د فرانسې خبري اژانس د يوه خبريال په حواله، رای ورکوونکي په يوه مکتب کې تر چاودنې وروسته تېښتې ته اړ شول. هغوی غوښتل چې په دغه مکتب کې خپله رايه ورکړي.

عيني شاهدانو او يوه چارواکي همداراز ويلي دي چې په نورو انتخاباتي مرکزونو کې هم چاودنې رامنځ ته شوې دي.

يوه سړي د فرانسې خبري اژانس ته ويلي دي چې غوښتل يې رايه ورکړي، خو تر چاودنې وروسته بايد تښتېدلی وای څو خپل ژوند وژغوري.

د فرانسې خبري آژانس په خپل رپوټ کې لیکلي دي چې چاودونو مرګ ژوبله رامنځ ته کړې ده. نوموړي خبري آژانس د روغتیا وزارت د سرپرست ویاند محب الله زیر، له قوله لیکلي دي چې لږ تر لږه درې تنه وژل شوي او نور ۳۰ تنه ټپیان دي.

د هغه په خبره ډېر ټپيان يې هم وليدل چې نورو ځايونو ته به انتقال کېدل. د کورنيو چارو د وزارت وياند، نصرت رحيمي، ټاکنيزو مرکزونو ته څېرمه د دوو نورو چاودنو پخلی هم کړی دی، خو ويلي دي چې تلفات يې نه دي اړولي. يوه بل چارواکي بيا ويلي دي چې چاودنو «مرګژوبله»هم اړولې ده.