د «جاپان ټوډي» پر ليکه رسنۍ د پنجشنبې په ورځ رپوټ ورکړی دی چې د ۲۰۲۱م کال په اګست مياشت کې واک ته د طالبانو تر رسېدو وروسته جاپان ته له انتقال شويو ۱۶۹ افغانانو څخه یې ۴۰ سلنه له دغه هېواد څخه وتلي دي.

يادې رسنۍ د دغه مهاجرو له قوله ليکلي دي چې هغوی د فشارونو او د جاپان د بهرنيو چارو وزارت له خوا د ملاتړ نه ترلاسه کولو په دليل بیرته افغانستان ته ستانه شوي او يا نورو هېوادونو ته تللي دي.

د دې رپوټ پر اساس جاپان ۹۸ افغانان چې د تخلیې د پروسې په ترڅ کې جاپان ته انتقال شوي ول، د مهاجر په توګه منلي دي، په داسې حال کې چې ۵۷ کسان د طالبانو له خوا د ځوريدو پر خطر سربیره بيرته افغانستان ته ستانه شوي او ۷ نور یې امريکا متحده ایالاتو او بريتانيا ته تللي دي.

سويلي کوريا ته تللي افغانان په څه حالت کې دي؟

د تخلیې پروسې په ترڅ کې جاپان ته انتقال شوي کسان، په افغانستان کې د دغه هېواد د سفارت ملکي کارکوونکي او د هغوی د کورنۍ غړي ول.

پر افغانستان د طالبانو د بيا واکمنۍ راهيسې هغه په لسونو زره کسان چې د بهرنيو نهادونو او يا له پخواني حکومت سره یې کار کاوه، له هېواده وتلي دي.

د «جاپان ټوډې» ورځپاڼې زياته کړې ده چې د تېرکال د اکتوبر او دسمبر مياشتو ترمنځ د دغه هېواد د بهرنيو چارو وزارت دغو افغانانو ته استوګنځایونه، خواړه او نور خدمات برابر کړي ول.

خو د جاپان دغو يو شمير پخوانيو محلې کارکوونکو «کيودو نیوز» ته ويلي دي چې دوی ته ويل شوي ول چې کاري قراردادونه يې د اګست مياشتې تر پايه ختمیږي او تر فشار لاندې ول چې له دغه هيواد څخه ووځي.

ب. ص/ ن. ز