ولسمشر فرانسوا اولاند څو ورځي تر مخه کلک هوډ څرګند کړی ؤ چي په «ځنګل» د مشهوره کمپ د تړلو له پاره به اقدام وکړي. د فرانسې په کالې يا کاله سيمه کي واقع دغه کمپ يو غېر رسمي کمپ دی چيري چي هغه مهاجر چي غواړي له فرانسې انګلستان ته واوړي په خيمو کي شپې او ورځي تېروي.
خو د شنبې په ورځ په کالې کي د مهاجرو په ملاتړ هغه احتجاج چي ورته رسمي اجازه نه وه ورکول سوې، په تاوتريخوالی واوښت. پوليسو په کالې کي د احتجاج کوونکو فعالينو او احتجاج کوونکو په وړاندي اوښکي بهېوونکی ګاز او اوبه پاشونکي موټر وکارول. دا په داسي حال کي چی احتجاج کوونکو پر پوليسو ډبري غورځولې.
د پوليسو په وينا په درې ساعته اخ و ډب کي درې پوليس چارواکي معمولي ژوبل سوي دي. د پوليسو صنفي اتحاديې بيا ويلي چي لس پوليس ژوبل سوي دي. زياته سوې چي له ژوبل سوو څخه يو پوليس چارواکی و روغتونه ته لېږدول سوی دی. پوليسو ويلي چي احتجاج کوونکو يې و ۷ موټرو ته هم زيان اړولی دی. د فرانس پريس يو عکاس ژورنالست هم د ډبري لګېدنې له کبله ژوبل سوی دی.
دغه احتجاج په داسي حال کي په تاوتريخوالي اوښتی چي درې ورځي تر مخه پوليسو د دغه احتجاج ممانعت کړی ؤ. د رسنيو د خبرونو له مخي د پوليسو له خوا و احتجاج ته د اجازه نه ورکولو دغه پرېکړه د جمعې په ورځ د يوې محکمې له خوا هم تائيد سوه. يو ځايي چارواکي ويلي چي تقريبا له ۲۰۰ احتجاج کوونکو څخه يو شمېر يې بريتانويان او د «پوله نه منونکو فعالينو» څخه ول. ويل سوي چي په احتجاج کي يو شمېر مهاجر هم برخه وال ول.
سرويس موټرونه بېرته وګرځېدل
د دې څخه تر مخه پوليسو دوه سرويس موټرونه چي پکښي تقريبا د مهاجرو ۲۰۰ ملاتړي سپاره ول، د کالې څخه ۴۰ کلومتره مخکي ودرول او دغه سرويسونه بېرته وګرځېدل. د سرويس موټر سپرلي و کالې ته روان ول چي په احتجاج کي برخه واخلي او د مهاجرو سره خپل پېوستون وښيي.
د فرانسې ولسمشر فرانسوا اولاند د دوشنبې په ورځ (د ۲۰۱۶ کال د سپتمبر ۲۶مه نېټه) و کالې ته ورغلی ؤ. نوموړي هلته اعلان کړی ؤ چي د کال تر پای پوري به د «ځنګل» کمپ په بشپړه توګه خالي کړل سي. اولاند پر بريتانيې ږغ کړی ؤ چي له خپل اړخه د کمپ د تقريبا ۷۰۰۰ او ۱۰۰۰۰ مهاجرو له پاره خپل مسؤليت ومني. د هغه په وينا دغه مهاجر بايد بل چيري مېشت کړل سي.
بشر ته ناوړه شرايط
هغه مهاجر چي د کالې په «ځنګلي کمپ» کي اوسيږي پکښي زيات شمېر يې کم سنه او بې سرپرسته ځوانان دي. دغه مهاجر په پخپله جوړو کړل سوو وړو کږديو ته ورته جوړښتونو کي په انتهايي خرابو حالاتو او شرايطو کي ژوند کوي. هغوی نه د روانې اوبه، نه برق او نه هم توشنابونه لري. هغوی غواړي چي د تر مځکي لاندي تونل په مرسته له فرانسې څخه و انګلستان ته واوړي. خو په دغو هڅو کي بعضي وختونه مهاجر ژوبل کيږي او مړه کيږي.
چارواکي په دوامداره توګه مهاجر له کمپ څخه شړي، خو هغوی بېرته راسي. تقريبا ۲۰۰۰ پوليس چارواکي د دې په مخنيوي مؤظف دي چي دغه مهاجر په پټه په لويو موټرونو کي ځان پټ کړي او له فرانسې څخه و انګلستان ته واوړي.
د کاله په کمپ کي د مهاجرو حالت
د کاله په نامه مهاجرو کمپ کي عصبانیت وار په وار زیاتیږی. د فرانسې حکومت غواړي د نوموړي کمپ او یورو تونل ترمنځ چي بريتانيا ته ځي، یوه حایله سیمه جوړه کړي، خو کډوال د دغه کار په مقابل کي خپل مقاومت ښيي.
انځور: DW/D. Cupolo
تر جبري انتقالولو مخکي
داوطلبه کسان له مهاجرو سره د سرپناهوو په انتقال کي مرسته کوي. مخکي تر دې چارواکو له مهاجرو غوښتي ول چي د حایلي سیمي د رامنځته کولو له پاره ځای خالي کړي. دغه سیمه به د يورو تونل له خوا هغه لار بنده کړي چی ډېر مهاجر غواړي له هغه ځايه ځانونه بريتانيا ته ورسوي. یو داوطلب کس وايي چي موږ د کډوالو ملاتړ کوو، څو حیثیت یې وساتل سي.
انځور: DW/D. Cupolo
د اوبو لار او نور امکانات
د يورو تونل ته نژدې ولاړي خیمې. له دغه ځايه په وارو وار مهاجر هڅه کوي نقلیه وسایلو ته ځانونه واچوي او بریتانيا ته ورسیږي. پولیس په هر صورت هڅه کوي چي د هغو مخه ونیسی. یو ځوان سوریايي وايي چي اول پلان مي دا دی چی د یوې لارۍ په واسطه ځان بريتانيا ته ورسوم. دوهم پلان د ریل له لاري او دریم پلان مي د بیړۍ په واسطه د اوبو له لاري دی.
انځور: DW/D. Cupolo
په عاجل ډول د ځان ژغورنه
د تیري پنجشنبې په ورځ د حایل زون جوړولو کار پیل سو. دا چي څه وخت به د مهاجرو پاته سرپناوي په بشپړه ډول انتقالیږي، تر اوس لا معلومه نه ده. خو مهاجر باید په هر صورت له دې ځايه ولاړ سي. هغوی د داوطلبه کسانو په مرستو تر سلو زیاتي سرپناوي انتقال کړي دي. نورې ۴۰ غیر رسمي سرپناوي هم وراضافه سوي دي.
انځور: DW/D. Cupolo
د نورو خیمو له پاره نوی ځای
له کاله کمپ څخه د ملاتړي سازمان غړي هڅه کوي چی د خیمو د درولو له پاره نوې ساحه د وچو وښو او کثافاتو څخه پاکه کړي. د روټ بوگیوت په نامه یوه داوطلبه وايي، کله چي ما په افغانستان کی ژوند کاوه نو د هغو ډیره مېلمه پالنه می ولیدله، اوس غواړم چي د هغې یو څه عوض ورکړم.
انځور: DW/D. Cupolo
د نامعلومي ورځي په تمه
د ۱۵۰۰ او ۴۵۰۰ تنو ترمنځ مهاجر د انتقال له خطر سره مخامخ دي. ځیني بیا يوازي انتظار باسي. د سیف الله برات په نامه یو افغان وايي چي زه به خپله سرپناه بل ځای ته انتقال نه کړم. هغه چي له څلورو میاشتو راهیسي د کاله په کمپ کي اوسیږي، زیاتوي، که پولیس ما دې کار ته مجبور کړي زه به یې مخنیوی ونه کړم.
انځور: DW/D. Cupolo
د گوتو لگول؟ نه مننه!
چارواکي غواړي کاله ته نژدې یو بل کمپ هم جوړ کړي. د کانتینرونو په دغه کلي کي به ۲۰۰۰ کسان ځای پر ځای سي. ډیر مهاجر نه غواړي چي هلته ورسي، ځکه مخکي تر هغه باید د خپلو گوتو نخښي ورکړي. د دوی په نظر، هغوی ښايي په دې ډول په فرانسه کي پاته کیدو ته مجبوره سي او د خپلي خوښي هیواد بریتانیا ته ولاړ نه سي.
