د وسلو تولیدونکی آلمانی شرکت، راین ميتال، وايي چې اوکراين ته د لئوپارد ټانکونو لیږد له ۲۰۲۴م کال څخه مخکې ممکن نه دی.
د راين ميتال مشر، آرمين پاپرګر آلمانۍ ورځپاڼې «بيلد ام زونتاګ» ته ويلي دي: «حتی که سبا هم کیف ته زموږ د ټانکونو د لیږد تصميم نيول کيږي، دغه کار به د راتلونکي کال تر پایه پورې وخت ونیسي.»
راین ميتال، ۲۲ «لئوپارد ۲» او ۸۸ پخواني ماډل «لئوپارډ ۱» ټانکونه په اختیار کې لري.
د اوکراین سفیر: المان د نورو وسلو ژمنه کړې ده
د پاپرګر په خبره، د اوکراین له پاره د دغو ټانکونو آماده کول، یو کال وخت نیسي، ځکه چې هغه د رنګولو علاوه، یو لړ تغیراتو ته اړتیا لري تر څو په جنګي عملياتو کې د استفادې له پاره چمتو شوي وي.
پاپرګر همدارنګه وايي چې له قرارداد پرته کېدای نشي چې ټانکونه سپارنې ته چمتو کړي. په خبره ېې دغه کار په سلونو ميليونه يورو لګښت ته اړتيا لري او راین متال نشي کولی له مخکې دغه مصارف تامين کړي.
«د اوکراین په جګړه کې ټاکونکی رول»
د راین متال شرکت مشر وايي، «لئوپارد» کولای شي د اوکراین په جګړه کې ټاکونکی رول ادا کړي: «دغه ټانکونه د تعرض او له لاسه وتلې خاورې د بېرته نيولو له پاره فوق العاده مهم دي.»
د المان «پوما» ټانکونه په آزموېنه کې په بشپړ ډول ناکامه شول
هغه زیاتوي: «يو پوځ کولی شي په دغو جنګي ټانکونو سره د دښمن ليکې ماتې او يوې اوږدې جګړې ته د پای ټکی کيږدي.»
په آلمان کې له يوې مودې راهیسې اوکراین ته د دغو ټانکونو د لېږد په اړه بحثونه تاوده شوي دي. د اوکراین متحدو هیوادونو تر اوسه د وسلو او مهماتو په ليږلو دغه هیواد سره مرستې کړي، خو د غرب ساخت ټانکونه ېې تر اوسه نه دي استولي.
تازه پولنډ او فنلنډ اعلان کړی چې دوی چمتو دي اوکراین ته د «لئوپارد ۲» ټانکونو په ليږد کې برخه واخلي، خو هغوی د دغه کار له پاره په آلمان کې د دغو ټانکونو د جوړونکي شرکت تائيد ته اړتیا لري.
آلمان او امریکا اوکراین ته زغروال ټانکونه ورکوي
بريتانيا د شنبې په ورځ ژمنه وکړه چې اوکراین ته «چلنجر ۲» ټانکونه چې د دغه هیواد د تر ټولو پرمختللو تهاجمي ټانکونو څخه دي، ورکوي. د رپوټونو پر اساس، د آلمان حکومت غواړي روانه اوونۍ اوکراین ته د جنګي ټانکونو د لیږد له پاره لاره هواره کړي.
د مارډر ټانکونو مشروط فوري ليږد
آلمان تر دې مخکې اوکراین ته د پياده ځواکونو اړوند «ماردر» ټانکونو او د دافع هوا سیستم لرونکي «ګپارډ» ټانکونو د ورکړې ژمنه کړې وه.
د راين متال شرکت مشر، آرمين پاپرګر، وايي چې دغه شرکت د ۴۰ ماردر ټانکونو لیږد ته تیار دی، خو په دې شرط چې یونان له آلمان څخه د دغو ټانکونو د ترلاسه کولو معاملې له دوهمې برخې څخه صرف نظر وکړي.
«د ډیپلوماتیکي لاري د اوکراین جنگ د ختمیدوغوښتنه»
هغه زیاتوي: «پاتې ۲۰ ټانکونه چې په پام کې وو يونان ته ېې ورکړو، کولای شو فوراً ېې اوکراین ته وسپارو. دا چې له ټول توان سره کار کوو، نو پاتې نور ېې هم کولی شو چې په اپريل کې ورکړو.»
راين متال، اوکراین ته د «ګپارډ» مهماتو سپارلو ته خپل چمتووالی پیل کړی دی. د دغو مهماتو د لومړنۍ محموله توليد، د جون او جولای په میاشتو کې پای ته رسيږي.
پاپرګر وايي: «د راتلونکي کال په منځ کې موږ اوکراین ته د توپ ۳۰۰زره ګولي ورکوو. هیله لرو چې د دغې محمولې په ورکړې سره د اوکراین د ګپارډ مهماتو د کمبود ستونزه هواره شي.»
دويچه ويله ف/م.ک.ص./ن.ز.
پر ورته موضوع معلوماتي انځوریز البوم:
انځوریز رپوټ: د وسلو تر ټولو ستر تولیدونکي شرکتونه
هر کال په نړیواله کچه د وسلو په پلور کې زیاتوالی رامنځته کیږي. په نږدې ۲۰۰۰ میلیارده ډالرو سره، د وسلو د پلور ریکارډ په ۲۰۱۹م کال کې مات شو. په دې انځوریز رپوټ کې د نړۍ له تر ټولو سترو وسلو تولیدونکو شرکتونو سره آشنا شئ:
انځور: Lee Jin-man/AP Photo/picture-allianceدغه امریکایي کمپنۍ د نړۍ د وسلو تر ټولو ستر تولیدونکی شرکت دی. د دې کمپنۍ ۸۹ سلنه عاید د وسلو د پلور له طریقه ترلاسه کیږي. د لاکهید مارتین شرکت اکثره تولیدات د هوا- فضاء په برخه کې دي. دغې کمپنۍ په ۲۰۱۹م کال کې تر ۵۳ میلیارده ډالرو د ډیرو پیسو وسلې پلورلي دي. انځور د لاکهید مارتین کمپنۍ تولید د امریکایي پوځ د اف ۳۵ جټ الوتکه.
بوئینګ د نړۍ د وسلو تولیدونکو په کتار کې دویم ځای نیولی دی. په ۲۰۱۹ م کال کې د دغې کمپنۍ ټول عاید ۷۶ میلیارده او ۵۰۰ میلیونه و چې ۴۴ سلنه یي د جنګي وسایلو د پلور له طریقه ترلاسه کړي دي.
د نورثروپ ګرومن امریکايي کمپنۍ د جنګي تجهیزاتو د طرحې او تولید، جنګي الوتکو، کیښتیو، الوتکې لیږدونکي بیړیو، سپوږمکیو، رادار، د توغندیو دفاعي سیستم او نورو د تولید په برخه کې فعالیت کوي. په ۲۰۱۹ م کال کې دې کمپنۍ ۲۹ میلیارده ډالره یا ۸۶ سلنه د ټولو فروشاتو څخه د جنګي وسایلو د پلور له طریقه ترلاسه کړي دي.
د ریتیان Raytheon امریکایي کمپنۍ فروشات په ۲۰۱۹م کال کې ۸ سلنه زیات شوی و. د دې کمپنۍ ۸۵ سلنه عاید یعنې ۲۵ میلیارده ډالره یي د جنګي وسایلو له درکه ول. دغه کمپنۍ په نړۍ کې د رهبري کیدونکو توغندیو تر ټولو لوی تولیدونکی بلل کیږي.
دغه امریکایي شرکت چې هوایي یا فضایي صنایع تولیدوي د خپل عاید ۶۲ سلنه برخه چې څه باندې ۲۴ میلیارده او ۵۰۰ میلیونه ډالره کیږي د جنګي وسایلو د پلور له لارې ترلاسه کوي. جنرال داینامیکس د اف ۱۶ جنګي الوتکې (عکس کې) تولیدونکی شرکت دی.
آویک چینایي شرکت (Aviation industry Corporation) په چین کې د وسلو د تولید تر ټولو ستر شرکت دی. په ۲۰۱۹م کال کې د دې شرکت ۳۴ سلنه عاید یعنې ۲۲ میلیارده او ۵۰۰ میلیونه ډالره د جنګي وسایلو د پلور له طریقه ترلاسه شوي دي. آویک د الوتکو، بی پیلوټه الوتکو او هیلي کوپترونو تولیدونکی دی.
دغه بریتانوي شرکت په ۱۹۹۹م کال کې د «بریټش آیروسپيس» او «جي ای سي- ماکروني» شرکتونو له یوځای کیدو څخه رامنځته شو او له هغه وخت راهیسې د نړۍ د وسلو د تولید یو له تر ټولو لویو کمپنیو څخه شمیرل کیږي. د دې شرکت ۹۵ سلنه عاید یا ۲۲ میلیارده ډالره یي د جنګي وسایلو د پلور له طریقه وو. دغه کمپني د جنګي الوتکو لیږدونکو بیړیو، اوبتلونو په تولید او د اف ۳۵ او یورو فایټرر په جوړولو کې شراکت لري.
دغه چینایي کمپنۍ په الکترونیک او رادار صنایعو په برخه کې فعالیت کوي او ۴۶ سلنه یا د ۱۵ میلیارده ډالرو معادل فروشات یي د نظامي وسایلو د پلور له طریقه ترلاسه کړي دي.
د نورینکو «Norinco» چينایي کمپنۍ چې یو له تولیداتو څخه یي ټانک دی په نړۍ کې د وسلو یو له لویو تولیدونکو څخه دی. دغه شرکت په ۲۰۱۹م کال کې د ۱۴ میلیارده او ۵۰۰ میلیونه ډالرو وسلې پلورلي دي. دا مقدار د دې کمپنۍ ۲۲ سلنه فروشات تشکیلوي.
دغه امریکایي کمپنۍ په ۲۰۱۹م کال کې د «ګروه هریس» او «ال ۳ ټکنولوژي» له ادغام څخه رامنځته شو او د نظامي مخابراتو په برخه کې، د شپې دوربین، د الکترونیکي قوماندې مرکزونو او نورو د تولید په برخه کې فعالیت کوي.۱۴ میلیارده ډالره یا ۷۷ سلنه له فروشاتو څخه یي د وسلو پورې اړه پيدا کوي.
دغې امریکایي کمپنۍ په ۲۰۱۹م کال کې تر ۱۳ میلیارده ډالرو د ډیرو پيسو وسلې پلورلي دي. خو دا د دغې کمپنۍ د فروشاتو یوازې ۱۷سلنه برخه تشکیلوي. یونایټډ ټکنولوژي په ۲۰۲۰م کال کې له ریتیان سره یوځای شو او اوس په نړۍ کې د وسلو د سترو تولیدونکو په کتار کې شمیرل کیږي.
د لئوناردو ایټالوي کمپنۍ د عاید ۷۲ سلنه برخه د وسلو د تولید له درکه ترلاسه کیږي. دغه کمپنۍ په کلني حساب تر ۱۱ میلیارده ډالرو د ډیرو پیسو وسلې صادروي. دغه کمپنۍ د یورو فایټر جنګي الوتکو په تولید کې هم برخه لري.
مسافربري الوتکې د ایرباس کمپنۍ د شهرت اصلي دلیل دی. خو د دې شرکت ۱۴ سلنه عاید د نظامي وسایلو د تولید له درکه ترلاسه کیږي. ایرباس تر ۱۱ میلیارده ډالرو ډیر نظامي محصولات خرڅوي، خو مجموعي فرشات یي ۷۹ میلیارده ډالره و. آلمان او فرانسه ۱۱ سلنه او هسپانیا ۴ سلنه په دې شرکت کې ونډه لري.
د تالس فرانسوي کمپنۍ په اروپا کې د وسلو د تولید دریمه کمپنۍ ده. د دې کمپنۍ د اسهامو ۲۶ سلنه برخه د فرانسې د دولت په اختیار کې ده. دغه کمپنۍ په کلني حساب د ۹ میلیارده او ۵۰۰ میلیونه یورو په ارزښت وسلې خرڅوي چې دا د تالس کمپنۍ د مجموعي عاید ۴۶ سلنه برخه تشکیلوي.
د دغې روسي کمپنۍ ۹۸ سلنه محصولات وسلې تشکیلوي. «آلماز- آنتي» د فروشاتو له کمښت سره مخامخ شوی دی او د پوځي صنایعو په رده بندۍ کې درې درجې ښکته شوی دی. خو سره له دې هم دغې کمپنۍ په ۲۰۱۹م کال کې ۹ میلیارده یورو فروشات درلودل.
د متحده اماراتو د «EDGE» شرکت د عربي هیوادونو لومړنی شرکت دی چې د نړۍ د وسلو د ۲۵ سترو تولیدونکو شرکتونو فهرست ته داخل شوی دی. د آلمان دوه شرکتونه د نړۍ د ۱۰۰ شرکتونو په لیست کې موجود دي. د راین متال شرکت د لئوپارد ټانک (انځور کې) جوړونکی، د نږدې ۴ میلیارده ډالرو په فروشاتو سره یو له دغو شرکتونو څخه دی.
