د جرمني د فرانکفورت نړيوال هوايي ډگر پوليسو ويلي دي چي د سه شنبې په ورځ ۱۹ مهاجر په يوه الوتکه کي اسلام آباد ته اخراج سول. د جرمني فدرالي پوليسو «زود دويچه څايتونگ» ورځپاڼي ته د پنجشنبې په ورځ ويلي دي چي اخراج سوي کسان د پاکستان وگړي ول.
د پوليسو په خبره په دغه الوتکه کي چي له يونان څخه يې پرواز کړی وو، لس نور مهاجر هم سپاره ول چي له يونان څخه اخراج سوي ول. د مهاجرو ملاتړو سازمانونو پر دغه کار باندي نيوکه کړې او ويلي يې دي چي په دغسي يوه وخت کي بايد دغه شان اقدام نه وای سوئ.
د بايرن ايالت د کليسايي مهاجرو سازمان يوه کارکوونکي ستيفان ريچل ويلي دي چي آلمان د دغو اخراج سوو کسانو د روغتيا ضمانت نه سي کولای او په دې سره هغه پوليس چي دغه کسان تر پاکستانه پوري بدرگه کوي او دغه شان د الوتکي خدمه له خطر سره مخامخ کوي.
اړونده موضوع:د کرونا محدودیتونو تر لیرې کیدو وروسته د مهاجرو د اخراج اټکل
د جرمني په پارلمان کي زرغون گوند هم دغه عمل «غير مسئولانه» بللی. هغوی ويلي دي چي د کرونا وبا پرمهال د بشري حقونو معيارونه حکم کوي چي له ټول آلمان څخه بايد اخراجونه متوقف سي.
خو د جرمني د کورنيو چارو وزير هورست زيهوفر بيا د دغو اخراجونو هرکلی کړی دی او ويلي ئې دي چي ځينو ايالتونو په ستونزمنو حالاتو کي هم اخراجونه تيار کړي دي. هغه ويلي دي چي د هيواد مرکزي حکومت يې د ايالتونو د دغه کار ملاتړ کوي. هغه له مبدا هيوادونو څخه غواړي چي ور اخراج سوي مهاجر دوباره ومني.
زموږ له آرشيف څخه:
له آلمان څخه د افغانانو د اخراج پروسه ـ انځوريزه کرونولوژي
له آلمان څخه د افغان مهاجرو ډليز اخراجونه وروسته له هغې پيل شوه چې افغانستان د ۲۰۱۶ کال د اکتوبر میاشتې په سر کې د بروکسل په غونډه کې د مهاجرت پر موضوع د اروپايي اتحاديې سره يوې هوکړې ته ورسيد. انځور: Imago/J. Heinrich د ۲۰۱۶ کال د اکتوبر مياشتې په لمړيو کې د بروکسل په غونډه کې افغانستان له اروپايي اتحاديې سره د مهاجرت پر موضوع يوې هوکړې ته ورسيدل، د دغې هوکړې له مخې د اروپايي اتحاديې غړو هيوادونو څخه افغانستان ته د رد شويو افغان مهاجرو د اخراج اسانه کړل شو.
انځور: Picture alliance/Zumapress/J. K. McCann د بروکسل د توافق له مخې، افغانستان دې ته حاضر شو چې د اروپايي اتحاديې د غړو هيوادونو لخوا رد شوي افغان مهاجر ومني.
انځور: Reuters./F. Lenoir د بروکسل په غونډه کې افغانستان د اروپايي اتحاديې لخوا مالي ملاتړ ترلاسه کړ، خو د بشر حقونو سازمانو پر دغې اتحاديې نيوکې وکړې چې دغه ملاتړ نبايد د مهاجرو له اخراج سره تړلي وي.
انځور: Reuters/F. Lenoir تر هوکړې وروسته د آلمان په مختلفو ښارونو کې د افغان مهاجرو د اخراج پر ضد ډیرې مظاهرې وشوي. افغان مهاجر او د هغو بهرني ملاتړي وايي چې افغانستان امن ندی.
انځور: E. Hadid آلمان څخه کابل ته د افغان مهاجرو لمړنی ډليز اخراج د ۲۰۱۶ کال په سپټامبر مياشت کې ترسره شو. په دغه پرواز کې ۳۸ تنه ردشوي افغان مهاجر کابل ته بيرته وليږدول شول.
انځور: Picture-Alliance/AP Photos/M. Hossaini آلمان څخه د رد شويو افغان مهاجرو دويم ډليز اخراج د ۲۰۱۷ کال په جنورۍ مياشت کې ترسره شو. په دا ځل پرواز کې ۲۶ تنه افغانان کابل ته اخراج شول.
انځور: Reuters/R. Orlowski که له ېوې خوا ډليز اخراجونه ترسره کيږي ورسره جوخت په ټول آلمان کې افغانانو ته دا حق ورکول کيږي چې د افغان مهاجرو د اخراج په ضد مظاهرې وکړي. په مظاهره کې يوازې افغانان نه بلکه آلمانان هم برخه اخلي. انځور په هامبورک ښار کې د مظاهرې يوه برخه.
انځور: DW/B. Rasin آلمان څخه د افغان رد شويو مهاجرو دريم ډليز اخراج د ۲۰۱۷ کال په فبرورۍ مياشت کې ترسره شو. په دې پرواز کې ۱۸ تنه افغانان کابل ته اخراج کړل شول.
انځور: picture-alliance/dpa/M. Jawad آلمان کې د مهاجرو ملاتړ کونکو او بشري سازمانونو په وار وار د افغان مهاجرو د اخراج ضد مظاهرو کې د افغانانو تر څنګ خپل اواز اوچت کړی دی. د آلمان ځيني ګوندونو هم د افغان مهاجرو له اخراج سره مخالفتونه ښکاره کړي دي. د بيلګې په توګه د ۲۰۱۷ کال په اپريل کې د آلمان د شلزويګ هولشتاين ايالت صدراعظم تروستن البیک د رد شويو افغان مهاجرو د اخراج بهير د درولو غوښتونکی شو.
انځور: picture-alliance/ZUMAPRESS.com/O. Messinger اخراج شوي مهاجر او راتلونکې افغانستان ته اخراج شوي افغان مهاجر ناهيلي ښکاره کوي. نور ايم رحمن له آلمان څخه په څلور پرواز کې کابل ته اخراج شو. د رحمن په څير اخراج شويو افغان مهاجرو لپاره تر ټولو ناهيلې کونکې خبره دا ده چې زيات وخت يې بې ګټي تير شوی دی. دوی له پاره په افغانستان کې له سره د نوی ژوند پيلول ګران کار بريښي.
انځور: Sirat آلمان څخه کابل ته د ردشويو افغان مهاجرو څلورم ډليز اخراج د ۲۰۱۷ کال په مارچ مياشت کې ترسره شو. په دغه ځل ۱۵ تنه افغانان اخراج شول.
انځور: picture-alliance/dap/M. Jawad په کابل ښار کې د آلمان سفارت مخته د می مياشتې په ۳۱ نيټه د موټر بم ستره چاودنه وشوه. په دغې چاودنه کې شاوخوا ۱۵۰ تنه ووژل شول. د آلمان سفارت ودانۍ هم سخته زيانمنه شوه. آلمان دا ځل د افغانانو پنځم ډليز اخراج وځنډاوه.
انځور: picture-alliance/dpa/C. Bruna کابل کې د ۲۰۱۷ کال د می مياشتې د ۳۱ مې بريد وروسته آلمان افغانستان ته د افغان مهاجرو اخراج د نامعلوم وخت لپاره ودراوه. دغه هيواد وپتيله چې د افغانستان د امنيتي وضعيت په اړه له سره کتنه وکړي. د مي ۳۱ بريد د آلمان سفارت مخته شوی وو چې دغه سفارت په کې سخت زيانمن شو.
انځور: Getty Images/AFP/S. Marai تر درو مياشتو ځنډ وروسته د اخراج لړۍ بيا پيل د رد شويو افغان مهاجرو وروستي ډلييز اخراج د ۲۰۱۷ کال د سپټمبر په ۱۲ نيټه د دوسلدورف له هوايي ډګر څخه ترسره شو. په دغه پرواز کې لږ تر لږه ۱۲ تنه افغانان کابل ته اخراج کړل شول. دا له هغه وخته چې آلمان حکومت د افغان مهاجرو اخراج تر يو نامعلوم وخت پورې درولی وو، لمړی ډليیز اخراج دی چې له دغه هيواده ترسره کیږي.
انځور: picture-alliance/dpa/B. Thissen کابل ته رسيدلی یو نوی رد شوی افغان مهاجر. دغه ځوان د ۲۰۱۷ کال د سپټمبر په ۱۳ يعنې په وروستي پرواز کې افغانستان ته اخراج شوی دی.
انځور: Getty Images/AFP/W. Kohsar اخراج د رايو ترلاسه کولو لپاره د آلمان د مهاجرو له حقونو څخه د ملاتړ ادارې مشر ګهونتر بورکهارت د افغان مهاجرو د وروستي اخراج په اړه د آلمان حکومت پر اعلان سختې نيوکې وکړې. بورکهارت ویلي وو چې هغوی ځکه د انتخاباتو څخه يوازې څو ورځې د مخه دغه کار کوي تر څو وښيي چې د اخراج په مسئله کې جدي دي او په دې ترتيب رايي ترلاسه کړي. سرچينې: آژانسونه، انځورنه د دويچه ویله له آرشیف څخه
انځور: Imago/J. Heinrich
