دطالبانو د عامې روغتیا وزارت ویاند ډاکټر شرافت زمان امر، دویچه ویله ته وویل، چې د اوړي په دې موسم کې په ګرمو سیمو کې د ملاریا او ډینګي ناروغۍ مثبتې پېښې زیاتې شوي دي.

هغه وویل، د روان ۲۰۲۴م کال په لومړیو شپږو میاشتو کې ۳۷۰۰۰۰ زره ناروغانو مراجعه کړې وه، چې له جملې یې ۵۰ زره کسان په ملاریا ناروغۍ اخته شوي، په داسې حال کې چې تېر کال دا شمېرې ۳۵ زره ته رسېدلې وې.

نوموړي زیاته کړه، د تېر کال په پرتله سږ د ملاریا په مثبتو پېښو کې ۶۹ سلنه زیاتوالی راغلی دی.

ډاکټر شرافت زمان امر، دغه راز ویلي دي چې په تېرو شپږو میاشتو کې په ټول هيواد کې په ډینګي ناروغۍ هم ۱۰۷۷ کسان اخته شوي دي.

اړوند: په ټوله نړۍ کې د ملاریا عفونت مخ پر ډیریدو دی

د عامې روغتیا وزارت  ویلي دي چې د ملاریا د مخنیوي له پاره یې د تدابیرو په لړ کې په ۲۰۲۲ کال کې دوه میلیونه او تېر ۲۰۲۳ کال کې ۵ سوه زره پشه خانې ویشلي دي.

دغه وزارت، له ملاریا او ډینګي ناروغۍ سره د مبارزې له چمتووالي خبر ورکړی. د معلوماتو له مخې، ملاریا یوه موسمي پرازیټي انتاني ناروغي ده، چې په تودو او نیمه تودو سیمو کې خپرېږي او هر کال په نړۍ کې له ۳۰۰ تر ۵۰۰ میلیونه انسانان په اخته کېږي.