مختلفو سرچينو د ۳۶ کلن کیم جونګ اون، د زړه د جراحۍ عمليات رپوټونه خپاره کړي دي او زياته کړې يې ده چې هغه تر عمليات وروسته په کوما حالت کې دی. ځينو سرچينو حتی د شمالي کوريا د رهبر د احتمالي مړينې او د هغه د ځای ناستي څخه هم رپوټونه ورکړي دي.
د جمعې په ورځ د چينايي ډاکټرانو يوه ډله د کيم جونګ اون د روغتيايي وضعيت د څيړنې له پاره، شمالي کوريا ته واستول شوه.
د «شوګان ګندای» په نوم يوې جاپانۍ رسنۍ، د کيم د ناکام جراحي عمليات څخه خبر ورکړی او زياته کړې يې ده چې د شمالي کوريا رهبر ژوندی دی، خو ماغزه يې سم فعاليت نه ښکاره کوي.
سي ان ان، د امريکا د يوه حکومتي چارواکي له قوله ويلي دي چې د کيم وضعيت ډير خراب دی.
د مړينې احتمال
د کيم جونګ اون د روغتيايي وضعيت په اړه ضد او نقیض رپوټونه
نيويارک پُست د هانګ کانګ د HKSTV تلويزيون د مرستيال مدير له قوله وايي، چې کيم جونګ اون مړ شوی دی. هغه ويلي دي: «ډيرو موثقو سرچينو» ورته ويلي دي چې کيم جونګ اون وفات شوی دی.
د«وايبو» په نوم فيسبوک ته ورته چينايي ټولنيزې رسنۍ کې د کارونکو له خوا هم په ډيره پراخه توګه د شمالي کوريا د مشر د مړينې په اړه خبرونه خپاره شوي دي.
د کيم د نيکه د پيدايښت په ۱۱۵مه کليزه کې د کيم جونګ اون ناڅاپي نه ګډون، د هغه د برخليک په اړه ګمانونه نور هم جدي کړي دي.
د کيم جونګ اون د ځای ناستې په اړه ويل شوي چې ۳۱ کلنه خور يې ډير چانس لري. کله چې کيم جونګ اون د امريکا ولسمشر دونالد ترمپ او د سويلي کوريا له ولسمشر سره ليدنه کوله، د هغه خور هم ورسره وه.
د سويلي کوريا او جاپاني رسنيو په حواله، د کيم جونګ اون ميرمن په عامه محضر کې لږ لیدل شوې ده او د هغه ۷ کلنه لور هم د پلار د ځای ناستي په توګه چانس نه لري.
ترمپ ويلي دي چې کيم جونګ اون ته «تر ټولو ښې هيلې لري» او امید کوي چې «روغ» شي.
له آرشيف څخه يو انځوريز البوم:
د شمالي کوريا پوځي تمرينونه او په دغه ټاپو وزمه کي کړکېچ
امريکا په جنوبي کوريا کي دفاعي سيستم نصبوي. په عين حال کي د کوريا په اوبو کي د امريکا د اټومي اوبتل د ځای پر ځای کولو خبره کيږه. شمالي کوريا بيا خپل پوځي قدرت نندارې ته وړاندي کړی.
انځور: Reuters/D. Sagoljامريکا په جنوبي کوريا کي د «تاد» په نوم توغنديو دفاعي سيستم نصبول پيل کړل. دغه اقدام نه يوازي د سولي د پلويانو له غبرگون سره مخامخ سوی، بلکي روسيې او چين هم غبرگون ښوولی دی.
په دې انځور کي د توغنديو دفاعي سيستم آزموينه ښوول کيږي. د دغي آزمويني ځای او وخت روښانه سوی نه دی.
شمالي کوريا په تيرو اوونيو کي د کيم ايل سونگ د زېږېدو د ورځي او پوځ د تاسيس په وياړ ستر پوځي پريډونه وښوول او پوځي تمرينونه پيل کړي دي. دغو هڅو ته د شمالي کوريا د پوځي قدرت ښوولو په سترگه کتل کيږي.
د شمالي کوريا د پوځ له جوړښته ۸۵کاله تيريږي. دوی دغه ورځ په پوځي پرېډونو ولمانځله. جنوبي کوريا او امريکا متحدو ايالاتو بيا گډ پوځي تمرينونه پيل کړي دي.
د پوځ د تاسيس په ورځ د کيم ايل سونگ او کيم يونگ ايل مجسمو ته پوځي پرېډ.
د شمالي کوريا ښځي په دغه شان ورځو کي ميدان ته راوځي او ژاړي. دا ځل دوی د شمالي کوريا د بنسټ ايښوونکي کيم ايل سونگ د زېږېدو د ورځي په وياړ راوتلي او ژاړي.
د شمالي کوريا د تاسيس ورځ.
د کيم ايل سونگ د زېږېدو د ورځي په وياړ پوځي پرېډ.
شمالي کوريا گواښ کړی دی چي د توغنديو آزموينو ته به دوام ورکړي. امريکا ويلي دي چي د صبر کاسه ئې نوره ډکه سوې ده او روسيې په کوريا ټاپو وزمه کي د کړکېچ له ډېرښت څخه خبرداری ورکړی دی.
د شمالي کوريا د توغنديو نوي آزامويني يو روښانه پيام لاره، هغه دا چي د دغه هیواد رهبران په لوی لاس غواړي چي کړکېچ ته لمن ووهي.
د کيم ايل سونگ د زېږېدو د ورځي په وياړ د ښځو پوځيانو پرېډ.
د شمالي کوريا د دولت او پوځ پيام يو دی. دوی دواړه د خپلو رهبرانو فرمانونو ته غاړه ږدي.
د کيم ايل سونگ د زېږېدو ورځ ئې د «لمر ورځ» نومولې ده. د هغه د زېږېدو په ورځ پوځ اسمان ته گوري.
د کيم ايل سونگ د زېږېدو په ورځ شمالي کوريا بيا د توغنديو آزموينه وکړه. دې ته امريکا غبرگون وښود او دغه ټاپو وزمه ته ئې الوتکي وړونکي بېړۍ ولېږلې. شمالي کوريا به د خپل پوځي قدرت د ښوولو له پاره پوځي تمرينونه پيل کړل.
معمولاً له شمالي کوريا څخه ډېر لږ انځورونه رسنيو ته رسيږي. خو کله چي د توغنديو ازموينه، پوځي تمرينونه يا د پوځ قدرت نندارې ته وړاندي کوي رسنيو ته ئې انځورونه په اختيار کي ورکوي څو خپل ځواک گاونډیانو ته وښيي.
