داوطلبه کسان له مهاجرو سره د سرپناهوو په انتقال کي مرسته کوي. مخکي تر دې چارواکو له مهاجرو غوښتي ول چي د حایلي سیمي د رامنځته کولو له پاره ځای خالي کړي. دغه سیمه به د يورو تونل له خوا هغه لار بنده کړي چی ډېر مهاجر غواړي له هغه ځايه ځانونه بريتانيا ته ورسوي. یو داوطلب کس وايي چي موږ د کډوالو ملاتړ کوو، څو حیثیت یې وساتل سي.

د يورو تونل ته نژدې ولاړي خیمې. له دغه ځايه په وارو وار مهاجر هڅه کوي نقلیه وسایلو ته ځانونه واچوي او بریتانيا ته ورسیږي. پولیس په هر صورت هڅه کوي چي د هغو مخه ونیسی. یو ځوان سوریايي وايي چي اول پلان مي دا دی چی د یوې لارۍ په واسطه ځان بريتانيا ته ورسوم. دوهم پلان د ریل له لاري او دریم پلان مي د بیړۍ په واسطه د اوبو له لاري دی.

د تیري پنجشنبې په ورځ د حایل زون جوړولو کار پیل سو. دا چي څه وخت به د مهاجرو پاته سرپناوي په بشپړه ډول انتقالیږي، تر اوس لا معلومه نه ده. خو مهاجر باید په هر صورت له دې ځايه ولاړ سي. هغوی د داوطلبه کسانو په مرستو تر سلو زیاتي سرپناوي انتقال کړي دي. نورې ۴۰ غیر رسمي سرپناوي هم وراضافه سوي دي.

له کاله کمپ څخه د ملاتړي سازمان غړي هڅه کوي چی د خیمو د درولو له پاره نوې ساحه د وچو وښو او کثافاتو څخه پاکه کړي. د روټ بوگیوت په نامه یوه داوطلبه وايي، کله چي ما په افغانستان کی ژوند کاوه نو د هغو ډیره مېلمه پالنه می ولیدله، اوس غواړم چي د هغې یو څه عوض ورکړم.

د ۱۵۰۰ او ۴۵۰۰ تنو ترمنځ مهاجر د انتقال له خطر سره مخامخ دي. ځیني بیا يوازي انتظار باسي. د سیف الله برات په نامه یو افغان وايي چي زه به خپله سرپناه بل ځای ته انتقال نه کړم. هغه چي له څلورو میاشتو راهیسي د کاله په کمپ کي اوسیږي، زیاتوي، که پولیس ما دې کار ته مجبور کړي زه به یې مخنیوی ونه کړم.

چارواکي غواړي کاله ته نژدې یو بل کمپ هم جوړ کړي. د کانتینرونو په دغه کلي کي به ۲۰۰۰ کسان ځای پر ځای سي. ډیر مهاجر نه غواړي چي هلته ورسي، ځکه مخکي تر هغه باید د خپلو گوتو نخښي ورکړي. د دوی په نظر، هغوی ښايي په دې ډول په فرانسه کي پاته کیدو ته مجبوره سي او د خپلي خوښي هیواد بریتانیا ته ولاړ نه سي.

یو سوریايي وايي چي موږ وینو چي «فرانسویان زموږ سره څه ډول چلند کوي، هغوی موږ احمقان بولي او فکر کوي چی موږ دې ته آماده یو چي د خپلو گوتو نخښې ورکړو. دغه ځای یوه زندان ته ورته دی کله چي یو وار ورداخل سو بیا به مو پرې نه ږدی چي دباندي ولاړ سو. زه په هیڅ ډول نه غواړم په دې هیواد کي پاته سم.

د سرپناو د انتقال خبر او د پولیسو ډېرښت د دې سبب سوی دی چي د کاله په کمپ کي تشدد زیات سي. دغه خبره لږ تر لږه د «بې سرحده ډاکټرانو » په نامه سازمان کوي. ځکه چي د کمپ د اوسیدونکو او پولیسو ترمنځ په اخ و ډب کي ځیني خلک ټپیان کیږي او په دې ترڅ کي د نوموړي سازمان کارکوونکي مجبوره وي چي په وارو وار سره هلته حاضر سي، څو د هغوی درملنه وکړي.

د «بې سرحده ډاکټرانو » په نامه سازمان غړی ماود - لېکوانتریس وايي چي د دغه ځای د اوسیدونکو په حواله فرانسه غواړي چي نوموړی کمپ کوچنی کړي. له همدې کبله مهاجر په نورو ځایو کي غیر رسمي خیمې دروي. د هغه په حواله له دې کمپ څخه ۱۲۰ تنه حتی بلجیم ته تللي، څو هلته ځانونه ځای پر ځای کړي. د کوانتریس په نظر، په دې ډول به یوازي مشکل بل ځای ته انتقال سي.