دلته د عیسوي سپيڅلې اختر په وخت کې پاکه او سپرلنۍ هوا د «بيرګارتن» يا د بیرو پلورنځې، په آزاده هوا کې د قهوي سکلو پرانيستې رستورانتونه په عادې ډول له مشتريانو څخه ډک وي. دغه عکس کي د مونشن په ښار کې د بیرو ګارتن ښکاري چې له مشتریانو څخه خالي دی.

د رخصتيو په وخت کې د آلمان ډيری اوسیدونکي ختيځ او شمالې سواحلو ته روانیږې. اوس مهال دغه سواحل خالي دي. د قهوې سکلو او رستورانتونه تړل شوي او لارویان خپل یوازتیوب نندارې ته وړاندې کوی.

له لرګي څخه جوړ دغه بیوزله حیوان، یو مهال د ماشومانو بوختیا له پاره د لوبو وسیله وه. خو اوس دغه د لوبو ځای ته د ماشومانو ورتګ منع شوی دی. له دغه ځای او د لوبو له سامانونو څخه سپين پړې تاو شوې او دغه ځايونه بند شوي.

د ورزش دغه میدان ته ننوتل د يوې تابلو په نښلولو سره منع اعلان شوې. ورسره پرې باندې نښلول شوې ماسک د منع کيدلو څرګنده ښکارونديې کوي. په آلمان کې ټولې ورزشي سیالۍ رخصت شوې دي.

د آلمان براندنبورګ دروازه د توریستانو له پاره د سیل کولو يوه ليوالتيا ده.ډيرې سیلانيان د نړۍ له بيلا بيلو ځايونو څخه د آلمان دغه تاريخې ودانۍ او د برلين ښار ليدلو ته راځي. سږکال دغه توریستې ځاي له سهاره تر ماښامه له سیلانیانو څخه خالې دې.

دغه ځای د آلمان ولسې جرګه يا «بوندستاګ» دی. ورته د ورتګ منع تابلو پرې نه ده نښلول شوې. خو پر ډيرو څوکيو باندې ليکل شوې چې ترينه کار اخیستل منع دی. د ټولو استازو راتګ پارلمان ته منع نه دی. خو پر سپينو پارچو ليکل سوې سپارښتنه د ټولنيز واټن ساتلو له پاره دی.

په سپيڅلې اختر ايسټر يا عيدالقيام کې ډيری عیسويان د نندارې له پاره کلیسا ته راځي. دغه ډول کار سږکال ممکن نه وو. کلیسا ګانې خالي وې او ديني مراسم د انترنت او تلويزوني رسنيو له لارې خپاره شوه.

د هامبورګ په ښار د سنت پاولې سیمه کې هاربرت واټ نړيوال شهرت لري. دا د ساعت تیرۍ او خوشاله وخت تيرولو ځای ګڼل کيږي. اوس مهال دغه ځايونه لکه د نڅا کلبونه او رستورانتونه تړل شوي. يوه مرغۍ هم په کې نه الوزې.

په آلمان کې ښوونځې تر دويمې خبرتیا پورې د می مياشتي تر څلورمې نېټي رخصت شوي. په اوس وخت کې زده کړه په مجازي فضا کې او د انلاين له لارې زده کونکو ته ورکول کيږي.

د کولن په ښار کې د اور ګاډو تم ځای چې ډير کله له مسافرو څخه ډک وي، اوس په کي کله يو نیم کس ښکاره شي چې د بل اور ګاډې له سفر کولو څخه وروسته پاتې وې.

د هوايي ډګرونو حالت هم ښه نه دی. ډيری الوتکي خوا په خوا پارک شوي دي. کوم سفر په پام کې نه شته او د اقتصاد ساه نه چليږې  څوک سفر نه کوي. که څه هم د چاپيريال ساتنې له پاره يې ښيګڼه زیاته ده، خو د آلمان اقتصاد زښت ډير زيان ليدلې.

هغه درمل چي د متحده ايالاتو ولسمشر ترمپ له هند څخه غوښتي دي، هايډروکسي کلوروکين (Hydroxychloroquin) نوميږي او له ۱۹۴۰ کالونو راهيسي د تروپيکي يا استوايي ملاريا د درملنې له پاره کارول کيږي.

ملاريا د غوماشو د چيچلو او کرونا د کويد ۱۹ ويروس له کبله رامنځته کيږي او يو د بل سره تړاو نه لري. هغه کسان چي د ملاريا د زيات ګواښ سره مخامخ وي، په اوتوماتيکه توګه د کويد ۱۹ تر خطر لاندي نه وي.

د هايډروکسي کلورو کين درمل د ملاريا تر څنګ د يو شمېر نورو د بدن د مقاومت سره تړلو ناروغيو د درملنې له پاره کارول کيږي. د کرونا ويروس هم د بدن پر دفاعي نظام بريد کوي. له دې کبله د دغه درمل په مرسته د بدن د روغتيايي نظام د ساتنې خبره مطرح ده.

د راپورونو له مخي دغه درمل تر مخه لا په متحده ايالاتو کي په زياته اندازه موجود دي. خو ترمپ غواړي چي دغه درمل زيرمه کړي. که څه هم چي دغه درمل په امريکا کي د ډاکټر له نسخي پرته هم رانيول کيدلای سي خو زيات بې وزله کسان د دغه درمل د رانيولو توان نه لري.

په امريکا متحده ايالاتو کي د دغې موضوع په تړاو د ډاکټرانو نظرونه متفاوت دي. د ترمپ پلويان غواړي چي دغه درمل وازمويل سي خو د امريکا د طبي ټولنې مشر وايي چي د دغه درمل د کارولو وړانديز او سپارښتنه به ونه کړي.

د دغو درملو ضمني اغېزې پر زړه بد تاثير کولای سي. په دې ترڅ کي ښايي دغه درمل د فشار د ټيټېدو او عضلاتو او اعصابو ته د زيان رسېدو لامل سي. د دې تر څنګ په سينه کي درد زياتېدلای او د زړه دربی کميدلای سي.

ډاکټرانو د سواين/خنځير د والګي پر وخت د هند په راجستان ايالت کي دغه درمل په بريا د والګي پر ضد وکارول. خو د پاتي ناروغانو له پاره تر اوسه لا دغه مرکب نه دی کارول سوی او ازمويل سوی.

له دې مخکي چي يو درمل پر مريضانو وازمويل سي، بايد د نورو لارو يې د ازموينې ټول پړاونه پوره کړي وي. د دغه درمل له پاره هم دغه اصول صدق کوي او بايد ازمويني تر سره سي چي ايا په رشتيا د کرونا پر ضد کارول کيدلای سي که نه.

يوې څېړني ښودلې چي د دغه درمل د استعمال له کبله د بدن حجرو ته د کرونا ويروس ننوتل مشکل کيږي. خو بلې څېړني ښودلې چي دغه درمل د کرونا ناروغانو ته ګټه نه رسوي. البته دغه څېړنه صرف پر ۱۱ مريضانو تر سره سوې.

په چين کي د تر سره سوي يوې څېړني پايلي ښيي چي کله چي دغه درمل د لسو روغتونو ۱۰۰ په کرونا ناروغانو اخته کسانو ته ورکول سول، نو د هغوی په روغتيايي وضعه کي بهتري راغله. خو په دغه څېړنه کي دا معلومات نه دي ورکول سوي چي هغه ناروغان چي دغه درمل نه ول ورکول سوي، په پرتليزه توګه د هغوی روغتيايي وضعه څنګه وه.

ترمپ ويلي دي چي په فرانسه کي څېړونکو خورا ښه ازموينه کړې ده. د هغه په وينا له دې کبله به دوی په امريکا کي د دغه درمل د کارولو اجازه ورکړي.

کله چې په مارچ میاشت کې په فرانسه کې د کرونا ویروس خپریدل پېل سول نو يو شمېر څېړونکو د هایدروکسای کلوروکین په تړاو څېړنې پېل کړې. ترمپ د امريکايي تلويزيون په فاکس نيوز کي د دغه تحقيق په تړاو د بحث وروسته په سمدلاسه توګه د هغه ستاينه پېل کړه.

د روغتيا نړيوال سازمان (WHO) دمګړی د کرونا پر ضد پر شپږ مختلفو درملو ازمويني کوي. پر دغه سازمان انتقادونه کيږي چي ګواکي د کرونا د ويروس په وړاندي يې په اړينه چټکه توګه غبرګون نه ؤ ښودلی.

د کرونا د پراخ بحران له کبله د امريکا متحده ايالاتو په شمول زيات نور هيوادونه نه غواړي چي د لابراتوارونو د ازموينو پايلو ته انتظار وباسي. خو د اړونده پايلو او ازموينو پرته د کرونا پر موجوده ناروغانو د کومو درملو استعمال ښايي وروسته څرګند کړي چي دغه درمل اغېزمن دي که نه.