د طالبانو ادارې سترې محکمې د سې شنبې په ورځ ناوخته اعلان وکړ چي په سرپل ولايت کي يې د ۱۴ ښځو په گډون ۶۳ کسانو ته په عام محضر کي سزا ورکړې ده.

د طالبانو د عالي محکمې په یوې خبرپاڼه کي چي د دغي محکمې د ایکس په  کاروونکي اکاونټ کي خپره سوې ده، راغلي دي چي دغه کسان د «لواطت ،غلا او غیراخلاقي اړیکو» په تور د سرپل د مرکز په ورزشي لوبغالي کي په دُرو ووهل سول.

د دغې خبرپاڼي پر بڼسټ د دغو کسانو د سزا ورکولو پر وخت د طالبانو سیمه ایز چارواکي او ډېر نور خلک حاضر ول.

سربیره پردې په پنجشیر ولایت کي د طالبانو محلي چارواکو هم ویلي دي چي دوو کسانو ته یې د خلکو په حضور کي سزا ورکړې ده.

په یوې خبرپاڼي کي راغلي دي چي دغه کسان د «نامشروع اړیکو» په تور د پنجشیر ولایت د ابتدايي محکمې په میدان کي په عام حضر کي  په درو ووهل سول.

له هغه وخت راهيسي چي طالبان بيا واک ته رسېدلي دي په عام محضر کي يې د تورنو کسانو دغه ډول سزا گاني پیل کړي دي.

دغی ډلې تر اوسه پوري په سونو ښځي او نارینه د بېلابېلو تورنو له امله په عام محضر کي په درو وهلي او دوه کسان یې قصاص  کړي دي.

نړیوالو ټولنه او د حقوقي چارو کارپوهان، مدافع وکيلانو او قانوني محاکمو ته د نه لاسرسي پرته د تورنو کسانو مجازات کول غندي او دا کار له بشري حقونو څخه سرغړونه بولي. خوطالبان  دغو غبرگونونو ته هیڅ پاملرنه نه کوي او د خپل مشر په فرمان، په عام محضر کي د تورنو کسانو اعدامول او په درو وهل عملي کوي.

GP/NZ/Shakila