د سه شنبې په ورځ په سلونو افغانان په کابل کې د پاکستان سفارت مخې ته لاریون وکړ. د هغوی په خبره دوی د افغانستان په چارو کې د «پاکستان مداخله» غندي. د فرانسې خبري آژانس د رپوټ له مخې طالبانو د خلکو د پاشلو له پاره فیرونه وکړل. د دغو لاریونونو زیاتره ګډونوال ښځې وې.

د دغو اعتراضونو په دوام، د چهارشنبې په ورځ د کابل په لویدیځه برخه کې یو شمیر ښځې سړکونو ته راووتې او د طالبانو په سرپرسته کابینه کې د ښځو پر نه ګډون یې انتقاد وکړ. هغوی په خپلو شعارونو کې پر نړیوالې ټولنې هم انتقاد وکړ: «نړۍ څومره بې رحمانه زموږ تماشا کوي».

په دغو احتجاجونو کې د ښځو د پراخ حضور دلیل دا دی چې دغه قشر د نورو په پرتله د خپلو حقوقو له لاسه ورکولو په هکله اندېښمن دي. د دوشنبې په ماښام د هرات، کابل او مزار شریف په ښارونو کې هم لاریونونه شوي وو. په دغو لاریونونو کې هم زیاتره ښځو ونډه درلوده.

مظاهره کوونکو له نورو ښځو هم وغوښتل چې و نه ډار شي او د ښځو د حقوقو د ساتلو له پاره خپل غږ پورته کړي. د لاریون له ګډونوالو څخه یوې وویل: «موږ په سترو حکومتي پریکړو کې د ګډون او په ټولنه، سیاست او اقتصاد کې د فعالیت غوښتونکي یوو.»

تر اوسه طالبانو د ښځو د حقوقو په هکله خپل رسمي سیاست نه دی اعلان کړی او یوازې یې ویلي دي چې ښځې «د اسلامي شریعت په چوکاټ» کې کولی شي کار او تحصیل وکړي. ښځې د ټولنې د نورو قشرونو په پرته د طالبانو له حاکمیته ویره لري او اندېښمنې دي چې د زده کړو د فرصت، کار او حقوقي لاس ته راوړنې به یې له منځه ولاړې شي.

د مقاومت جبهې مشر احمد مسعود، له لوري په یوه غږیز پیغام کې د عمومي پاڅون، د غوښتنې وروسته یو شمیر ښځې او نارینه سړکونو ته راووتل او د آزادۍ شعارونه یې ورکول. په همدې ترڅ کې د اعتراض کوونکو د شمیر په زیاتیدو او وخت په تیریدو سره د احتجاج کوونکو پر وړاندې د طالبانو غبرګون هم تند شو.

تیره ورځ یو شمیر رسنیو خبر وکرړ چې خبریالان یې دغو لاریونونو ته د پوښښ ورکولو پر مهال د طالبانو له لوري نیول شوي دي. طالبانو ویلي دي چې هغه کسان چې د سوله ایزو لاریونونو ترسره کیدل غواړي، باید لومړی له چارواکو اجازه واخلي.

اعتراض کوونکي په دې باور دي چې طالبان د پاکستان په مرسته د افغانستان په ولکه کولو وتوانیدل، له دې کبله زیاتره شعارونه د پاکستان ضد ول. د پاکستان ضد احساسات هغه وخت لا پسې زیات شول چې د پاکستان د استخباراتي ادارې مشر په یوه ناببره سفر کابل ته ورسید.

د دغو لاریونونو اعتراضونه سره توپیر لري. په داسې حال کې چې ځینو لاریون کوونکو د «پاکستان د لاسوهنې» د دریدو غوښتنه کوله، په نورو لاریوونو کې د آزادۍ، حقوقو او د ښځو لاس ته راوړنې شعارونه برجسته ول.