د یکشنبې په ورځ د لبنان ولسمشر میشال سلیمان، په یوې تلویزیوني وینا کې وویل چې د سعودي عربستان مرسته د دغه هیواد د پوځ د لا پیاوړي کیدو په موخه ترسره کیږي.

ولسمشر سلیمان وویل: «سعودي عربستان پریکړه کړې ده چې له لبنان سره درې میلیارده ډالر مرسته وکړي ترڅو د دغه هیواد د پوځ وړتیاوې نورې هم لوړې شي.» ولسمشر سلیمان روښانه کړه چې دا تر اوسه پورې د لبنان له پوځ سره د مرستو تر ټولو لویه بسته ده.

سلیمان په خپلو خبرو دې موضوع ته هم اشاره وکړه چې کیدای شي د سعودي عربستان د مرستو یوه برخه له فرانسې څخه د وسلو پر رانیولو باندې مصرف شي. اوس مهال د فرانسې ولسمشر فرانسوا اولاند، په سعودي عربستان کې دی او د دغه هیواد له پاچا سره د دواړو هیوادونو تر منځ پر اړیکو باندې خبرې کوي.

څارونکي وایي چې سعودي عربستان غواړي د لبنان پوځ پیاوړی کړی ترڅو وشي کولای د حزب الله پر وړاندې ودریږي. حزب الله په سیمه کې د ایران او یو شمیر نورو هیوادونو له خوا تقویه کیږي.

حزب الله د سوریې په کړکیچ کې د دغه هیواد د ولسمشر بشارالاسد، ملاتړ کوي. دا په داسې حال کې ده چې سعودي عربستان د سوریې د پاڅون کوونکو ملاتړ کوي او غواړي چې بشار الاسد له واکه ګوښه شي.

په همدې حال کې د لبنان پوځ په وروستیو وختونو کې په دې کې پاتې راغلی دی چې په خپله خاوره کې د فرقه یې شخړو مخه ونیسي. دغه شخړې له سوریې څخه لبنان ته غځیدلې دي. د لبنان یو شمیر سني اوسیدونکي د سوریې د پاڅونکوونکو ملاتړ کوي خو حزب الله بیا په ښکاره ډول د بشارالاسد ملاتړی دی.