د پاول پاوليکوفسکي «سوړ جنګ» نومي فلم د «غوره فلم»، «غوره لوبغاړې»، «غوره سېناريو ليک»، «غوره ايديټ» او «غوره لارښوونې» په برخه کې جايزې وړې دي. د فلمي لارښود او رژيسور پاوليکوفسکي له پاره، دا د ۲۰۱۴ م کال راهيسې دويم ځل دی چې د اروپايي فلمونو دغه مهمه جايزه تر لاسه کوي. څو کاله مخکې يې هم د «ايدا» په نوم فلم سره د ريژي يا لارښوونې په برخه کې د ژوري پلاوی قانع کړی وو. پولنډۍ هنرمندې، جوانا کوليک (پاس انځور کې) په کولډ وار يا «سوړ جنګ» نومي فلم کې د يوې سندرغاړې د رول په لوبولو سره يوه جايزه وګټله، د هغې همکار مارسېلو فونته له ايټاليا څخه د اروپا تر ټولو ښه ايکټر يا فلمي اداکار وبلل شو. ژوري پلاوي وويل چې دواړه «غښتلي او جذباتي لېواله اداکاران» دي. دغه پولنډی تور او سپين فلم په ۱۹۵۰مو کلونو کې، يعنې د ساړه جنګ پر وخت د مينې يو داستان رانغاړي.  
د جايزې ګټونکې مېرمن کوليګ البته دغه جايزه خپله نه شوای تر لاسه کولای. هغه د فلمي لارښود، پاوليکوفسکي په خبره حامله داره ده او په طياره کې د الوتنې اجازه نه لري. ايټالوي هنرمند، فونته په ډېرې خوشحالۍ سره جايزه تر لاسه کړه. هغه د «دوګمېن» په نوم فلم کې د سپو د يوه سلماني يا نايي رول لوبوي چې د مجرمينو په اعمالو کې ښکيليږي. د کن د فلمونو په فستيوال کې هم فونته د غوره لوبغاړي په توګه جايزه ګټلې وه. نورې جايزې د اروپا فلمي اکاډمۍ د «ستالين د مرګ» په نوم د بريتانوي، ارماندو يانوچي «غوره کميډي فلم» ته ورکړې. هسپانوۍ هنرمندې، کارمن ماورا د خپل ژوند د لاسته راوړنو له کبله وستايل شوه. اکاډمۍ داسې وويل چې ماورا په حيرانونکي ډول د داسې ښځو رول لوبوي چې د خپلو آرزوګانو او رښتينولۍ تر منځ ښکېلې وي. 

آلمانان مايوسه دي

د آلمانانو له پاره د جايزې د وېشلو مراسم خورا مايوسونکي ول. د فستيوال تر مخه کارپوهانو ماري بويمر ته د «غوره لوبغاړې» په کټګورۍ کې د هغې د بريا چانس اټکل کړی وو. هغې د «درې ورځې په کيبېرون کې» نومي فلم کې د رومي شنايدر نقش لوبولی وو، خو د پولنډۍ هنرمندې جوانا کوليګ له خوا ماته شوه. 
دوه جايزې البته کريستوف کايزر او يوليان ماس ته د رومي شنايدر د ژوند په هکله د جوړ شوي فلم له کبله ورکړل شوې، هغه د «غوره فلمي موسيقۍ» په برخه کې وې.