موندل شوي جسدونه د نجونو دي چې عمرونه یې هم د ۱۴ او ۱۸ کلونو په منځ کې ښوول شوي. داسې ښکاري چې دغه نجونې د نایجریا هیواد اتباع دي. دغه جسدونه او ورسره ۳۷۵ نور ژغورل شوي کسان د دوو تورنو کسانو سره یوځای د یکشنبې په ورځ د ایټالیا سالرنو جنوبي بندر ته انتقال شوي دي.
د انسا خبري آژانس د سالرنو ښار د څارنوالانو په حواله ویلي چې د تورنو انساني قاچاقبرانو له ډلې څخه یو یې د مصر او بل يې د لیبیا هیواد اتباع دي او دوی دواړو په ګډه د کښتۍ په واسطه د ۱۵۰ کسانو د انتقال چارې تنظیم کړې وې.
انسا خبري آژانس همدا راز رپوټ ورکړی دی چې له پیښې څخه ژغورل شوو کسانو پلټونکو ته وویل، کله چې د دوی د سپرلۍ کښتۍ د ژغورنکې کښتۍ له لخوا وموندل شوه، لږ تر لږه ۱۰ کسان سمندر ته وغورځیدل او لا درکه شول.
تر اوسه پورې دا روښانه نه ده چې دغه ۲۶ موندل شوي جسدونه د ژغورنې د عملیاتو په ترڅ کې او یا د د ژغورنې د نورو عملیاتو په لړ کې موندل شوي دي.
بل لوري ته بیا، د سمندر د څار په نامه د مهاجرو د ژغورنې آلماني خیریه سازمان ویلي دي چې دوی د ژغورنې د یو لړ عملیاتو په ترڅ کې چې د لیبیا د ساحلي ساتونکو له خوا له ګډوډۍ سره مخامخ شوي ول، ۵۸ انسان ژغورلي او لږ تر لږه ۵ مهاجرینو خپل ژوند له لاسه ورکړی.
د «سي واچ» په نوم دغه آلماني سازمان په یوه خپره شوې اعلامیه کې ویلي: «د لیبیا ساحلي ګارد د کډوالو او ژغورنکې کښتۍ ته ورغلل او له کښتۍ څخه یې خلک ونیول او ویې وهل او ويې ګواښل.»
یاد آلماني سازمان همدا راز ویلي دي چې د لیبیایانو لخوا دغه نا څاپه کار ستونزې را ولاړې کړې او یو شمیر مهاجرین له کښتۍ څخه وغورځیدل. دغه سازمان همدا راز زیاته کړې چې د ایټالیا د سمندري ځواکونو یوې څرخي الوتکې مداخله وکړه، څو لیبیایان آرام کړي.
په ورته موضوع زموږ له آرشیف څخه د انځورونو ګالري:
سږکال د مديترانې سمندرګې له لاري اروپا ته مهاجرتونه
سږکال د مديترانې سمندرګي له لاري اروپا ته نژدې يونيم لک مهاجر رسيدلي دي. نژدې درې زره نور په اوبو کې مړه شوي دي. دا چې دغه مهاجر تر ډیره د کومو هيوادونو دي، په اړه یې معلومات په دې انځوريز رپوټ کې:
انځور: picture alliance/abaca/AAد مهاجرت نړيوالې ادارې د اکتوبر مياشتي د۲۰ مې نيټې د تازه خپرو شويو ارقامو له مخې سږکال له سمندري لارو اروپا ته ټول ټال ۱۴۶۵۳۵ تنه مهاجر رسيدلي دي. دغه مهاجر يونان، ايتاليا او هسپانيا ته رسيدلي دي.
ايټاليا، يونان او هسپانيا
د نژدې يونيم لک مهاجرو له ډلې څخه چې سږکال اروپا ته مهاجر شوي دي، ۱۱۰۳۵۲ تنه يې ايتاليا، ۲۲۹۱۶ يې يونان او ۱۲۴۲۰ یې هسپانيا ته رسيدلي دي.
د اکتوبر پر۲۰مه خپاره شوي ارقام ښيي چې په ۲۰۱۷م کال کې شاوخوا ۲۷۸۴ تنه مهاجر په سمندر کې د ډوبيدو له وجې مړه او يا لا درکه شوي دي.
په ۲۰۱۷م کال کې لس هغه هيوادونه چې د سمندر له لاري يې اروپا ته تر ټولو زيات مهاجر لرل، نايجريا يې په سر او مراکش يې په آخر کې دی. د لس واړو هيوادونو پيژنده او د مهاجرو شمير يې په ترتيب کتلای شئ!
مراکش په ۲۰۱۷م کال کې د لسو هيوادونو په کتار کې اروپا ته تر ټولو لږ یعنې ۵۴۰۷ تنه مهاجر لرل، دغه شمير په روان کال کې اروپا ته رسيدلو ټولو مهاجرو ۴ اعشاريه ۵ سلنه برخه ده.
سينګال ۵۰۵۰ تنه مهاجر، د ټولو مهاجرو ۵،۶ سلنه برخه.
اريتريا سږکال اروپا ته ۵۶۰۱ تنه مهاجر لرل چې د سږکال ټولو مهاجر ۵ اعشاريه ۶ سلنه برخه ده. په دې سره اريتريا په لسو مخکښو مهاجر لرونکو هيوادونو کې اتم ځای لري.
له مالي هيواد څخه سږکال اروپا ته ۵۹۸۹ تنه مهاجر تللي دي. مالي د اروپا د سږکال مهاجرو ۵ سلنه برخه جوړوي.
له ګامبيا څخه سږکال اروپا ته ۶۲۹۴ تنه مهاجر رسيدلي دي. دا د ټولو رسيدلو مهاجرو ۶ اعشاريه ۲ سلنه برخه ده. په دې سره کامبيا د سږکال په لسو لومړې درجه مهاجر لرونکو هيوادونو کې شپږم ځای لري.
له بنګله ديش څخه سږکال اروپا ته ۸۷۴۷ تنه مهاجر رسيدلي دي. دا د نژدې يونيم لک رسیدلو مهاجرو ۷ اعشاريه ۳ مه برخه ده.
له عاج ساحل څخه سږکال د سمندر له لارې اروپا ته ۹۵۴۴ تنه مهاجر رسيدلي دي چې دا په دغه کال کي اروپا ته د ټولو رسيدلو مهاجرو ۷ اعشاريه ۹ سلنه برخه جوړوي. په دې سره د عاج ساحل په لسو مخکښو مهاجرلرونکو هيوادونو کې څلورم ځای لري.
له گانا څخه سږکال د سمندر له لارو اروپا ته ۱۰۲۹۱ تنه مهاجر رسيدلي دي، چې دا اروپا ته د سږنيو رسيدلو ټولو مهاجرو ۸ اعشاريه ۵ سلنه برخه جوړوي.
له سوريې څخه سږکال اروپا ته ۱۱۶۵۴ تنه مهاجر رسيدلي دي. دا سږکال اروپا ته د رسيدلو ټولو مهاجرو ۹ اعشاريه ۷ سلنه برخه ده.
۱ نايجريا / تر ټولو زيات مهاجر لرونکی هیواد
نايجريا هغه هيواد دی چې سږکال يې تر ټولو زيات اتباع اروپا ته مهاجر شوي دي. د دغو مهاجرو شمير ۱۶۶۲۴ تنه دی چې اروپا د سږکال ټولو رسيدلو مهاجرو ۱۳ اعشاريه ۸ سلنه برخه جوړوي.
انځورونه د دويچه ويله له آرشيف څخه او ارقام د ملګرو ملتونو د مهاجرت ادارې له ويب پاڼې څخه. چمتو کونکی: محمد کریم صالح
