رويترز خبري آژانس د سه شنبې په ورځ د دوو سرچينو له قوله خبر ورکړی دی چې له پاکستانه د افغانانو د اخراج په لړ کې د هغو افغانانو له ډلې هم اخراج شوي دي چې امریکا متحده ایالاتو ته د تلو له پاره په دغه هېواد کې انتظار باسي.

افغان ايوک، د هغو ټيمونو اصلي ائتلاف دی کوم چې امریکا ته تلونکو افغانانو سره مرسته کوي. د دغه ائتلاف مشر، شاون وندايور، وايي لږ تر لږه ۱۳۰ افغانان چې په امریکا کې د مېشتيدا له پاره ېې د امریکا د مهاجرت ځانګړې ويزې پروسس شوي، اخراج شوي دي.

هغه دغه ارقام د ائتلاف د غړو او په اسلام آباد کې د امریکا سفارت له خوا د چمتو شوو معلوماتو پر اساس چې هغه ليدلي، ورکړي دي.

وندایور وويل چې د پاکستان پولیسو ۲۳۰ دغه ډول افغانان نيولي، چې تر اوسه ېې شاوخوا ۸۰ کسان بېرته خوشي کړي دي.

يوه لوړ پوړي حکومتي چارواکي د نوم نه ښودلو په شرط وويل چې امریکا متحده ایالات «داسې کوم رسمي طرزالعمل نه لري تر څو دا ډول کيسونه تعقیب کړي.»

هغه دا هم وویل چې امریکا ته د تلو په انتظار افغانانو له ډلې «ډېر کم» شمېر ېې اخراج شوي دي.

اسلام آباد په اکتوبر مياشت کې ټولو هغو افغانانو ته چې په دغه هيواد کې د اوسېدو قانوني اسناد نه لري، یوه میاشت یا د نومبر تر لومړۍ وخت ورکړ چې په خپله خوښه له دغه هېواد ووځي.

له دغه اعلان سره سم، د امریکا سفارت د ایمیل له لارې شاوخوا ۲۵۰۰۰ افغانانو ته د حفاظت اسنادونه واستول تر څو ېې پاکستاني چارواکو ته ثابته کړي وي چې په امریکا کې د دوی د مېشتيدا کارونه پروسس شوي دي.

د امریکا متحده ایالاتو خارجه وزارت ویاند هم وايي چې «په اکتوبر کې د بې اسناده مهاجرو د اخراج پلان وروسته» واشنګټن پاکستان ته د هغو افغانانو نوملړ وسپاره چې په امریکا متحده ایالاتو کې هستوګن کیږي.

شاون وندايور، د دوو غربي ديپلوماتانو له قوله چې نه ېې غوښتل نومونه ېې واخیستل شي، وويل چې پاکستاني چارواکي په اکثرو مواردو کې د حفاظت پر دغو پاڼو سترګي پټوي. هغه وايي دغه ليکونه يوازې په ځينو مواردو کې مهم ګڼل کيږي، اما ټول ځايي چارواکي ېې اطاعت نه کوي.

رويترز وايي امریکا ته د پاکستان د کورنیو او بهرنيو چارو وزارت په دې هکله د دوی پوښتنو ته ځواب نه دی ورکړی.

د پاکستان د کورنیو چارو وزارت د نومبر مياشتي په نيمايي کې وويل هغه افغانان چې په پاکستان کې امریکا ته د تګ له پاره انتظار دي، نه نیسي.

هغه وخت د فرانسې خبري آژانس ويلي ول چې په دې هکله د پاکستان د کورنيو چارو وزارت په لیک کې راغلي: «د امريکا د اعلان له مخې ۱۱۵۰ افغان وګړي چې په امريکا کې د ځای پر ځای کېدو اسناد لري بايد تر راتلونکې خبرتيا پورې اخراج نه شي.»

په ۲۰۲۱ کال کې د طالبانو تر بیاواکمنېدو وروسته له افغانستانه د امریکايي قواوو د وتلو پر مهال په لسونو زره افغانان چې اکثره ېې د امريکا محلي کارکوونکي ول، د امريکا په پوځي الوتکو کې امریکا متحده ایالاتو ته ولاړل. ورسره جوخت په کابل کې د امریکا سفارت وتړل شو او په شرایط برابر پاتې نور افغانان پاکستان ته ولاړل، تر څو په اسلام آباد کې د امریکا سفارت له طریقه خپل کارونه مخ ته یوسي.

پاکستان وايي چې ۱ اعشاريه ۷ ميلیونه افغانان په پاکستان کې د اوسېدو قانوني اسناد نه لري، چې د اخراج په لومړي پړاو کې باید ووځي. ملګري ملتونه وايي په شاوخوا ۳ میاشتو کې تر ۴نیم لکو ډېر افغانان له پاکستان خپل هيواد ته ستانه شوي دي.

پاکستان چې له څلور لسیزو راهیسې د میلیونو افغان مهاجرو کوربه پاتې شوی، ادعا کوي چې د پاکستان په وروستیو ناامنیو کې افغانان ښکيل دي او له همدې کبله ېې د افغانانو د اخراج پرېکړه کړې ده. د طالبانو حکومت بیا د پاکستان دغه ادعا ردوي او په عین حال کې بشري سازمانونو هم د پاکستان د اخراج پر پريکړه نيوکي کړي دي، خو د دې ټولو باوجود پاکستان تر اوسه په خپل دغه دريځ کې ثابت پاته شوی دی.

(Reuters)mks/nz