رویټرز خبري اژانس د چهارشنبې په ورځ د یوې اوکراینۍ رسنۍ «اوکراینسکا پروادا» له قوله لیکلي دي، چې د اوکراین سمندري بې پیلوټه الوتکو په کریمیا نيمه ټاپو کې د روسیې يوه کښتۍ په نښه او زیانمنه کړې ده.

رویټرز خبري اژانس په خپل خبر کې لیکلي دي، چې د دغې اوکراینۍ رسنۍ له لوري خپرو شویو ویډیوګانو کې ښکاري، چې د کریمیا نيمه ټاپو په جنوبي سواحلو کې له سمندره لوګي پورته کېږي او پر سمندر له پاسه چورلکې پروازونه کوي.

یوه اوکرایني وکیل اولکسي هونچارینکو ویلي دي چې په نخښه شوې کښتۍ »تزار کونیکوف« وه، چې په ۲۰۰۸ کال کې یې په ګرجستان کې د روسیې عملیاتو کې برخه لرله. رویټرز خبري اژانس لیکلي دي، چې په مستقل ډول توانيدلي نه دي چې د دغي رسنۍ اکونټ تائيد کړي او د اوکراين استخباراتو ته هم لاس رسی نشته چي سړی نظر ترې واخلي.

د تېر کال په ډیسمبر میاشت کې هم د اوکراین کروز توغندیو په کریمیا کې د روسیې لویه جنګي باروړونکې بېړۍ ویشتلې وه، چې یو کس پکې وژل شوی و.