ترکیه دغه کانکريټي دیوال په ختيځ ایالت وان او ایران سره د ګډې پولې په اوږدو کې د امنيتي دلایلو پر اساس جوړوي.

دغه دیوال چې زیرک برجونه هم لري، اوس مهال يې د رغولو چارې ایران سره په پوله په چالدرن وان ایالت کې ادامه لري. د دغه دیوال لوړوالی ۳ متره دی. دغه هر کانکړيټي بلاک ۲ متره او ۸۰ سانتي لوړوالی او ۷ ټنه وزن لري.

ترکي چارواکو ويلي دي چې تر اوسه يې د وان ایالت په سرحدي سیمو کې ۷۶ ځیرک برجونه جوړ کړي دي. ترکېې دغه راز د ۱۱۰ کيلومترو په اوږدو خندق هم وښکلی دی.

د ترکيې حکومت ويلي دي چې دغه دیوال له تروريزم سره د مبارزې، د مالونو د قاچاق او د غیرقانوني مهاجرتونو د مخنیوي له پاره جوړوي تر څو په سرحدي سیمو کې يې خوندي امنيت وي.

د دغه دیوال د رغولو یو هدف تروریزم سره مبارزه ښودل شوې ده. ترکي رسنیو ويلي دي چې د کردستان د کارګر ګوند یا پې کې کې څه باندې زر ځواکونه ایران سره پر پوله فعالیت کوي.

دغه کانکريټي دیوال د رغولو یو بل هدف «غیرقانونی مهاجرتونو سره مبارزه» ښودل شوې ده. د ترکيې او ایران تر منځ سرحد د غیرقانوني مهاجرتونو لپاره یو ښه انتخاب دی. افغانان، ایرانيان او پاکستانيان له همدې لارې ترکيې ته ځانونه رسوي.

ترکيه وايي د دغه دیوال څخه د رغولو بل هدف د قاچاقي مالونو مخنیوی دی چې ایران يې هرکلی کړی دی. د ایران خارجه وزارت ويلي دي چې د دوه میلیارډ ډالرو په ارزښت قاچاقي مواد له ترکيې څخه ایران ته واردیږي چې د دغه دیوال په جوړیدو سره به يې مخه ونیول شي.

د ترکي رسنیو په حواله، د وروستیو اوونيو په جریان کې د ورځې لږ تر لږه ۵۰۰ افغان مهاجر له دغه سرحده ترکې ته مهاجر شوي دي.

د ترکيې د چالدرن ایالت قوماندان یوسف دورانی دنچ د انادولو خبري آژانس ته ويلی دي: «د ترکیې امنيتي ځواکونه په سرحد کې د امنیت د تامین له پاره فداکارانه هڅې کوي. د دغه دیوال په جوړیدو سره به د ایران او ترکيې ترمنځ سرحدي سیمه لا امن شي.»

دا د چین او له مکسیکو سره د امریکا تر سرحدي دیوال وروسته، د نړۍ دریم اوږد دیوال دی.