د فرانسې خبري آژانس، د اوکراین د کورنيو چارو وزارت له قوله لیکي چې روسېې د يکشنبې ورځې په سهار د تورې بحیرې ستراتيژيک بندر، اودیسه بمباري کړی دی. دغه بمبارۍ داسې وخت شوي چې اوکراین تر دې وړاندې خبرداری ورکړی وو چې روسيه په سويل کې د خپلو ځواکونو د تقويه کولو په حال کې ده.

د اوکراین د کورنيو چارو وزارت سلاکار، آنتون هیراشيتشینکو پر ټيلګرام ليکلي دي: «اودیسه باندې له هوا حمله شوې ده.» هغه زیاته کړې: «د رپوټونو پر اساس په ځينو سیمو کې اورلګیدنې رامنځ ته شوي. ځینې توغندي د دافع هوا په ذریعه ويشتل شوي دي.»

ياد آژانس ليکي چې په سیمه کې يې يوه خبريال پر ځايي وخت د سهار شاوخوا شپږ بجې د ښار په سویل لويديځه برخه کې د چاودنو غږونه اوریدلی دی. بریدونه ظاهراً په یوه صنعتي سیمه کې شوي چې لږ تر لږه په درو برخو کې ېې تور لوګی او د اور لمبې لیدل شوي دي. سیمې ته نژدې یوه سرتيري وويل، داسې ښکاري چې دغه برید د یو توغندي وي.

په اودیسه کې دغه بریدونه داسې وخت شوي چې ښکاري روسيه د اوکراین له شمال څخه د وتلو په حال کې ده.

په بوچا کې د ۳۰۰ ځايي خلکو د وژل کیدو ادعا

اوکراین ادعا کړې چې د پلازمینې کیف شاوخوا سیمې يې له روسي ځواکونو بیرته نیولي دي. په ورته وخت کې کیف ته نژدې د بوچا ښاروال ويلي دي چې د روسي ځواکونو د یوې میاشتې قبضې په جریان کې ۳۰۰ ځايي خلک وژل شوي دي.

رويټرز خبري آژانس هم د يکشنبې ورځې په رپوټ کې د اوکراین تازه پيښو ته اشاره کړې ده. په رپوټ کې ويل شوي چې د بوچا ښار یوه سړک په غاړه له لسو ډير مړي ګډوډ پراته دي. په یوه کلیسا کې بیا یو ډليز قبر لا هم سرخلاصی پاتې چې پکې د مړو د جسدونو پښې او لاسونه هم ښکاري.

د بوچا سوړ او تیاره ښار د مړو بدبويي او د بارودو بويونو په سر اخیستی دی. د اوکراین ولسمشر، ولادمیر زيلنسکي پر روسي عسکرو تور لګولی چې د اوکراين له شمالي سیمو څخه د وتلو یا په زور وښکلو پرمهال ېې عمداً هلته ماینونو ځای پر ځای کړي دي.

رویټرز زیاتوي په بوچا ښار کې يو ۶۶ کلن سړي چې ډبل بالاپوش او پشمي خولۍ يې په سر وه، عسکرو ته ېې ښکنځل کول او په تاسف سره يې وويل چې د ټانګ له سره یې پر سپيانو باندې ډزې وکړې.

له ماريوپول څخه د ملکيانو د ایستلو هڅې

د اوکراين ډير ځپل شوي ښار ماريوپول کې لا هم په زرونو ملکيان بند پاتې دي. سور صلیب يو ځل بیا هڅه کړې تر څو له دغه ښار څخه د بشري کوریدور له لارې دغه ملکیان را وباسي. دغه سازمان ان د جمعې په ورځ د ښار اطرافو ته خپل یو ټيم استولی وو خو د امنيتي ستونزو له کبله د خلکو په تخلیه بریالی نه شو. ویل شوي چې د ملکیانو د ايستلو له پاره شاوخوا ۶۰ بسونه او نور موټر اماده کړل شوي دي.

د خبریالانو وژنه

د اوکراین په تازه پيښو کې د يوه عکاس خبریال وژنه هم تائید شوې ده. دغه عکاس ماکسيم ليون نومیده چې یوه اوکرایني خبري وېب سايټ او تر څنګ يې له اوږدې مودې راهیسې رويټرز خبري آژانس سره هم کار کاوه. د ماکسیم لیون په اړه ويل شوي چې د اوکراین جګړې څخه د رپوټ ورکونې پر مهال وژل شوی دی. د یو مستند فلم جوړونکي د وژنې هم ويل شوي دي. د رپوټونو مطابق ليتوانيايي فلمي ډایرکټر، منتاس کوداراویسیوس په ماريوپول کې وژل شوی دی. د نوموړي په اړه ویل شوي چې له اوږدې مودې راهیسې ېې مستند فلمونه جوړول.

د اوکراین اقتصاد د خرابیدو پر لور

د اوکراین اقتصاد وزارت ويلي دي چې د روسېې د يرغل له کبله د دغه هیواد اقتصاد د یو کال په لومړي ربع کې ۱۶ سلنه راټيټ شوی او کیدای شي په کال کې ۴۰ سلنې ته را ولویږي.

د اروپايي اتحادېې د اقتصاد کمشنر، پاولو جنتيلوني، ويلي دي چې دغه اتحاديه پر روسیه باندې د لا ډيرو بندیزونو پر لګولو باندې کار کوي. خو دغه ايټالوي سیاستوال زیاتوي چې دغه بندیزونه به د انرژي پر سکتور باندې کوم تاثیر ونه لري.

د کاتولیک کلیسا مشر، پاپ فرانسیس، په ضمني توګه د روسېې د ولسمشر، ولادیمیر پوتین پر یرغل باندې نیوکه وکړه. پاپ وويل چې یو «ځواکمن» د ملتپالو د ګټو له پاره جګړې ته لمن وهي. پاپ تر دې وړاندې هم په کراتو او په کلکه د اوکراین جګړې د پای غوښتنه کړې وه.

د سولې خبرو کې پرمختګ نه دی شوی

روسيې د يکشنبې په ورځ وويل چې اوکراین سره د سولې په خبرو کې د رهبرانو د یوې غونډې له پاره په کافي اندازه پرمختګ نه دی شوی او د مسکو دريځ د کریميا او دنباس په اړه په خپل حال پاتې دی.

د روسېې د مذاکراتي پلاوي مشر، ولادیمیر ميدينسکي پر تیلګرام ويلي دي چې د «تړون مسوده لوړې جلسې ته د سپارلو له پاره چمتو شوې نه ده.» ميدينسکي زیاته کړې ده چې «زه بیا بيا دا تکراروم: د کریميا او دونباس په اړه د روسېې دريځ پرته له کوم بدلونه په خپل حال پاتې دی.»

د فبروري ۲۴مې راهيسې چې روسېې پر اوکراین یرغل کړی، دواړو لوریو وخت نا وخت خبرې اترې درلودلي، خو کوم پرمختګ په کې لا هم شوی نه دی.

آژانسونه/م.ک.ص./م.خ.ح.