د افغانستان ورو توپ اچوونکی یا سپین بالر راشد خان به د آسترالیا د بیګ باش کریکټ سیالیو کې ولوبیږي. د آسترالیا د بیګ باش سیالیو تنظیموونکو د پنجشنبې په ورځ ویلي په دې ۲۰ اوریزو سیالیو کې يې راشد خان ته قراداد ورکړی دی.
انځور: Getty Images/AFP
اعلان
په ورته وخت کې د افغانستان ۱۸ کلن مسلکي بالر راشد خان د هندوستان د کرکټ په پریمیر لیګ سیالیو کې هم یو له بریالیو توپ اچوونکو څخه وو او په دې نوي قرار داد سره به راشد خان د افغانستان د کرکټ په تاریخ کې لومړی افغان لوبغاړی وي چې د بیګ باش په نامه د استرالیا په مشهور کرکټ لیګ کې لوبه کوي.
د بیګ باش د هغې لوبډلې لخوا چې راشد خان یې اخیستي په یوه خپره شوې اعلامیه کې د راشد خان له قوله لیکلي چې «زه ډیر خوښ یم چې د بیګ باش په سیالیو کې له سټرایکر لوبډلې سره تړون لاسلیکوم.»
نوموړي همدا راز زیاته کړې چې دا د ډیر ویاړ ځای دی چې په دې ډول د کرکټ په یوه ټورنمنت کې لوبیږم او تر ټولو ډیر د ویاړ خبره دا ده چې زه د افغانستان له پاره لومړنی افغان لوبغاړی وم چې د آسترالیا په بیګ باش سیالیو کې به ولوبیږم.»
«په ډېره علاقه او کنټرول سره»
د اډالیډا سټرایکر لوبډلې روزونکي یا کوچ جیسون ګیلیسپي چې له دې وروسته به ورسره راشد خان هم ملتیا کوي، د راشد له لوري د تړون لاسلیک کول ستایلي.
د ایدیلیدا سټرایکرز لوبډلې هم د راشد خان راتګ ستایلی او ویلي یې دي چې «موږ خوښ یو چې راشد خان ته د ایډیلیډا په لوبډله کې د لوبیدو وړاندیز کوو.»
د ا فغانستان د کرکټ د ملي لوبډلې دغه ۱۸ کلن لوبغاړي تر اوسه پورې په ۲۹ یو ورځنیو سیالیو کې ۶۳ ویکټي اخیستي او د ۱۸ منډو یا رنزونو په بدل کې د ۷ کسانو په سوځولو سره راشد خان د نړیوال کرکټ پا تاریخ څلورم ځای خپل کړ. راشد خان دغه کارنامه د تیرې جون میاشتې په ترڅ کې د افغانستان او ویست انډیزو د لوبډلو ترمنځ په خپل نامه ثبت کړه.
راشد خان په دې وروستیو کې هم د کربین پریمیر لیګ کرکټ سیالیو کې یو بل تاریخ په خپل نامه ثبت کړ. نوموړي وکولای شول چې د دې سیالیو په ترڅ کې د لومړي ځل له پاره هټریک ترسره کړي. د کربین لیګ په سیالیو کې راشد خان د ګیانا امازون واریرز لوبډلې له پاره لوبه کوله. هیره دې نه وي چې د بیګ باش په نامه د استرالیا د کرکټ سیالي د روان کال د ډسمبر په میاشت کې پیلیږي چې دا ځل به د نړۍ د کرکټ له ګڼ شمیر ستورو سره راشد خان هم د لوبې میدان ته کوز شي.
پر ورته موضوع یو انځوريز البوم زموږ له آرشيف څخه (28.07.2015):
انځورونه: په افغانستان کې د ګالف اوږد تاریخ
د کرکیټ، فوټبال، تکواندو او ډیرو نورو سپورتونو نومونه افغانانو ته اشنا دي خو ګالف بیا یوه له هغو لوبو څخه ده چې نه یې په افغانستان کې امکانات ډیر دي او نه یې هم مینه وال. خو دغه لوبه هلته ډېر اوږد تاریخ لري.
انځور: Getty Images/P. Bronstein
ګالف په افغانستان کې ډیر زوړ تاریخ لري
دا خبره به د ډیرو له پاره د حیرانتیا وي چې افغانستان له ۱۹۱۱م کاله راهيسي له ګالف لوبي سره اشنایي لري. په همدغو کلونو کې امیر حبیب الله خان، افغانان د ګالف لوبي سره اشنا کړل. د نیویارک ټایمز ورځپاڼي په یوه مقاله کې راغلي دي چې پخپله امیر حبیب الله له ګالف سره ډیره مینه لرله او د افغانستان په څو ولایتونو کې یې د ګالف ميدان جوړ کړی وو.
انځور: Getty Images/P. Bronstein
په افغانستان کې د ګالف وده
د امیر حبیب الله خان له مړیني سره په افغانستان کې له ګالف سره لیوالتیا هم لږ شوه. خو په ۱۹۵۰م کلونو کې هڅي پیل شوې چې افغانستان په سیمه کې د سیلانیانو پر یوه په زړه پوري سیمي باندې واوړي. د کابل ګالف میدان هم په همدې موخه جوړ شو چې ډیر وخت پکښې دباندنيانو او ځینو افغانانو لوبي کولې.
انځور: Getty Images/AFP/B. Ismoyo
د کورنیو جګړو پیل
په افغانستان کې د کورنیو جګړو له پیلیدو سره د کابل د ګالف میدان چې قرغې ته نژدې پروت دی هم د نورو ځایونو په شان ویجاړ شو. په دې سیمه کې آن په جګړو کې ښکیلو اړخونو ماینونه ښخ کړل چې لوبه خو لا څه چې د ګرځیدو وړ هم نه وو.
انځور: Getty Images/AFP/S. Marai
یو ځل بیا ګالف
په ۲۰۰۱م کال کې د طالبانو رژیم له ړنګیدو سره د ګالف له میدانه ماینونه پاک شول او دغه سیمه یووار بیا لوبي ته چمتو کړل شوه. د پخوا په څیر بیا هم ډیر هغه بهرنیانو په دغه ميدان کې لوبي کولې چې په افغانستان کې يې دنده لرله.
انځور: Getty Images/P. Bronstein
لږ خو تږي مینه وال
په ۲۰۰۴م کال کې د کابل د ګالف ميدان تر بیا پرانیستلو وروسته ډېر بهرنیان دې سیمي ته د لوبي له پاره راځي. په افغانانو کې که څه هم د ګالف د مینه والو شمیر لږ دی، خو هغه کسان چې له دې لوبي سره اشنا دي په ډیري لیوالتیا او هوډ سره يې کوي.
انځور: Getty Images/P. Bronstein
د افغان ګالفرانو نوی نسل
د کابل د ګالف ميدان ته ډیر تنکي ځوانان هم ورځي. ډېري نړیوالي موسسې له هغوی سره د تجهیزاتو په برخه کې مرسته کوي چې دغه ځوانان دې ته وهڅیږي چې لوبه زده کړي او په دې ترتیب سره په افغانستان کې د ګالف لوبه وده وکړي.
انځور: Getty Images/S. Marai
بهرني عسکر چیري لوبیږي
په افغانستان يوازي همدغه د کابل د ګالف ميدان د مینه والو پر مخ پرانیستی دی خو د امنیتي ستونزو له کبله ډېر بهرنیان نه شي کولای چې هلته په آزاده توګه لوبه وکړي. هغوی د ځان له پاره نور بدیلونه موندلي دي او په خپلو اډو او کار ځایونو کې دغه لوبه کوي.
انځور: Getty Images/AFP/D. Furst
لوبغالی
دا چې د ګالف ډیر نوموتي لوبغاړي لکه تایګر ودس، افغانستان ته د لوبو له پاره راشی، ښايي امکان و نه لري، خو د کابل ګالف لوبغالی د ډیرو له پاره ځکه په زړه پوري دی چې په دې ځای کې ځمکې او سورې د نورو په پرتله ډیر توپیر لري او له همدې کبله باید لوبغاړي په ګالف کې ډیر مهارت ولري چې ښې پایلي ولري.
