په لیبیا کې د غلامانو د خرڅلاو بازار انځورونو خپریدل نړۍ وړلزوله. د لیبیا حکومت چې نړیواله ټولنه يې ملاتړ کوي، د دغو انځورونو تر خپریدو وروسته د یوې څیړنیزي کمیټې د جوړیدو خبر ورکړ. په عین وخت کې د لیبیا حکومت ویلي دي چې دغه هیواد د معمرالقذافي تر سقوط وروسته له اړودوړ سره مخامخ دی او لیبیا اروپا ته د غیرقانوني مهاجرت منبع نه، بلکې پخپله د دغه وضعیت قرباني دی.

هغه کسان چې په دغه بازار کې پلورل کیدل، افریقایي مهاجر ول. په ليبيا کې د غلامانو په توګه د هغوی د خرڅلاو د انځورونو خپریدو په ځينو اروپایي او افریقایي ښارونو کې اعتراضونه راپورته کړل. د مراکشي او افریقایي ځوانانو یوې ډلې (په پورتنې انځور کې) د مراکش په پلازمینه کې د لیبیا سفارت مخې ته احتجاج وکړ.

ډیر مهاجر اروپا ته د رسیدو پر لاره ویرونکي تجربې تر شا پریږدي. ملګري ملتونو د اروپایي اتحاديي او یو شمیر افریقایي هیوادونو سره په ګډه پتېيلې ده چې د روان کال تر پایه پوري ۱۵۰۰۰ پناه غوښتونکي خپل هیواد ته ستانه کړي. زیاتره دغه مهاجر له نایجیریا، ګامبیا او ګانا هیوادونو دي. د ملګرو ملتونو په وینا په دغه طرح کې ګډون اختیاري دی.

ملګرو متلونو تر دې دمخه په لیبیا کې د مهاجرو د کمپونو د وضعیت په هکله هم اندیښنه څرګنده کړې وه. د اټکلونو له مخې له۴۰۰ زرو تر یو میلیون پوري مهاجر په لیبیا کې په ناخواله وضعیت کې ژوند کوي او هیله من دي چې وکولای شي په لومړني فرصت کې ځانونه اروپا ته ورسوي. د لیبیا د چارواکو په ونیا اوسمهال شا او خوا ۲۰ زره مهاجر د دغه هيواد په کمپونو کې ژوند کوي.

په لیبیا کې د ملي یووالي حکومت له اروپایي اتحادیي سره د ساحلي ګارد په واسطه د مدیترانې سمندرګي له لاري اروپا ته د مهاجرو د مخنیو په برخه کې یو تړون لاسلیک کړی دی. په دې موخه په راتلونکې کې باید د مناسبو شرایطو لرونکي پناه ځایونه برابر شي. پورتنی انځور د همدغې ډول یوه کمپ دی چې مصراته ښار ته نزدې موقعیت لري. دغه کمپ پخوا یو زندان وو.

هغو مهاجرو چې په لیبیا کې یې په توقیف خانو او کمپونو کې زیات وخت تیر کړی دی، له جسمې لحاظه يې وضعیت ښه نه دی او پر بدن یې د شکنجو او جسمې آزار نخښې لیدلي شوي دي. د مهاجرت نړیوال سازمان، څه موده وړاندي وویل چې د روان میلادي کال په پنځو میاشتو کې چې کومو کسانو ځانونه د مدیترانې سمندرګي له لاري ایټاليا ته رسولي ۴۱ زره تنه وو چې د ټول تیرکال په پرتله یې شمیر لس زره تنه زیات وو.

دغه ځوان هم د مصراته په۵۰ کیلومترۍ کې د مهاجرو په یوه کمپ کې ژوند کوي. ډیر مهاجر د کار موندلو په موخه لیبیا ته مهاجرت کوي. یوه ډله یې بیا غواړي چې د مدیتراني د مرګوني لاري تر وهلو وروسته ځانونه اروپا ته ورسوي. تر اوسه څو زره کسان د دغې لاري په اوږدو کې مړه شوي دي. خو پر دې سربیره هم ډیر افریقایي ځوانان د تیښتې لومړني فرصت ته انتظار باسي.

د لیبیا ساحلي ګارد په دې ترڅ کې ډیر ځوانان نیولي او وچې ته یې ستانه کړي دي. دغه کسان د لیبیا ساحلي ښار طرابلس په ۴۵ کیلومترۍ کې میشتیږي. د بشري حقونو مدافع سازمانونه د اروپایي اتحادیې او لیبیا تر منځ پر شوي تړون انتقاد کوي. د دغه تړون اصلي هدف د مدیتراني سمندرګي مسیر بندول دي.

د اروپايي اتحادیې او افریقا مشرانو په نزدې وخت کې په عاج ساحل کې پر دې باندي توافق وکړ، چې د ملګرو ملتونو او اروپایي اتحادیې په ملاتړ یو افریقایي کمیسیون جوړ شي چې په افریقا کې له بشري حقونو څخه د سرغړوني پيښې وڅیړي.

د «ګلوبل سلیوري انډیکس» په تازه رپوټ کې شمالي کوریا په لومړي مقام کې ځای لري. په شمالي کوریا کې له هرو ۱۰۰۰ کسانو څخه ۱۰۴،۵ کسان په یو ډول غلامي کوي. د دې هیواد ټول نفوس ۲۵ میلیونه او ۲۴۴ زره ښوول شوی او د ټول نفوس ۲ میلیونه او ۶۴۰ زره کسان له دغې پدیدي اغیزمن انګیرل شوي.

په دوهم مقام کې ایریتریا ځای لري. په دې هیواد کې له هرو ۱۰۰۰ کسانو څخه ۹۳ کسان په یو ډول غلامي کوي. د دې هیواد ټول نفوس ۴ میلیونه او ۸۴۷ زره ښوول شوی او د ټول نفوس ۴۵۱ زره کسان یې د غلامۍ قربانیان دي.

په دریم مقام کې برونډي ځای لري. په دې هیواد کې له هرو ۱۰۰۰ کسانو څخه ۴۰ کسان په یو ډول غلامي کوي. د دې هیواد ټول نفوس ۱۰ میلیونه او ۱۹۹ زره ښوول شوی او د ټول نفوس ۴۰۸ زره کسان یې د غلامۍ قربانیان دي.

په څلورم ځای کې د مرکزي افریقا جمهوریت ځای لري. په دې هیواد کې له هرو ۱۰۰۰ کسانو څخه ۲۲،۳ کسان په یو ډول غلامي کوي. د دې هیواد ټول نفوس ۴ میلیونه او ۵۴۶ زره ښوول شو او د ټول نفوس ۱۰۱ زره کسان یې د غلامۍ قربانیان دي.

پنځم مقام بیا افغانستان خپل کړی. په دې هیواد کې له هرو ۱۰۰۰ کسانو څخه ۲۲،۲ کسان په یو ډول غلامي کوي. د دې هیواد ټول نفوس ۳۳ میلیونه او ۷۳۶ زره ښوول شو او د ټول نفوس ۷۴۹ زره کسان یې د غلامۍ قربانیان دي.

شپږم مقام بیا موریتانیا خپل کړی دی. په دې هیواد کې له هرو ۱۰۰۰ کسانو څخه ۲۱،۴ کسان په یو ډول غلامي کوي. د دې هیواد ټول نفوس ۴ میلیونه او ۱۸۲ زره ښوول شو او د ټول نفوس ۹۰ زره کسان یې د غلامۍ قربانیان دي.

اوم ځای بیا جنوبي سوډان لري. په دې هیواد کې له هرو ۱۰۰۰ کسانو څخه ۲۰،۵ کسان په یو ډول غلامي کوي. د دې هیواد ټول نفوس ۱۱ میلیونه او ۸۸۲ زره ښوول شو او د ټول نفوس ۲۴۳ زره کسان یې د غلامۍ قربانیان دي.

پاکستان بیا اتم مقام لري. په دې هیواد کې له هرو ۱۰۰۰ کسانو څخه ۱۶،۸ کسان په یو ډول غلامي کوي. د دې هیواد ټول نفوس ۱۸۹ میلیونه او ۳۸۱ زره ښوول شو او د ټول نفوس ۳ میلیونه او ۱۸۶ زره کسان یې د غلامۍ قربانیان دي.

کمبودیا په نهم مقام کې دی. په دې هیواد کې له هرو ۱۰۰۰ کسانو څخه ۱۶،۸ کسان په یو ډول غلامي کوي. د دې هیواد ټول نفوس ۱۵ میلیونه او ۵۱۸ زره ښوول شو او د ټول نفوس ۲۶۱ زره کسان یې د غلامۍ قربانیان دي.

ایران بیا لسم مقام خپل کړی دی. په دې هیواد کې له هرو ۱۰۰۰ کسانو څخه ۱۶،۲ کسان په یو ډول غلامي کوي. د دې هیواد ټول نفوس ۷۹ میلیونه او ۳۶۰ زره ښوول شو او د ټول نفوس ۱ میلیون او ۲۸۹ زره کسان یې د غلامۍ قربانیان دي.