د طالبانو استازو ويلي چي شورا يې د يکشنبې په ورځ (د ۲۰۱۹ کال د دسمبر ۳۰مه نېټه) په افغانستان کي پر يو مؤقت اوربند  تفاهم کړی دی. دا د دې له پاره چي د طالبانو او امريکايانو تر منځ د سولې د تړون لاسليک ته چوکاټ رامنځ ته سي. د اسوشيېتد پريس خبري آژانس د راپور له مخي دا چي دغه اوربند به کله پېل سي او څومره وخت ميعاد به ولري، په هکله يې معلومات نه دي ورکول سوي.

واشنګټن د سولې د ممکنه تړون د لاسليک له پاره د اوربند شرط ايښی ؤ. د سولي يو تړون به دا ممکن کړي چي امريکايي عسکر له افغانستان څخه پسله ۱۸ کالو جګړې بېرته خپل هيواد ته ستانه سي. د امريکا د متحده ايالاتو له پاره دغه جګړه د خپل تاريخ تر ټولو اوږده بهرنۍ جګړه ده.

د واشنګټن له خوا پر دغه خبر تر اوسه کوم غبرګون نه دی رامنځ ته سوی. البته په قطر کي د طالبانو د دفتر وياند سهيل شاهين د يکشنبې په ماخستن بېله دې چي د اوربند په تړاو تبصره وکړي يا دغه لغت وکاروي، د «ځينو رسنيو× د خبرونو په هکله ليکلي چي «حقيقت نه لري.»

د اټکلونو له مخې دمګړی په افغانستان کي ۱۲ زره امريکايي عسکر مستقر دي. د امریکا د متحده ايالاتو ولسمشر د طالبانو سره د سولې د خبرو اترو له پاره ځانګړي استازي زلمي خليلزاد ته دنده سپارلې چي د ممکنه سولې د تړون په هکله ورسره مذاکرات وکړي.

APE/AWA/BS