آیا آلمان باید د یونان له ټاپوګانو څخه کم سنه بې سرپرسته مهاجر ومني؟ دې موضوع په آلمان کې یې تاوده بحثونه راپارولي دي. د اروپایي اتحادیې کمیسیون اوس ارقام هم په ګوته کړي چې نوره نو زیاتره د کم سنه ماشومانو موضوع نه ده.
انځور: picture-alliance/AA/A. Mehmet
اعلان
د آلمان د خبري آژانس د رپوټ له مخې د اروپایي اتحادیې کمیسیون له آلمان او د دغه اتحادیې له نورو غړو هیوادونو څخه غوښتي دي چې د یونان د مهاجرو له کمپونو څخه چې تر حده زیات ډک دي، بې سرپرسته کم سنه مهاجر ومني، آن که زیاتره یې ماشومان نه، بلکې تنکي ځوانان هم وي.
د اروپایي اتحادیې کمیسیون ویاندي ویلي چې د ټولنیز پیوستون ملي مرکز د نومبر میاشتې د وروستیو معلوماتو له مخې په یونان کې د ۵۲۷۶ بې سرپرسته کم سنه مهاجرو له پاره د هستوګنې یوازې ۲۲۱۶ ځایونه ول او شا او خوا۳۰۰۰ ځایونو کمښت دی.
د آلمان حکومت د دوشنبې په ورځ وویل چي اوسمهال باید کم سنه مهاجر یوازې آلمان ته را نه وستل شي. د حکومت مرستیالې ویاندي اولریکه دیمر، په برلین کې وویل: «موږ د راتلونکي له پاره د یوې اروپايي حل لارې په لټه کې یوو. آلمان په یوازې سر دغه کار نه شي کولی.»
تر دې دمخه د آلمان د زرغون ګوند مشر روبیرت هابیک دې غوښتنې په آلمان کې تاوده بحثونه راپورته کړل چې هغه پکې د یونان له ټاپوګانو څخه آلمان ته د ۴۰۰۰ کمه سنه مهاجر د راوستلو ملاتړ کړی وو.
د اروپايي اتحادیې کمیسیون د معلوماتو له مخې د یونان د لسبوس، خیوس، ساموس، لیوروس او کاس په ټاپوګانو کې د دسمبر تر شلمې نیټې پورې ۱۹۲۲ بې سرپرسته کم سنه مهاجر ثبت شوي ول. د روان میلادي کال د نومبر میاشتې تر وروستیو پورې په ټول یونان کې د دغه ډول ماشومانو شمیر ۵۲۷۶ تنه ته رسید، چې یوازې نهه سلنه یې تر ۱۴ کلنۍ کښته او د ځوانانو د محافظت د قانون له مخې ماشومان یادیږي.
د یاد خبري آژانس د رپوټ له مخې لکه څرنګه چې يې د آلمان حکومت هیله لري چې د کم سنه مهاجرو د هستوګنولو له پاره ژر «حقیقي اروپايي حل لاره» وموندل شي واقعبینانه نه بریښي. ځکه چې اروپایي اتحادیه له کلونو راهیسې د مهاجرو پر وړاندې د یوه ګډ سیاست له پاره هلې ځلې کوي. خو د پولنډ او هنګري په څیر هیوادونو د مقاومت له کبله تر ننه د اروپايي اتحادیې دننه د مهاجرو د عادلانه ویش له پاره کوم سیستم نه دی رامنځ ته شوی.
