چین او روسيه غواړي روانه اونۍ د روسيې په سويل کې ګډ پوځي تمرينات ترسره کوي. دغه خبره د چین دفاع وزارت د پنجشنبې په ورځ (د سپتمبر ۱۰مه) په یوه خبرپاڼه کې کړې ده.
انځور: picture-alliance/dpa/Tass/A. Yereshko
اعلان
له بيجنګ څخه د اسوشتيد پريس خبري آژانس په حواله، د «قفقاز ۲۰۲۰» په نوم د چین او روسیې په راتلونکو ګډو پوځي تمريناتو کې، د پاکستان، ايران، میانمار، ارمنستان، سپينې روسیه یا بلاروس او يو شمير نورو هیوادونه عسکر هم ګډون کوي.
دغه آژانس د چين د دفاع وزرات له قوله ليکي چې چين به خپل نقليه وسايط او سپکې وسلې په خپلو تر ټولو عصري ترانسپورټي الوتکو کې د تمریناتو ځای ته انتقال کړي.
د چين دفاع وزارت ويلي چې دغه تمرینات به د سپتمبر له ۲۱مې تر ۲۶ پورې ترسره ادامه ولري چې تمرکز به يې پر دفاعي تکتيکونو، محاصرې او د جګړې د ميدان پر کنټرول باندې وي.
چينايي وزارت زياته کړې په داسې يو حساس وخت کې چې ټوله نړۍ د کرونا وبا پر وړاندې مبارزه کوي،«دغه تمرینات د چین او روسيې د مناسباتو له پاره يوه ځانکړې معنی لري.»
چين رپوټ ورکړی چې د تيرو اوونيو په ترڅ کې د هيواد دننه يې د کرونا هيڅ مثبته پيښه نه ده ثبت شوې، په داسې حال کې چې روسیه کې تر اوسه د کرونا له يو ميليون ډيرې مثبتې پيښې ثبت شوي او دغه لړۍ لا هم ادامه لري.
له دوو لسیزو راهیسې چې د چين او روسيې تر منځ يو «جامع ستراتيژۍ اتحاد» رامنځ شوی، دواړو هیوادونو په پراخه کچه امریکا سره د مبارزه په موخه، خپلې پوځي او ديپلوماتيکې اړيکې ډيرې نژدې کړي دي.
چین او روسیه معمولا خپل پوځي تمرينات په ګډه ترسره کوي او د ملګرو ملتونو په سازمان کې هم د سوريې او شمالي کوريا په څير نړيوالو موضوعاتو کې له یو بل څخه ملاتړ کوي.
آژانسونه/م.ک.ص./ب.ص.
د پوځي ځواک پر موضوع زموږ له آرشيف څخه يو انځوريز البوم.
په پیکینگ کې ستر پوځي رسم گذشت
چین په دوهمه نړیواله جگړه کې د جاپان د تسلمیدو ۷۰ مه کلیزه د عصري وسلو او ۱۲۰۰۰ عسکرو له رسم گذشت سره ولمانځله. د چین ولسمشر شي جین پینگ خپل قوت په بهر او دننه کې وښود.
انځور: Reuters/D. Sagolj
د جگړې د ختمیدو ۷۰ کاله وروسته د چین مشرتابه غواړي چې د بریا له دې رسم گذشت سره د خپل هیواد په دننه کې وطنپالنه ولمسوي. شا او خوا ۵۰۰ زغروال موټرې «د تل پاتې سولې جادې» څخه تیرې شو. د رسم گذشت له پاسه ۲۰۰ الوتکو الوتنې کولې. د دغو وسلو ۸۰ سلنه تر دې مخکې نه وې ښوول شوې، چې پکښې د اتومي سرگولو لیږدونکي توغندي هم شته.
انځور: Reuters/J. Lee
د ۱۷ هیوادونو لکه روسیې، کیوبا، قزاقستان، مکسیکو، پاکستان او صربستان ۱۰۰۰ عسکر هم په دغه پوځي پریډ کې ونډه لري. دغه رسمي گذشت د چین آسیايي گاونډيان ډیر په دقت سره تعقیبوي. چین له خپلو گاونډیو سره د ختیځ او سویلي چین په سمندرگې کې د ټاپو گانو د ملکیت پر سر شخړه لري.
انځور: Reuters/China Daily
د دغه رسم گذشت پر مهال د چین په پلازمینه پیکینگ کې اضطراري حالت واکمن وو. د دې له پاره چې دود او دوړې چې معمول تل د پیکینگ آسمان تیاره کوي، د عسکرو پرسر ځلانده لمر او شین آسمان تت نه کړي، په پیکینگ او د هغې په گاونډیو سیمو کې د اگست میاشتې له نیمایي څخه را په دی خوا تر لسو زرو زیاتې فابریکو باید خپل تولیدات درولی وی. په پلازمینه کې تر نیمایي زیاتې موټرې له سړکونو غاړې ته کړی شوي دي.
انځور: Reuters/Xinhua/Pang Xinglei
په زرونو داو طلب کسان د سړکونو پر سر د نظم برابرولو په هڅه کې وو. په عادي توگه د سپتمبر د میاشتې په لومړۍ نیټه د ښوونځیو پیلیدل ځنډول شوي دي.
انځور: picture-alliance/AP Photo/M. Schiefelbein
په افتخاري میلمنو کې د روسیې ولسمشر پوتین او سویلي کوریا ولسمشره پارک گیون های شامله ده. د ډیر شمیر هیوادونو مشرانو په دغه مراسمو کې له گډون کولو ډډه وکړه. آلمان او امریکا متحدو ایالاتو خپل سفیران ورواستول. د اروپایي ټولنې له مخکښو سیاستوالو څخه په دغو مراسمو کې یوازینې گډونوال د چک ولسمشر وو. د نورو میلمنو په ډله کې د آلمان پخوانی صدراعظم گیرهارد شرودر وو. هغه پیکینگ ته په غیر رسمي توگه سفر کړی.
انځور: Imago/Xinhua
د جاپان لومړي وزیر شینز آبې پیکینگ ته خپل سفر لغوه کړ او د سپتمبر میاشتې په لومړیو کې یې چین ته سفر وځنډاوه. جاپاني رسنۍ داسې شک کوي چې ښایي چین ته د سفر ځنډول له دغه پوځي رسم گذشت سره تړاو ولري. خو د جاپان پخواني لومړي وزیر تومیچي مرایاما، په غیر رسمي توگه سفر کړی دی.
انځور: Reuters/D. Sagolj
دا چې پر دغه ستر پوځي رسم گذشت به څومره لگښت راغلي وي، معلومه نه ده. د چین د دفاع وزارت یوه ویاند نه غوښتل په دې هکله معلومات ورکړي. خو هغې دې ته اشاره وکړه چې د مراسمو تنظیمونکو د مالیې له پیسو سره د لگښت په برخه کې ډیر مناسب چلن کړی.
