په داسي حال کي چي په ځينو هيوادونو د کرونا ويروس له کبله رامنځه سوي محدوديتونه ليري سوي دي، د روغتيا نړيوال سازمان ويلي دي چي «کيدای سي کرونا هيڅکله هم ورکه نه سي». د کرونا د دوهمي څپې د راتگ اندېښنې پر ډيريدو دي.
انځور: picture-alliance/dpa/B. Thissen
اعلان
د نوي کرونا ويروس د خپريدو په پيل کي داسي برېښيدل چي تر ډيره وخته پوري به ژوند د تړلو دروازو ترشا روان وي، خو يو ناڅاپه حالت بدل سو او دروازې تر تمي دمخه خلاصي سولې او په جرمني، هسپانيا، يونان او نورو هيوادونو کي تر ټولو سخت محدوديتونه ليري کړل سول.
حتی بريتانيا لا چي د اروپا په کچه تر ټولو ډير کسان پکښې په کرونا اخته سوي او ډير مړه سوي دي، د «اقتصاد پر بيرته پرانيستلو» باندي فکر کوي.
هندوستان د رواني مياشتي په پيل کي په دغه هيواد کي رامنځته کړل سوي محدوديتونه دوې اوونۍ نور هم وغځول. خو اوس هغه انديښنې پر ډيريدو دي چي که هيوادونه د کرونا ويروس له کبله رامنځته سوي محدوديتونه تر وخت مخکي ليري کړي، کيدای سي د دغي وبا دوهمه دوره پر نړۍ باندي راوگرځي.
د روغتيا نړيوال سازمان د روغتيا په برخه کي د بيړنيو حالاتو پروگرام مشر مايک ريان ويلي دي چي له دوهمي څپې څخه که لږ وي که ډير ترې تېښته نه سته: «دغه ويروس کيدای سي زموږ د ټولني په يوه بل انديميک(تلپاتي گواښ) ويروس باندي بدل سي.» هغه په يوه ويډيويي کنفرانس کي وويل چي «کيدای سي دغه ويروس هيڅکله ورک نه سي».
ريان ويلي دي چي نورو ويروسونه لکه HI(د انسان د معافيت کمښت) ويروس پخپله نه دی ورک سوی، بلکي څيړونکي داسي درمل ورته جوړل کړل چي د دغه ويروس په مخکي دريږي او له ناروغۍ سره د سازش کولو له پاره ژوند ته زمينه برابروي. ډير لږ ويروسونه د بېلگې په توگه smallpox(کوچنۍ تڼاکي) يا چيچک په نوم ويروس له منځه تللی دی. نور ټول ويروسونه زموږ په بغل کي دي، چي ځيني ئې کله نا کبله بيرته راگرځېدلي دي، لکه د نري رنځ ناروغي.
همدا اوس په ځينو هيوادونو کي د کرونا ويروس د دوهمي څپې نخښني نښانې لیدل سوي دي: چين او روسيې د کرونا ويروس نوي پيښي ثبت کړي دي او په جنوبي کوريا کي چي د دغي وبا د لومړي څپې په مخنيوي کي ستايل سوې وه، د کرونا پيښي پکښې ثبت سوي دي.
د کرونا ويروس دوهمه لويه څپه به يووار بيا د ښارونو د تړلو او په ټولنيز ژوند کي د محدوديتونو سبب سي.
د روغتيا نړيوال سازمان د روغتيا په برخه کي د بېړنيو حالاتو پروگرام مشر مايک ريان ويلي دي چي «موږ هڅه کوو چي دقيقاً د دغسي حالت مخنيوی وکړو».
تر قرنطين وروسته خوشحالۍ په انځورونو کي
په دې انځوريز راپور کي به د نړۍ په بېلابېلو هيوادونو کي د کرونا ويروس له کبله محدوديتونه او تر قرنطين وروسته حالت وگورئ.
انځور: Reuters/K. Lamarque
تر قرنطين وروسته خوشحالۍ
دا چي د امریکا په ډيرو ايالتونه کي اوس هم د کرونا اوج دی، خو هلته بیا هم کوښښ کيږي چي د ټولنيزو محدوديتونو لمن لنډه کړي. د رويترز خبري آژانس دغه انځور ښيي چي د مريلند ايالت په اووشن سيتی ښار کي ماشومان څومره خوشحاله دي.
انځور: Reuters/K. Lamarque
له دستکشو سره عبادت
لبنان د کرونا ويروس د پراختيا د مخنيوي له پاره قوق العاده تدابير اعلان کړي چي د می مياشتي تر ۲۴ مي پوري اعتبار لري. د فرانسي خبري آژانس دغه انځور ښيي چي په بيروت کي د محمد امين په مسجد کي يو روحاني په روژې مياشتي کي له دستکشو سره عبادت کوي.
انځور: Getty Images/AFP/A. Amro
په خپل هيواد کي سفرونه
ډيری اروپايي هيوادونه خپلو وگړو ته لارښوونه کوي چي د کرونا ويروس له کبله نورو هيوادونو ته له سفر کولو څخه ډډه وکړي او د دوبي رخصتۍ پخپل هيواد کي تيري کړي. په انځور کي آلمانی ميړه او ماينه د خپل هيواد يوه ساحل ته تللي دي.
انځور: picture-alliance/dpa/S. Schuldt
د کرونا له ماسک سره رقص
دا په بانکوک کي د اروان شيران (Erawan Shiran) د معبد رقاصې دي. په دغه هيواد کي د کرونا وبا له کبله لگيدلو محدوديتونو تر لږولو وروسته بايد دغه رقصاې د فعاليت پرمهال ماسکونه واغوندي. خو د رقص پرمهال د فاصلې په پام کي نيول ستونزمن کار دی. دغه معبد په ټايلنډ کي هم د ځايي اوسيدونکو او هم د سيلانيانو له پاره ډير محبوبيت لري.
انځور: Getty Images/AFP /M. Antonov
ملخان، کرونا او محدوديتونه
کينيا هيواد اوس له څو بحرانونو سره لاس او گريوان دی: تيز بارانونه د رودونو د ډکيدو او سيلابونو سبب سوي؛ پر زراعت ئې ملخانو يرغل کړی او د کرونا ويروس له کبله رامنځته سوو محدوديتونو د دغه هيواد د اوسېدونکو ژوند تريخ کړی دی.
انځور: Reuters/T. Mukoya
د کرونا پرمهال پر گناه باندي اعتراف
پر گناهو باندي اعتراف پر کاتوليکانو باندي واجب دي. دغه شان مراسم معمولاً له نورو څخه پټ په يوې تنگي او تاريکي کوټه کي وي، خو د کرونا پرمهال اوس دغه کار بله بڼه اخيستې ده. دلته يو کشيش د فاصلې په رعايتولو سره د پنجرو تر شا اعتراف اخلي.
انځور: picture-alliance/PA Wire/N. Carson
د کرونا پرمهال د جماعت لمونځ
د پاکستان په لاهور ښار کي د جمعې لمونځ. د لاهور په ستر مسجد کي د فاصلې په مراعتولو سره د جمعې لمونځ کیږي.
انځور: Getty Images/AFP/A. Ali
په کور کي ژوبڼ
د نورو تفريحي اماکنو په شان پارکونه او ژوبڼونه هم د کرونا پر مهال رخصت دي. دا شايد د ژوبڼ د حيواناتو له پاره د آرامۍ فرصت وي. خو په توکيو کي د ابی شيناگاوا پارک مسئولانو د انلاين له پاره د حيواناتو ليدل ممکن کړي دي.
انځور: Reuters/I. Kato
د کرونا پر مهال اکرويوگا
د امريکا په فلوريدا ايالت کي د کرونا پرمهال د «اکرويوگا» ورزش. په دغه ايالت کي هم د کرونا له کبله تر څو اونيو محدوديتونو وروسته اوس پارکونه او د لوبو ځيني ځايونه پرانيستل سوي دي.
انځور: Getty Images/C. Hawkins
باران چيري دی؟
د کرونا بحران پرمهال څوک دې ته متوجه نه دی چي سږ کال په اپريل مياشت کي په مرکزي اروپا کي باران نه دی سوی. پايله ئې: ځنگلونه وچ او د يوې جدي وچکالۍ گواښ. دغه انځور د جرمني په لوېديځ کي د ايزرلون ځنگله دی.
انځور: Getty Images/AFP/I. Fassbender
په السالوادور کي زندانيان
د السالوادور جمهوررئيس بايب بوکل په تويتر کي داسي انځورونه خپاره کړي دي چي د کرونا پرمهال د دغه هيواد په محبسونو کي زندانيان ښيي چي بې له فاصلې يو په بل پوري نښتي ناست دي. دغو انځورونو د بشري حقونو مدافعين سخت لړزولي دي.
انځور: picture-alliance/dpa/Especial
روژه مات په کور کي
د سريلانکا په کولومبو کي معمولاً خلک روژه مات په مسجدونو کي کوي، خو د کورنا بحران له کبله ډير خلک دې ته اړ دي چي روژه ماتونه په خپلو کورونو کي وکړي. انځور د رويترز.
انځور: Reuters/D. Liyanawatte
په پلاستيکي کانا کي لامبو
د بوسنيا د لامبو اتله اوديچ د کرونا وبا پرمهال هم خپلو تمرينونو ته دوام ورکړی. د اپريل مياشتي پر ۲۳ نېټه اخيستل سوي انځور کي ښوول کيږي چي لامبو بازه په يوه پلاستيکي کمبره کانال کي چي په دوبوج ښار کي يې د خپل نيکه په باغ کي جوړ کړی دی، لامبو وهي.
انځور: Reuters/D. Ruvic
له کرونا سره د مبارزې ريکشا
يوه سړی په هند کي خپلي ريکشا ته د کرونا بڼه ورکړې ده. دي کار د دې له پاره چي څوک په دغه ريکشا کي سفر وکړي، ترې بيريږي او خلکو ته خبر ورکوي چي په خپلو کورونو کي پاته سئ.
انځور: Reuters/P. Ravikumar
د کرونا پرمهال سگريت څکول
سگريت د صحت له پاره تاوان لري. د جرمني په کرفلد ښار کي داسي ماسکونه جوړ سوي دي چي د کرونا ويروس پرمهال هغه څوک ترې کار واخيستلای سي چي سگريت څکوي.
انځور: AFP/I. Fassbender
تر موټر لاندي د ناکرارۍ خوب
د کرونا ويروس د پراختيا له وجي هر هغه څوک چي له خپلو ښارونو څخه نورو ته په غريبۍ پسې تللي ول هم هلته پاته دي. د هغوی ځيني ئې اوس پر سړکونو بيديږي او خپلو مينو ته د درگرځيدو شپې او ورځي سبا کوي، لکه په دغه انځور کي چي د ليما په پايتخت کي تر باري موټر لاندي بيده دي.
