلې، ۸ يې وبايللې او نورې مساوي سوې.
انځور: Getty Images/AFP/S. Dupont
يوه ورځنۍ سيالۍ
عمران خان د کپتان په حيث په ۱۳۹ يوه ورځنيو کریکټ سياليو کي د پاکستان د ملي لوبډلې مشري وکړه. له دغو څخه يې ۷۷ وګټلې، ۵۷ يې بايللې او نوري بې پایلې پاتې سوې.
انځور: picture-alliance/dpa
تر ټولو بريالی کپتان
عمران خان د پاکستان د کریکټ د ملي لوبډلې تر ټولو بريالی کپتان ثابت سو. هغه زيات وختونه د هندي لوبغاړي او کپتان کاپيل ديو سره مقايسه کيده. دواړه لوبغاړي د کریکټ د لوبي آل راوندران تېر سوي دي.
انځور: picture-alliance/AP Photo/B.K. Bangash
د کرکټ نړيوال اتل
عمران خان د پاکستان د ملي لوبډلې غړی ؤ چي دغې لوبډلې په ۱۹۹۲ کال د کرکټ نړيواله سيالۍ وګټلې. له دې کبله هم په پاکستان کي د عمران خان محبوبيت زښت زيات سو.
انځور: picture-alliance/AP Photo
سياست ته راتګ
عمران خان په ۱۹۹۶ کال کې سياست ته داخل سو او د «پاکستان تحريک انصاف» په نوم ګوند يې جوړ کړ. د ۲۰۱۳ کال په ټاکنو کي د نوموړي ګوند پر دويم نمبر زياتي رايي په لاس راوړې.
انځور: Aamir QureshiAFP/Getty Images
شخصي ژوند
د عمران خان شخصي ژوند زيات وختونه د رسنيو د سرليکونو موضوع پاتې شوې. نوموړي د ۶۵ کلنۍ په عمر د دريم ځل له پاره واده وکړ. د دې څخه تر مخه هغه د يوې مشهورې بريتانوۍ او وروسته د ريحام خان په نوم تلويزيوني کوربه سره ودونه کړي ول او وروسته ورڅخه جلا سوی وو.
انځور: PIT
جدي پايلي
د عمران خان دويمي ماينې ريحام خان د هغه څخه د طلاق تر لاسه کولو وروسته د عمران خان په تړاو يو کتاب وليکه. په دغه کتاب کي پر عمران خان سختي نيوکي سوي او ورباندي جدي تورونه لګول سوي دي. د بېلګي په توګه دغې مېرمني تور لګولی چي يوازي هغه ښځينه سياستمداره د عمران خان په ګوند کي پرمختګ کوي چي د عمران سره نامشروع اړيکي وساتي.
انځور: Facebook/Imran Khan Official
پاکستانی دونلد ترمپ
زيات کسان پر عمران خان د پوپولستي يا عوامګرايي تور لګوي. يعني ورباندي دا تور لګوي چي د خلکو د پارولو او پکښي د خپل ځان د محبوب کولو له پاره هغه څه وايي چي د خلکو احساسات راوپاروي او دی ورڅخه ګټه پورته کړي. يو شمېر پر نوموړي د توندلاريتوب تورونه لګوي او دا چي ګواکي دی د بنسټپالانو سره اړيکي لري.
انځور: picture-alliance/AP Photo/B.K. Bangash
پر امريکا نیوکې
عمران خان د ترهګرۍ پر ضد د امريکا د متحده ايالاتو پر جګړې او پکښي د پاکستان پر ملګرتیا پوښتنې کوي. نوموړی دغه جګړه په پاکستان کي د زياتو ستونزو لامل بولي.
انځور: YouTube/PTI Scotland
د اختلاص ضد
عمران خان په پاکستان کي د اختلاس او اداري فساد ستونزه هميشه مطرح ساتلې ده. په زياته بيا عمران خان پر پخواني لومړي وزير نواز شريف د اختلاس او اداري فساد تورونه لګول.