د استرالیا په ختيځ کې پروت، نوي سويلي ويلز ایالت کې د ډيرو ورښتونو رپوټونه ورکول کيږي. د دغه ایالت صدراعظمې، ګلديس برجیکلیان ويلي دي چې په سیمه کې يې په تیرو سلو کلونو کې داسې سيلابونه نه ول راغلي.

استرالیايي چارواکو رسنیو ته ويلي دي چې د دوشنبې ورځې له سهاره يې له سیلابه اغیزمنو سیمو څخه د خلکو د ايستلو عملیات پيل کړي چې تر اوسه پورې يې ۱۸ زره کسان امن ځایونو ته انتقال کړي دي.

چارواکو د یاد ایالت ۱۷ سيمې د ځپل شوو سیمو په توګه يادې کړي دي. په دغو سیمو کې تر ۲۰۰ زيات ښوونځي تړل شوي او په زرونو اوسیدونکي يې امن سیمو ته لیږدول شوي دي.

د يکشنبې په ورځ سيدني ښار ته څيرمه په دغه سیمه کې ځايي خلک د سيلاب نندارې ته رواتلي چې یو سړک يې لاندې کړی. چارواکو ويلي دي چې د دغه ښار په ځينو سیمو کې ډېر بارانونه شوي دي.

د استراليا روغتيايي چارواکي وايي چې په سیدني او شاوخوا سیمو کې د شدیدو سيلابونو له کبله د کرونا واکسيناسیون پروګرام هم نه دی عملی شوی. په استرالیا کې همدا نن دوشنبه د مارچ ۲۲مه د کرونا ويروس ضد واکسیناسیون پروسې لومړنی پړاو پيليدونکی وو.

د استرالیا د هوا پيژندې ادارې د هوا حالات د «انديښنې وړ» ښودلي، خو وايي چې د اوونۍ تر پايه به هوا بيرته ښه شي. تر اوسه د سیلابونو او ورښتونو له کبله د ځاني تلفاتو خبره نه ده شوې.

استرالیايي چارواکو «د ژوندانه د بالقوه ګواښ» څخه خبرداری ورکړی. چارواکي وايي چې د خلکو له خوا يې د مرستې په زرونو تيلفوني تماسونه ترلاسه کړي دي.

په نوي سويلي ويلز ايالت کې ډېر سړکونه اوبو لاندې کړي. په ځينو برخو کې يوازې لوي موټرونه کولای شي تګ راتګ وکړي.

د سيدنې ښار شمال ته په ۱۲۰ کيلومترۍ کې دغه تفريحي پارک هم اوبو لاندې کړی دی. ويل شوي چې په دغې سیمه کې تر ۲۰۰ ميلي مترو پورې ورښتونه شوي دي.

په استرالیا کې اوسني سيلابونه په داسې حال کې راوتلي چې يو کال مخکې د دغه هیواد په ځنګلونو کې ستر اورونه لګیدلي وو چې ډېر وخت يې دوام درولود.