د آلمان خبري آژانس د دوشنبې په ورځ د چين د بهرنیو چارو وزارت د وياندې مائو نینګ، له قوله خبر ورکړ چې د دغه هېواد ولسمشر شي جین پینګ، په هندوستان کې د «جي۲۰» غړو هېوادونو په غونډه کې د ګډون له پاره نوي ډيلي ته نه ځي.

د فرانسې خبري آژانس بيا د چین د بهرنيو چارو وزارت د ویاندې له قوله لیکلي دي چې په پام کې ده په دغه غونډه کې د چينايي پلاوي مشري د چين صدراعظم لي کیانګ، وکړي.

 رويټرز خبري آژانس بیا ليکلي چې دمریکا متحده ایالاتو ولسشمر، جو بایدن، د يکشنبې په ورځ وويل چې هغه دې نهیلي کړی چې شي دغې غونډې ته نه ورځي. بايدن په دې هکله نور جزئيات ور نه کړل خو وې ويل چې هغه هېله لري چې له شي سره وګوري. بایدن او شي تر دې مخکې په نومبر میاشت کې په اندونیزیا کې د جي۲۰ سرمشریزې په څنډه کې سره ليدلي وو.

مائو نینګ په یوه اعلاميه  کې ويلي: «د هندوستان جمهوري حکومت د بلنې پر اساس، د دولتي شورا لومړی وزير لي کیانګ، نوي ډيلي ته سفر کوي او د دغې مياشتې په نهمه او لسمه د جي ۲۰ په اتلسمه سرمشریزه کې ګډون کوي.»

هند او چین دوه ګاونډي هېوادونه دي چې له لسيزو راهیسې په خپلو کې ګوډې ماتې سیاسي او امنیتي اړيکې لري. د ديپلوماتيکو اړيکو د خرابوالي یو دليل د دواړو هېوادونو تر منځ سرحدي شخړه ده.

هندوستان د دغې غونډې له پاره چمتووالی نیسي او د نوی ډيلی بڼه په شدت سره د بدلون په حال کې ده. هندي چارواکو په سلونو زره ډالر لګولي، څو د دغه هېواد سیاسي پلازمينه د «جي۲۰» مشرانو د کوربتوب له پاره اماده کړي.

د جي۲۰ ډله د دولتو تر منځ جوړه یوه مجمع ده چې غړي ېې اروپايي اتحادېه او ۱۹ هېوادونه دي. دغه ډله نړېوال اقتصاد اړوند لويو مسایلو، لکه نړېوال مالي ثبات، اقلیمي بدلون د ناوړه اغیزو د کمښت او د تل پاتې پراختیا په څېر مواردو کې کار کوي.