سعودي عربستان په پاکستان کې پانګونه ته ليوالتيا ښوولې
۱۴۰۳ فروردین ۲۹, چهارشنبه
سعودي عربستان ډاډ څرګند کړی دی چې په پاکستان کې به ېې د پانګونې پروژې د «پام وړ په ښه توګه» مخته ولاړې شي. اسلام آباد تر دې ېوه ورځ مخکې اعلان وکړ چې رياض ورسره د ۵ ميلياردو ډالرو پانګونې د چټکولو ژمنه کړې ده.
د آرشیف انځور - د سعودي عربستان د بهرنیو چارو وزير، فیصل بن فرهان آل صعودانځور: MARCO LONGARI/AFP
اعلان
د سعودي عربستان د بهرنيو چارو وزير، فیصل بن فرحان آل سعود، د دوشنبې په ورځ د یو اقتصادي پلاوي په مشرۍ په یو دوه ورځني سفر اسلام آباد ته ورسيد.
د رويټرز خبري آژانس په حواله تر بحثونو وروسته د پاکستان او سعودي عربستان د بهرنيو چارو وزیران په یو خبري کنفرانس کې راڅرګند شول. د پاکستان د بهرنیو چارو وزير اسحق ډار، په دغه ګډ خبري کنفرانس کې وويل چې پاکستان دغه پلاوي ته د پانګونې د ممکنه پروژو په هکله لازم معلومات ورکړي دي.
هغه وويل چې پاکستان د سعودي د پانګوالو له پاره په پاکستان کې د کرهڼې، کانونو، معلوماتي تکنالوژۍ او هوانوردۍ په برخه کې د پانګونې د امکاناتو یادونه وکړه.
د سعودي عربستان د بهرنيو چارو وزير وويل چې هغه په پاکستان کې د پانګونې فرصتونو ته ليواله شوی او د پاکستان له لوري ورکړل شوي معلومات ېې ګټور وبلل.
فیصل بن فرحان آل سعود وويل: «دا ډېر زیات او د پام وړ ډاډ راکوي ترڅو وشو کړای په هغو پروژو کې مخ پر وړاندې ولاړ شو کوم چې موږ د ېوې مناسبې پانګونې له پاره تشخيص کړي دي.» هغه زیاته کړه: «زه ډاډه یم چې موږ به د پام وړ پرمخ ولاړ شو.»
په اسلام آباد کې د سعودي عربستان او پاکستان پلاوې په داسې وخت کې دغه څرګندونې کوي چې د پاکستان لومړي وزير شهباز شریف تېره اوونۍ په مکه المکرمه کې د سعودي عربستان له شهزاده محمد بن سلمان سره په خپله وروستۍ کتنه کې د دواړو هېوادونو د اقتصادي همکاريو پر ودې بحثونه درولودل.
اسلام آباد ته د سعودي عربستان د پلاوی تګ د پاکستان او سعودي عربستان د مشرانو تر منځ د یو رسيدلي تفاهم د ادامې له پاره کيږي.
د پاکستان او سعودي تر منځ دغه کتنې په داسې وخت کې شوي چې پاکستان د پيسو نړېوال صندوق (آي ام اف) څخه د ۲۴م ځل له پاره د مالي مرستې د ترلاسه کولو په هڅه کې دی.
د پاکستان د ماليې وزير، محمد اونګزیت، دا وخت په واشنګټن کې دی. هغه غواړي د آی ام اف او د نړيوال بانګ په پسرلنۍ غونډه کې ګډون وکړي چې هغه به پکې پاکستان ته د نوو پورونو پروګرام په هکله د خبرو اترو پروسه پيل کړي.
د پاکستان حکومت په داسې حال کې د مالي مرستو او پانګونې پروژو د جلب له پاره هڅې کوي چې دغه هېواد له مودې راهیسې له سخت اقتصادي بحران سره مخ دی.
(Reuters)mks/nz
له آرشيف څخه (30.08.2022):
په پاکستان کې د سېلاب ويجاړۍ دوام لري
د رسمي شمیرو پر اساس په ټول پاکستان کې د سېلابونو له کبله تر يولسو سوو ډېر کسان مړه شوي دي. له اقتصادي بحران سره په لاس او ګريوان دې هېواد کې دې تازه طبيعي ناورين د حکومت او خلکو وضعيت نور هم خراب کړی دی.
انځور: Shakeel Ahmed/AA/picture alliance
په چارسده کي سېلابونه
دا د خيبر پښتونخوا د چارسدې ښار يوه منظره ده. دمګړۍ د پاکستان ډېره برخه همداسې بريښي. د پاکستان د چاپيريال ساتنې وزیرې شيري رحمان ويلي دي چې اقليمي بدلونونه د دې ويجاړيو باعث ګرځي. په پاکستان کې د تېر کال په پرتله سږ کال دوه برابر ډېر اورښت ثبت شوی دی. په ځينو سيمو کې حتی دوه چنده ډېر باران وریدلی دی.
انځور: Abdul Majeed/AFP/Getty Images
پيښور ته څيرمه د کور د وسايلو ژغورل
دا عکس پېښور ښار ته څېرمه اخيستل شوی دی. سيلاب ځپلې کورنۍ هڅه کوي چې د کور څومره وسايل چې ژغورلی شي وچې ته يې انتقال کړي. په ۲۰۱۰م کال کې هم په پاکستان کې سخت سېلابونه راغلي ول. هغه وخت سېلابونو د لږ تر لږه ۲۰۰۰ کسانو ژوند واخيست. انتقاد کوونکي وايي چې که حکومت له ماضي څخه درس اخيستی وای نو اوس به د ويجاړۍ کچه دومره لوړه نه وای.
انځور: Muhammad Sajjad/AP Photo/picture alliance
يو سپين ږيری چي هرڅه يې له لاسه ورکړي
د سونو زرو پاکستانيانو په څېر دا کس هم بې کوره شوی دی. د مونسون بارانونو لړۍ چې په جون مياشت کې پېل شوې وه، اوس هم ادامه لري. په دې ترڅ کې د سېلابونو له کبله لس لکه کورونه نړيدلي او يا هم زيانمن شوی دي. سېلابونه دومره شديد ول چې بشپړ کلي یې له منځه يوړل. د پاکستاني چارواکو په حواله تر اوسه ۳۳ ميليونه کسان اغیزمن شوي دي.
انځور: Amer Hussain/REUTERS
يو ځوان له سېلاب څخه د ځان ژغورلو په هڅه
په پاکستان کې سېلابونه په داسې وخت کې د ويجاړۍ باعث شوي چې د جنوبي آسيا دا هېواد لا دمخه د اقتصادي بحران سره لاس او ګريوان وو. لوړو بيو او انفلاسيون خلک تر پزې رسولي ول چې سيلابونو یې مشکلات لا هم ډېر کړل. دمګړۍ د اړتيا بنسټیزو او خوراکي توکو بیې نورې هم پسې لوړې شوي دي.
انځور: Fayaz Aziz/REUTERS
يو سپين ږيری له اوبو څخه د وتلو په حال کي
د دې طبيعي ناورين له کبله په پاکستان کې د وير فضا خپره ده. له يوه اړخه د سونو رزو خلکو د ټول عمر سرمایه اوبو وړې ده نو بل پلوه ته کرهڼيزو ځمکو ته هم سخت زیان اوښتی دی. بې وزله کروندګر به د خپل ژوند د بیرته پيلولو له پاره حکومتي مرسته ته اړتيا ولري چې د پاکستان اوسني اقتصادي وضعيت ته په کتو سره يو لوی چيلنج بريښي.
انځور: Muhammad Sajjad/AP Photo/picture alliance
تر شنه آسمان لاندې پراته مجبوره خلک
د سېلابونو له کبله بې کوره شوي په زرونو پاکستانيان دمګړۍ تر شنه آسمان لاندې د مرستو په تمه دي. په ځينو سيمو کې موقتي سرپناوې جوړي شوي دي، خو سېلابونه لا دوام لري او د چارواکو په وينا د بې کوره کسانو شمير ورځ تر بلې زياتیږي.
انځور: Abdul Majeed/AFP
سېلاب ځپلو ته د خېمو رسول
له ترکیې او سعودي عربستان څخه خېمې او نور اړين توکي د پاکستان پر لور استول شوي دي. نور هېوادونه هم له پاکستان سره د مرستې په موخه فعال شوي دي. په ډېرو اغیزمنو سيمو کې هر لوري ته اوبه ولاړې دي چې له امله یې څرخي الوتکې په کښيناستو کې ستونزې لري.
انځور: Naveed Ali/AP Photo/picture alliance
د يوه سړک پرغاړه پراته ماشومان
اوسنیو سېلابونو د پاکستان په ټولو ايالتونو کې زيان اړولی دی. بې شمیره پلونه او سړکونه ويجاړ شوي دي. له دې کبله د تګ راتګ سيسټم هم اغیزمن شوی او سېلاب ځپلو سيمو ته ژر تر ژره د مرستو په رسولو کې مشکلات رامنځته کیږي. خو يو ښه خبر دا دی چې د هوا پيژندنې ادارې په حواله به په راتلونکې اونۍ کې اورښتونه ودريږي.