روسیې د ۱۹۳ اوکرایني ډرونونو د راغورځولو خبر ورکړی دی
۱۴۰۴ آبان ۵, دوشنبه
د روسیې دفاع وزارت د دوشنبې (د اکتوبر میاشتې ۲۷ نیټه) په ورځ د تلیګرام انټرنټي خدماتو په شبکه کې لیکلي دي چې د دغه هیواد د هوایي دفاع سیستم تیره شپه د اوکراین ۱۹۳ بې پيلوټه الوتکې «کشف او لمنځه وړي دي.»
سیمه ایزو چارواکو په دغو بریدونو کې د یوه کس د وژل کیدو رپوټ ورکړی دی.
د روسیې د لویدیځې سرحدي سیمې بریانسک والي الکساندر بوګوماس، په تلیګرام شبکه کې لیکلي چې په دغه برید کې په یوه کلي کې یو کوچنی بس په نښه شوی دی. د بوګوماس په حواله د دغه کوچني بس چلوونکی وژل شوی او پنځه تنه سپرلۍ یې ټپیان شوي دي.
د روسیې د دفاع وزارت د معلوماتو له مخې د دغه هیواد د هوایي دفاع ځواکونو په بریانسک سیمه کې چې له اوکراین سره ګډه پوله لري په مجموع کې ۴۷ بې پيلوټه الوتکې ویشتلي دي.
د نوموړي وزارت په حواله ۴۰ نور ډرونونه بیا د مسکو په سیمه کې ویشتل شوي دي.
د ۲۰۲۲م کال په فیبرورۍ کې پر اوکراین د روسیې د بریدونو له پيلیدو راهیسې اوکراین د روسیې د زیربناو پر وړاندې د بې پيلوټه الوتکو له بریدونو څخه استفاده کوي.
اوکراین دا کار د روسیې د توغندیزو او بې پيلوټه الوتکو د بریدونو چې په ځانګړي توګه د اوکراین د انرژۍ تاسیسات په نښه کوي، په ځواب کې ترسره کوي.
اوکراین په دې وروستیو کې یو وار بیا د روسیې د تیلو د تصفیې او انرژۍ پر تاسیساتو بریدونو ته زور ورکړی دی.