د کیف تر دې اعلان وروسته چې روسیې د اوکراین په ختیځ دونباس سیمه کې ستر عملیات پیل کړي دي. د امریکا متحده ایالاتو ولسمشر د سه شنبې په ورځ (۲۰۲۲م کال د اپریل ۱۹مه) د اوکراین د جګړې په هکله له خپلو متحدینو سره غږیږي.

د سپینې ماڼۍ له لوري په خپره شوې یوه اعلامیه کې ویل شوي دي چې جو بایدن به د ویډیويي تماس له لارې له خپلو متحدینو او شریکانو سره تماس ونیسي.

اوکراین: روسي ځواکونو د دونباس عملیات پیل کړي

د اوکراین ولسمشر ولودیمیر زیلنسکي ویلي دي چې روسیې د اوکراین په ختیځ کې عملیات پیل کړي دي چې له اوږدې مودې راهیسې یې ورته تیاری نیوه.

زیلینسکي ویلي دي: «موږ اوس دا خبره تائیدولی شو چې روسي ځواکونو د دونباس له پاره جګړه پیل کړې ده، چې هغوی ورته له ډیر وخت راهیسې چمتووالی نياوه.»

د زیلنکسي په خبره: «د روسي ځواکونو د پام وړ یوې برخې اوس خپله توجه دې تهاجم ته اړولې ده.»

د روسیې د دفاع وزارت د تازه جګړې په هکله کومه تبصره نه ده کړې.

د مارچ میاشتې په وروستیو کې د پلازمینې کیف د اطرافي سیمو په شمول د اوکراین له مرکزي سیمو څخه د روسي ځواکونو د وتلو له پېل راهیسې اوکراین په دونباس کې د روسیې له لوري د دغو تهاجمي عملیاتو اټکل کاوه.

د لویدیځو هیوادونو سرچینو دا خبره تائید کړې ده چې روسي ځواکونه د اوکراین په ختیځ کې بیا مورچلې ټینګوي.

د اوکراین د جمهوري ریاست یوه جګپوړي چارواکي اندرې یرمارک، د روسیې نوي بریدونو ته په اشارې سره ویلي دي چې «د جګړې دوهمه څپه پیل شوې.»

د اوکراین د وسلوالو ځواکونو لوی درستیز ویلي دي روسي ځواکونو د اوکراین په ختیځ لوهانسک او دونیسک او همداشان په سویل ختیځه برخه زاپروږه کې خپلو حملو ته شدت بخښلی دی.

د اوکراین د ملي امنیت شورا سیکرتر اولیکسي دانیلوف، ویلي دي چې روسي ځواکونه هڅه کوي چې په دونیسک، لوهانسک او خارکیف کې د اوکرایني ځواکونو دفاعي لیکي ماتې کړي.

د هغه په خبره روسي ځواکونو په لوهانسک کې د کریمینا ښار او یو بل ښار نیولي دي، خو په نورو سیمو کې د اوکراین پوځ سیمي ساتلي دي.

په عین وخت کې روسيي ځواکونه هڅه کوي چې د ماريوپول ښار ونیسي، چې د روسیې له یرغل راهیسې کلابند دی. د ماريوپول کنترول ترلاسه کول د روسیې له پاره مهم دی، ځکه چې غواړي د ازوف ساحل خوندي کړي او د کریمیا او دونباس تر منځ یو دهلیز جوړ کړي.

د ماریوپول د کلابند شوي ښار ښاروال وایي چې روسي ځواکونه ملکیان په «اجباري ډول» له ماریوپول څخه روسیې او یا په اوکراین کې د روسیې تر کنترول لاندې سیمو ته اخراجوي.

په عین وخت کې اوکراین ته بیلا بیل مهمات هم اکمال شوي دي. د متحده ایالاتو د دفاع وزارت یوه جګپوړي چارواکي ویلي دي چې تیره اوونۍ د دغه هیواد له لوري له اوکراین سره د ۸۰۰ میلیونه ډالرو پوځي مرستې تر اعلان وروسته بېلابېل ډول وسلې اوکراین ته رسیدلي دي. د فرانسې خبري آژانس د دغه چارواکي له قوله لیکلي دي چې له متحده ایالاتو څخه څلور الوتنې رسیدلي او په نزدې وخت کې به پنځمه الوتنه هم وشي.

د روسیې د دفاع وزارت د اوکراین په لویدیځ کې پر لویو ښار هوایي برید هم تائید کړی دی، چې په خبره یې یو پوځي لوژیستکي مرکز یې په نخښه کړی دی.

د ملګرو ملتونو د کډوالو عالي کمیسارۍ (یو ان اچ سي آر) ویلي دي چې د روسیې تر یرغل وروسته ۴،۹ میلیونه اوکراینيان له خپل هیواد څخه وتلي دي.

زموږ له آرشیف څخه: