د پاکستان د پوځ ویاند ډگر جنرال عاصم باجوه، د سه شنبې په ورځ ویلي دي چې د سپتمبر میاشتې پر دوهمه نېټه په پیښور کې پر یوې عیسوۍ مېشتي سیمي باندي د یرغل او د مردان د ځانمرگي برید په تړاو اووه کسه نیولي دي. په دغو پیښو کې ۱۳کسان ووژل شول.
اسوشیتد پرس خبري آژانس د باجوه، له قوله لیکلي دي چي دوی د سپتمبر میاشتې د دوهمې نیټې د بریدونو مسئوله شبکه ماته کړې ده. د هغه په خبره دغه بریدونه په افغانستان کې پلان شوي ول او په وینا یې کابل یې په دې هکله خبر کړی دی.
باجوه د نیول شوو کسانو هویت په ډاگه نه کړ، خو د پاکستاني طالبانو یوې ډلې هغه مهال د دغو بریدونو مسئولیت پر غاړه واخيست.
د سپتمبر میاشتې پر دوهمه نیټه پیښور ته څیرمه څلورو وسله والو کسانو پر یوه عیسوي مېشته سیمه (کرسچین کالوني) باندي یرغل وکړ او یو تن یې وواژه. هغه مهال پولیسو ویلي ول چې څلور سره برید کوونکي یې هم وژلي دي.
په همدغه نېټه د خیبر پښتونخوا بله سیمه مردان کې یوه ځانمرگي برید کوونکي په یوه محکمه کې پر ځان پوري تړلي چاودېدونکي مواد وچول او ۱۲ کسان يې ووژل.
افغان چارواکو تر اوسه پوري د پاکستان پوځ د دغي ادعا په اړه غبرگون ښوولی نه دی.
د افغانستان او پاکستان حکومتونو په وارو وار يو پر بل باندي ياغيانو ته د ځای ورکولو تورونه لگولي دي، خو دواړو اړخونو بيا يو د بل تورونه بيرته رد کړي دي.
نور مطالب
د کابل بریدونه د انځور په ژبه
تیره ورځ په کابل کې درې بریدونه وشول. لومړي دوه بریدونه د دفاع وزارت ته څیرمه وشول او دریم برید په شهر نو کې د پاملرنې موسسې مخې ته وشو او بیا له یاغیانو سره ۱۱ ساعته نښتې دوام وموند چې د درو برید کوونکو په وژلو ختم شو.
انځور: Reuters/M. Ismailد دوشنبې په ورځ په پلازمېنه کابل کې د افغانستان د دفاع وزارت ته څیرمه پر له پسې دوه بریدونه وشول، چې ملکي او امنیتي کسانو ته یې مرگ ژوبله واړوله.
د دفاع وزارت ته څیرمه له لومړۍ چاودنې وروسته چې خلک د قربانیانو مرستې ته ورغلل نو د رپوټونو له مخې یوه ځانمرگي برید کوونکي د خلکو په گڼه گوڼه کې ځان والوزاوه.
په دغو دواړو بریدونو کې د افغانستان د روغتیا وزارت په وینا د وژل شوو کسانو شمیر ۳۵ تنه لوړ شوی دی او نور شا او خوا ۱۰۳ تنه ټپیان دي.
د دوو پر له پسې ځانمرگي بریدونو وروسته امنیتي ځواکونو سیمه کلابند کړه او د نورو مشکوکو کسانو لټون یې پیل کړ.
د خبري آژانسونو د رپټونو له مخې په وژل شوو کسانو کې د افغان امنیتي ځواکونو د یوه جنرال په شمول نور څلور افسران هم شامل دي.
په کابل کې د دوشنبې د ورځې د ځانمرگي بریدونو پړه وسله والو طالبانو ومنله.
د دوشنبې په شپه د سیمې په وخت د شپې پر یوولسو بجو د کابل په شهر نو سیمه کې د خبري آژانسونه د رپوټونو له مخې د پاملرنې، خیریه موسسې مخې ته لومړی موټر بم چاودنه رامنځ ته شوه او تر هغې وروسته درې برید کوونکو په دغه ودانۍ کې ځان پټ کړ.
د افغانستان د کورنیو چارو وزارت ویاند صدیق صدیقي، د سه شنبې په ورځ رسنیو ته وویل چې له برید کوونکو سره تر یوولس ساعته جگړې وروسته درې سره برید گر وژل شوي او برید پای ته ورسید.
پر بهرنۍ موسسې باندې د یرغل په پایله کې د چارواکو په وینا یو تن وژل شوی او نور شپږ تنه ټپیانه شوي دي. د صدیق صدیقي په خبره د د لسو بهرنیانو په شمول ۴۲ تنه ژغور شوي دي. د افغانستان ولسمشر محمد اشرف غني او اجرائیه ریئس عبدالله عبدالله دغه بریدونه په کلکه غندلي دي.
